பட மூலாதாரம்,GETTY IMAGES

அமெரிக்க அதிபராக தேர்வு செய்யப்பட்டிருக்கும் டொனால்ட் டிரம்ப் தன் அமைச்சரவைக்குத் தேர்வு செய்திருக்கும் நபர்களில் பலர் தவறான நடத்தை உள்ளிட்ட கடுமையான குற்றச்சாட்டுகளை எதிர்கொண்டுள்ளனர்.

டிரம்பின் பாதுகாப்பு செயலாளராக நியமிக்கப்படவுள்ள பீட் ஹெக்செத் மீது பாலியல் வன்கொடுமை செய்ததாகக் குற்றம் சாட்டப்பட்டது. அவர் அதற்கு மறுப்பு தெரிவித்துள்ளார்.

டிரம்பின் அமைச்சரவையில் அட்டர்னி ஜெனரலாக நியமிக்கப்பட அதிகம் சாத்தியங்கள் இருக்கும் மாட் கேட்ஸ், ஒரு நெறிமுறை விசாரணையை எதிர்கொள்கிறார்.

சுகாதார செயலாளராக நியமிக்கப்பட சாத்தியங்கள் இருக்கும் ராபர்ட் எஃப். கென்னடி ஜூனியர், தடுப்பூசிக்கு எதிரான நிலைப்பாட்டைக் கொண்டவர். அதற்காக அவர் கடுமையான விமர்சனங்களை எதிர்கொள்கிறார்.

வரும் ஜனவரியில் டிரம்ப் பதவியேற்கும்போது, அவரின் அமைச்சரவைக்கு அமெரிக்க செனட் சபையின் ஒப்புதலைப் பெற வேண்டியிருக்கும்.

செனட் சபை குடியரசுக் கட்சியினரின் கட்டுப்பாட்டில் இருக்கும் என்ற போதிலும், அவரது அமைச்சரவை உறுப்பினர்கள் இருதரப்பு விசாரணைகளின் போதும் தீவிரமான கேள்விகளை எதிர்கொள்வார்கள்.

பட மூலாதாரம்,GETTY IMAGES

கடந்த 2017ஆம் ஆண்டு கலிபோர்னியாவில் நடந்த பாலியல் வன்கொடுமை வழக்கில் டிரம்பின் பாதுகாப்பு செயலாளராகத் தேர்வு செய்யப்படவுள்ள ஹெக்செத் விசாரணைக்கு உட்படுத்தப்பட்டதாக போலீசார் வெள்ளிக்கிழமை தெரிவித்தனர்.

ஃபாக்ஸ் நியூஸ் தொகுப்பாளரும், ஆப்கானிஸ்தான் மற்றும் இராக்கில் நடந்த போர்களில் அனுபவம் பெற்றவருமான ஹெக்சேத், கைது செய்யப்படவில்லை, மேலும் அவர் தன்மீதான குற்றச்சாட்டை மறுத்தார்.

டிரம்பின் செய்தித் தொடர்பாளர் ஸ்டீவன் சுங் கூற்றுபடி, "ஹெக்செத் அனைத்துக் குற்றச்சாட்டுகளையும் திட்டவட்டமாக மறுக்கிறார் மற்றும் அவர்மீது எந்தக் குற்றச்சாட்டும் பதிவு செய்யப்படவில்லை" என்றார்.

பிபிசியின் அமெரிக்க கூட்டு நிறுவனமான சிபிஎஸ்-இன் செய்தி அறிக்கையில் மற்றொரு முக்கியத் தகவலும் குறிப்பிடப்பட்டுள்ளது. ஹெக்சேத் ஒரு "வெள்ளையின மேலாதிக்கத்தை" குறிக்கும் டாட்டூவை உடலில் குத்தியிருப்பதாக நினைத்த அவரது சக ராணுவ வீரர்களே அவரை அச்சுறுத்தலாகக் கருதியதாக அந்தச் செய்தி தெரிவிக்கிறது.

ஆனால் ஹெக்சேத் தனக்கு எந்தக் கடும்போக்குவாதக் குழுக்களுடனும் தொடர்பு இல்லை என்று கூறியுள்ளார்.

மினசோட்டா நேஷனல் கார்டின் முன்னாள் உறுப்பினரான அவர், தனது தோள்பட்டையில் "Deus Vult" என்ற வார்த்தைகளை பச்சை குத்தியுள்ளார். இந்த லத்தீன் சொற்றொடருக்கு "கடவுளின் சித்தம்" என்று பொருள். இந்த முழக்கம் இடைக்காலத்தில் சிலுவைப் போர்களின்போது கிறிஸ்தவர்களால் பயன்படுத்தப்பட்டது.

ஓய்வுபெற்ற மாஸ்டர் சார்ஜென்ட் டெரிகோ கெய்தர் சிபிஎஸ் செய்தி நிறுவனத்திடம் பேசுகையில், "அவர் தனது தோள்பட்டையில் பச்சை குத்தியிருப்பதை நான் பார்த்தேன், அந்த வாக்கியம் கடும்போக்கு குழுக்களுடன் தொடர்புடையது" என்று தெரிவித்தார்.

பட மூலாதாரம்,REUTERS

இதுதொடர்பாக ராணுவத் தலைமைக்குத் தகவல் தெரிவித்து அவர்களுக்குத் தெளிவுபடுத்தியதாகவும் டெரிகோ கெய்தர் கூறினார்.

அமெரிக்க துணை அதிபராகத் தேர்வு செய்யப்பட்டிருக்கும் ஜே.டி.வான்ஸ் ஹெக்சேத்தை ஆதரித்துப் பேசினார்.

"டாட்டூவில் இருந்த அந்த லத்தீன் சொற்றொடர் ஒரு கிறிஸ்தவ பொன்மொழி மட்டுமே. அதைத் தவிர வேறொன்றுமில்லை” என்று கூறினார்.

இதுபோன்ற செய்தியை வெளியிட்டு, ஏபி செய்தி முகமை "வெறுக்கத்தக்க கிறிஸ்தவ எதிர்ப்பு மனநிலையைப்" பரப்புவதாக ஜே.டி.வான்ஸ் குற்றம் சாட்டினார்.

கடந்த 2021ஆம் ஆண்டு அதிபர் ஜோ பைடன் பதவியேற்கும் வரை ஹெக்செத் வாஷிங்டன் டி.சி.யில் அதிகாரியாகப் பணியாற்றத் தடை விதிக்கப்பட்டிருந்தது.

இந்த ஆண்டின் தொடக்கத்தில் வெளியான ஒரு புத்தகத்தில் இதுதொடர்பாகப் பகிர்ந்திருந்த ஹெக்சேத், தனது டாட்டூவால் தான் பணியை இழந்ததாகக் குறிப்பிட்டுள்ளார்.

பட மூலாதாரம்,GETTY IMAGES

அட்டர்னி ஜெனரல் பதவிக்கு டிரம்பின் தேர்வான மாட் கேட்ஸும் சர்ச்சைக்குரிய பிம்பத்தைக் கொண்டுள்ளார்.

அமெரிக்க நாடாளுமன்ற உறுப்பினராக இருந்தபோது அவர் மீது தவறான நடத்தை தொடர்பான குற்றச்சாட்டுகள் முன்வைக்கப்பட்டன.

கடந்த வியாழன் அன்று, அமெரிக்க நீதித்துறையை வழிநடத்த டிரம்ப் அவரின் பெயரைப் பரிந்துரைத்த சில மணிநேரங்களில், மாட் கேட்ஸ் அமெரிக்க பிரதிநிதிகள் அவையில் உள்ள தனது ஃப்ளோரிடா உறுப்பினர் பதவியை ராஜினாமா செய்தார்.

அவர் நாடாளுமன்றத்தில் இருந்து வெளியேறியதன் மூலம் அவர் மீதான சட்டவிரோத போதைப்பொருள் பயன்பாடு, பிரசார நிதியை தவறாகப் பயன்படுத்துதல் போன்ற குற்றச்சாட்டுகள் தொடர்பான காங்கிரஸ் அறிக்கை வெளியிடுவது நிறுத்தப்பட்டது.

பட மூலாதாரம்,GETTY IMAGES

அவையின் சபாநாயகர் மைக் ஜான்சனும் குடியரசுக் கட்சியைச் சேர்ந்தவர்.

கேட்ஸ் அவையில் உறுப்பினராக இல்லாததால் அறிக்கை ரகசியமாக வைக்கப்பட்டுள்ளதாக அவர் வெள்ளிக்கிழமை அன்று தெரிவித்தார். அதைப் பகிரங்கப்படுத்துமாறு உறுப்பினர்கள் கோரிய போதிலும், அது ரகசியமாக வைக்கப்படும் என சபாநாயகர் தெரிவித்தார்.

சில மணிநேரங்களுக்குப் பிறகு, கேட்ஸ் பற்றி `ஹவுஸ் எதிக்ஸ் கமிட்டிக்கு’ (அவையின் நெறிமுறைக் குழு)சாட்சியம் அளித்த இரண்டு பெண்களுக்கான வழக்கறிஞர், விசாரணை அறிக்கையை வெளியிடுமாறு சட்ட வல்லுநர்களிடம் வலியுறுத்தினார்.

வழக்கறிஞர், ஜோ லெப்பார்ட், சிபிஎஸ் நியூஸிடம், தான் பிரதிநிதித்துவப்படுத்தும் பெண் ஒருவர் 2017ஆம் ஆண்டில் ஃப்ளோரிடாவில் கேட்ஸ் ஒரு மைனர் பெண்ணுடன் உடலுறவு கொண்டதைக் கண்டதாகக் கூறினார். எனவே, அவையின் நெறிமுறைக் குழு கேட்ஸ் தொடர்பான அறிக்கையை வெளியிடுமாறு லெப்பார்ட் வலியுறுத்தினார்.

இருப்பினும், கடந்த ஆண்டு நீதித்துறை இதுகுறித்து விசாரணை நடத்தி, கேட்ஸ் மீதான குற்றச்சாட்டுகளைப் பதிவிட மறுத்துவிட்டது. முன்னதாக, ஆர்லாண்டோவில் ஒரு பார்ட்டியில் 17 வயது சிறுமியுடன் உடலுறவு கொண்டதாகக் கூறப்பட்டதையும் கேட்ஸ் மறுத்தார்.

ஃப்ளோரிடாவில் இருந்து நாடாளுமன்ற உறுப்பினராகத் தேர்வு செய்யப்பட்ட 42 வயதான கேட்ஸ், "என்னை அழிக்க பொய்களை ஆயுதமாகப் பயன்படுத்த முயல்கிறார்கள்" என்று எக்ஸ் தளத்தில் வெள்ளிக்கிழமை என்று பதிவிட்டார்.

பட மூலாதாரம்,GETTY IMAGES

சுகாதார செயலாளராக (அமெரிக்க சுகாதாரம் மற்றும் மக்கள் சேவைகள் துறையின் தலைவர்) டிரம்ப் தேர்வு செய்திருக்கும் நபரான ராபர்ட் எஃப். கென்னடி ஜூனியர் மீதும் சர்ச்சையான பிம்பம் உள்ளது.

கென்னடி, ஆர்.எஃப்.கெ ஜூனியர் என்று அறியப்படும் இவர் ஒரு தடுப்பூசி எதிர்ப்பு ஆர்வலர். அமெரிக்க பங்குச் சந்தையில், உலகெங்கிலும் உள்ள தடுப்பூசி தயாரிப்பாளர்கள் மற்றும் சுகாதார நிறுவனங்களின் பங்குகள் வெள்ளிக்கிழமை கடுமையாகச் சரிந்தன.

"பிக் ஃபார்மாவை" (Big Pharma) முறியடிப்பதாக சபதம் செய்த ஒரு நபரை டிரம்ப் சுகாதாரத் துறையில் நியமிக்கத் தேர்வு செய்திருப்பது மருந்து நிறுவனங்களை அதிருப்தியில் ஆழ்த்தியது. இந்த முடிவுக்கு முதலீட்டாளர்கள் எதிர்வினையாற்றினர்.

சுமார் 25,000 உறுப்பினர்களைக் கொண்ட சுகாதார நிபுணர்களைக் கொண்ட அமெரிக்க பொது சுகாதார சங்கத்தின் தலைவர் ஜார்ஜ் சி பெஞ்சமின் பிபிசியிடம், நோய்த்தடுப்பு மருந்துகள் குறித்த கென்னடியின் விமர்சனம் "ஏற்கெனவே நாட்டில் ஆரோக்கியத்தில் பெரும் பாதிப்பை ஏற்படுத்தியுள்ளதாக" கூறினார்.

ஜார்ஜ் சி பெஞ்சமின் மேலும் கூறுகையில், ``சுகாதாரத் துறைக்கு கென்னடி முற்றிலும் தவறான தேர்வு" என்று கூறினார்.

டிரம்ப் இதுவரை தனது தேர்வுகள் குறித்து எழுந்த விமர்சனங்களுக்கு நேரடியாகப் பதிலளிக்கவில்லை.

அதிபராகத் தேர்வு செய்யப்பட்டு சில நாட்கள் கடந்த நிலையில் டிரம்ப் இன்னும் தன் அமைச்சரவையின் முழு பணியிடங்களுக்கும் நியமனங்களைத் தேர்வு செய்யவில்லை. நிதியமைச்சர் மற்றும் எஃப்.பி.ஐ. தலைவர் நியமனம் குறித்து இதுவரை அவர் யாருடைய பெயரையும் அறிவிக்கவில்லை.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/ce3ygqzr0vxo

பட மூலாதாரம்,GETTY IMAGES

ஈலோன் மஸ்க் குறித்து தினமும் ஏதேனும் ஒரு தலைப்புச் செய்தி வருவது என்பது வாடிக்கையான ஒன்றாக மாறிவிட்டது.

எக்ஸ் எனும் சமூக ஊடகத் தளம் (முன்னர் ட்விட்டர்), டெஸ்லா மற்றும் ஸ்பேஸ்எக்ஸ் ஆகிய நிறுவனங்களின் உரிமையாளர், உலகின் நம்பர் 1 பணக்காரர். தனது சமூக ஊடகத் தளத்தை ஒரு கருவியாகப் பயன்படுத்தி, பல தரப்பட்ட தலைப்புகளில் தனக்கு இருக்கும் கருத்துகளை உலகிற்கு தெரியப்படுத்துபவர்.

அவர் தனது நிறுவனமான நியூராலிங்க் மூலம் மனித மூளையில் பொருத்தக்கூடிய சிப் குறித்த சோதனைகளை மேற்கொண்டார். எக்ஸ் தளத்தை ஒரு ‘சூப்பர் ஆப்’-ஆக (Super App) மாற்றுவதில் பெரும் பங்கு வகிக்கிறார். செயற்கை நுண்ணறிவு மனிதகுலத்தின் அழிவுக்கு வழிவகுக்கும் என்று முன்னர் அவர் எச்சரித்த போதிலும், வேகமாக வளர்ந்து வரும் செயற்கை நுண்ணறிவு உலகில் தனது இருப்பை உறுதிப்படுத்த முயற்சி செய்கிறார்.

அமெரிக்க அதிபர் தேர்தலில் (2024) டொனால்ட் டிரம்பின் வெற்றியைத் தொடர்ந்து மஸ்க்கின் அந்தஸ்தும் செல்வமும் இன்னும் உயரும் என்று தெரிகிறது. மஸ்க் இந்தத் தேர்தலில் ஒரு முக்கியமான, ஆனால் அதேசமயம் சர்ச்சைக்குரிய ஒரு வகையில் பங்காற்றினார்.

அமெரிக்க அதிபராக தேர்ந்தெடுக்கப்பட்டுள்ள டிரம்ப், அடுத்து அமையவிருக்கும் தனது நிர்வாகத்திற்காக புதிதாக உருவாக்கப்பட்ட அரசாங்க செயல்திறன் மேம்பாட்டுத் துறையை (Department of Government Efficiency- Doge) வழிநடத்த ஈலோன் மஸ்க்கையே தேர்ந்தெடுத்துள்ளார்.

‘அதிகப்படியான விதிமுறைகள் மற்றும் வீணான செலவுகளைக் குறைக்கவும், கூட்டாட்சி முகமைகளை மறுசீரமைக்கவும்’, அமெரிக்க நிர்வாகத்திற்கு இந்த துறை (Doge) உதவும்’ என்று டிரம்ப் கூறினார்.

இந்த விஷயத்தில் ஈலோன் மஸ்குக்கு ஏற்கனவே அனுபவம் உண்டு, ட்விட்டர் (தற்போது எக்ஸ்) தளத்தை வாங்கிய பிறகு, அவர் பலரை வேலையை விட்டு நீக்கினார்.

பட மூலாதாரம்,GETTY IMAGES

இருபது ஆண்டுகளுக்கு முன்பு ‘சிலிக்கான் பள்ளத்தாக்கு’ உலகிற்குள் நுழைந்ததில் இருந்தே, 53 வயதான ஈலோன் மஸ்க், தனது வணிக செயல்களால் பொதுமக்களை வசீகரித்துள்ளார்.

தென் ஆப்ரிக்காவின் பிரிட்டோரியாவில் பிறந்த ஈலோன் மஸ்க், தனது சகோதரருடன் வீடுவீடாகச் சென்று ‘வீட்டில் தயாரிக்கப்பட்ட சாக்லேட் ஈஸ்டர் முட்டைகளை’ விற்றவர். 12 வயதில் தனது முதல் கணினி விளையாட்டை உருவாக்கினார்.

அவரது பெற்றோரின் விவாகரத்து, பள்ளியில் பிற மாணவர்களால் வம்புக்கு இழுக்கப்பட்டது (Bullying), ஆஸ்பெர்கர் சிண்ட்ரோம் (Asperger Syndrom) காரணமாக சமூகத்தில் தனது உணர்வுகளை வெளிப்படுத்துவதில் இருந்த சிரமம், என தான் குழந்தைப் பருவத்தில் மிகவும் கஷ்டப்பட்டதாக அவர் விவரித்தார்.

அவர் இளம் பருவத்தில், கல்லூரி படிப்பிற்காக வீட்டை விட்டு வெளியேறி, கனடாவிற்கும் பின்னர் அமெரிக்காவிற்கும் சென்றார். அங்கு அவர் பென்சில்வேனியா பல்கலைக் கழகத்தில் பொருளாதாரம் மற்றும் இயற்பியல் படித்தார்.

2010-ம் ஆண்டு மேரி கிளேர் என்ற இதழில் எழுதிய கட்டுரையில், “பணக்காரராக ஆவதற்கு முன்பே, ‘இல்லை’ எனும் பதிலை ஏற்றுக்கொள்ள மறுக்கும் மனிதராகவே மஸ்க் இருந்தார்” என்று அவரது முதல் மனைவி ஜஸ்டின் மஸ்க் குறிப்பிட்டுள்ளார். கல்லூரியில் படித்த போது இவரை சந்தித்து காதல் வயப்பட்ட ஈலோன் மஸ்க், 2000-வது ஆண்டில் திருமணம் செய்து கொண்டார்.

"போட்டி மனப்பான்மையும் ஆதிக்கம் செலுத்த வேண்டும் என்ற ஆர்வமும் தான் வணிகத்தில் அவர் மிகப்பெரிய வெற்றி பெற காரணம். தனிப்பட்ட வாழ்க்கையிலும் அப்படித்தான். எங்களது திருமண நிகழ்வில் நடனமாடும் போது கூட ‘இந்த உறவில் நான்தான் ஆல்பா’ (Alpha- அதிகாரம் செலுத்தக் கூடியவர்) என அவர் என்னிடம் கூறினார்" என்று ஜஸ்டின் நினைவுகூர்ந்தார்.

பட மூலாதாரம்,GETTY IMAGES

ஸ்டான்போர்டு பல்கலைக் கழகத்தில் இயற்பியல் பட்டப்படிப்பு படிக்க கிடைத்த வாய்ப்பை ஏற்றுக்கொண்ட ஈலோன் மஸ்க், குறுகிய காலத்திலேயே அங்கிருந்து வெளியேறினார். பிறகு 1990களில் இணையம் தொடர்பான நிறுவனங்களின் வளர்ச்சியின் (Dotcom Boom) போது இரண்டு தொழில்நுட்ப ஸ்டார்ட்-அப்களை நிறுவினார்.

இவற்றில் ஒன்று வலை மென்பொருள் நிறுவனம், மற்றொன்று ஆன்லைன் நிதி நிறுவனம். அந்த நிதி நிறுவனம் தான் PayPal என்றானது. பின்னர் இது 2002இல் ஈபேக்கு (eBay) நிறுவனத்திற்கு 1.5 பில்லியன் அமெரிக்க டாலர்களுக்கு விற்கப்பட்டது.

அவர் தனது பணத்தை ஒரு புதிய ராக்கெட் நிறுவனமான ஸ்பேஸ்எக்ஸ்-இல் முதலீடு செய்தார். குறைவான செலவை முதன்மையாகக் கொண்டு, நாசாவுக்கு மாற்றாக ஸ்பேஸ்எக்ஸ் நிறுவனத்தை எடுத்துச் செல்வதே அவரது லட்சியமாக இருந்தது.

ஒரு புதிய மின்சார கார் நிறுவனமான டெஸ்லாவிலும் தனது பணத்தை முதலீடு செய்தார், 2008இல் அதன் தலைமை நிர்வாகியாக பொறுப்பேற்றார்.

இரண்டு நிறுவனங்களும் சில சமயங்களில் நிதிச் சரிவை சந்தித்த போதும், தங்கள் தொழில்களை மேம்படுத்தியதற்காக பெயர்போனவை.

அவரது மிக சமீபத்திய வணிக முயற்சிகளில், அக்டோபர் 2022இல் சமூக ஊடக தளமான ட்விட்டரை (தற்போது எக்ஸ்) கையகப்படுத்தியதும் அடங்கும்.

தளத்தின் பாதுகாப்பை உறுதிப்படுத்தும் குழுவின் ஊழியர் எண்ணிக்கையை குறைத்தது உட்பட, அவர் மேற்கொண்ட ட்விட்டர் நிறுவனத்தின் ஆட்குறைப்பு நடவடிக்கைகள் சர்ச்சையை கிளப்பின. பிறகு நிறுவனத்திற்கு ‘எக்ஸ்’ (X) என புதிய பெயரிட்டார். புதிய பிரீமியம் சந்தாக்கள் அறிமுகப்படுத்தப்பட்டன, அதாவது வருமானத்திற்காக விளம்பரத்தை மட்டுமே நம்பியிருக்காது அந்த தளம் என்பதை அவர் உறுதிப்படுத்தினார்.

மஸ்க்கின் நீண்ட கால லட்சியம் எக்ஸ் தளத்தை பலவிதமான சேவைகளை வழங்கும் ஒரு ‘சூப்பர் ஆப்’-ஆக (Super App) மாற்ற வேண்டும் என்பது தான். இருப்பினும், இதுவரை நிறுவனத்தின் மதிப்பு அவர் முதலீடு செய்த 44 பில்லியன் டாலர்களிலிருந்து வெறும் 19 பில்லியன் டாலர்களாக சரிந்துள்ளது என்று அறிக்கைகள் தெரிவிக்கின்றன.

பட மூலாதாரம்,GETTY IMAGES

அவர் செயற்கை நுண்ணறிவு (ஏஐ) துறையிலும் பல லட்சியங்களைக் கொண்டுள்ளார். ChatGPTஇன் தாய் நிறுவனமான ஓபன் ஏஐ (OpenAI) நிறுவனத்தின் ஆரம்பகால முதலீட்டாளராக மஸ்க் இருந்தார். பிறகு 2023இல் ‘பிரபஞ்சத்தின் உண்மையான தன்மையைப் புரிந்துகொள்ளும்’ நோக்கத்தில், ‘xAI’ எனும் தனது சொந்த செயற்கை நுண்ணறிவு நிறுவனத்தை தொடங்கினார்.

மஸ்க் கடந்த பிப்ரவரி மாதத்தில், OpenAI நிறுவனம் மற்றும் அதன் உரிமையாளர் சாம் ஆல்ட்மேன் மீது வழக்குத் தொடர்ந்தார். தனது உதவியால் உருவான அந்த நிறுவனம், மைக்ரோசாஃப்டில் இணைந்ததன் மூலம் அதன் இலாப நோக்கற்ற தன்மைகளை கைவிட்டதாக அவர் கூறினார்.

"அவர், நாளை என்ன செய்ய வேண்டும் என்பதை முன்பே திட்டமிடக் கூடிய ஒரு நபர் கிடையாது என்பது என் கருத்து. அவர் தனது உள்ளுணர்வுகளைப் பின்பற்றி நடப்பவர்" என்று பத்திரிகையாளர் கிறிஸ் ஸ்டோகல்-வாக்கர் கூறுகிறார்.

எழுத்தாளர் ஆஷ்லீ வான்ஸ், 2015ஆம் ஆண்டு, ஒரு சுயசரிதையில், “‘அதிக ஈகோ’ மற்றும் எனக்கு எல்லாம் தெரியும் என்ற எண்ணம் கொண்டவர்” என்று மஸ்க்கை வர்ணித்தார். அதேசமயம், மஸ்க் ஒரு மோசமான நடனக் கலைஞர் மற்றும் பொது மேடையில் பேசுவதில் ஒரு வித்தியாசமான அணுகுமுறையைக் கொண்டவர் என்றும் விவரித்தார்.

பிரிட்டிஷ் நடிகை தலுலா ரிலே என்பவரிடமிருந்து இரண்டு முறை விவாகரத்து பெற்றது உட்பட அவர் பெற்ற மூன்று விவாகரத்துகள் குறித்தும், தனது தவறுகள் பற்றியும் ஈலோன் மஸ்க் வெளிப்படையாக பேசியுள்ளார்.

"எனது பாவங்களை நீங்கள் பட்டியலிட்டால், நான் பூமியின் மிக மோசமான நபரைப் போல தெரிவேன். ஆனால் நான் சரியாகச் செய்த விஷயங்களோடு ஒப்பிட்டால், அந்தத் தவறுகளுக்கு பின்னால் உள்ள அர்த்தம் புரியும்." என்று மஸ்க் 2022இல் ஒரு (TED) நேர்காணலில் கூறினார்.

பட மூலாதாரம்,GETTY IMAGES

இந்த முரண்பாடுகள் அனைத்தும் மஸ்க்கின் குணாதிசயத்தின் ஒரு பகுதியாகத் தோன்றுகின்றன. அது நிச்சயமாக செல்வத்தைக் குவிப்பதிலிருந்து அவரைத் தடுக்கவில்லை.

உலக கோடீஸ்வரர்களின் செல்வத்தைக் குறித்த தகவல்களை சேகரிக்கும் ப்ளூம்பெர்க்கின் குறியீட்டின்படி, மஸ்க் தான் உலகின் மிகப்பெரும் பணக்காரர் ஆவார்.

அவரது தற்போதைய நிகர மதிப்பு சுமார் 290 பில்லியன் அமெரிக்க டாலர் (இந்திய மதிப்பில் சுமார் 24.5 லட்சம் கோடி ரூபாய்) என்று மதிப்பிடப்பட்டுள்ளது. டிரம்பின் தேர்தல் வெற்றியைத் தொடர்ந்து டெஸ்லாவின் பங்கு விலையுடன் அவரது செல்வமும் உயர்ந்தது.

இது பெரும்பாலும் டெஸ்லாவில் உள்ள அவரது பங்குகளின் மதிப்பை அடிப்படையாகக் கொண்டது, அந்த நிறுவனத்தில் அவர் 13%க்கும் அதிகமான பங்குகளை வைத்திருக்கிறார். நிறுவனத்தின் உற்பத்தி அதிகரித்து, தொடர்ச்சியான லாபத்தை வழங்கத் தொடங்கியதால், 2020ஆம் ஆண்டில் நிறுவனத்தின் பங்கு மதிப்பு உயர்ந்தது (சிலர் நியாயமற்ற முறையில் என்று கூறுகிறார்கள்).

ஆனால் 2022ஆம் ஆண்டின் இறுதியில் பங்குகள் சரிந்தன, சிலர் இந்த வீழ்ச்சிக்கு ‘ட்விட்டர்’ நிறுவனத்தை மஸ்க் கைப்பற்றியது தான் காரணம் என குற்றம் சாட்டினர். இருப்பினும் டெஸ்லாவின் பங்குகள் பின்னர் சரிவிலிருந்து மீண்டன.

ஈலோன் மஸ்க் டிஜிட்டல் நாணயங்கள் பக்கமும் தன் கவனத்தைச் செலுத்துகிறார். சுரங்கப்பாதைகள் கட்டமைக்கும் நிறுவனமான ‘தி போரிங் கம்பெனி’ மற்றும் மனித மூளை குறித்த தொழில்நுட்ப ஆய்வுகளை செய்யும் நியூராலிங்க் உள்ளிட்ட பல சிறிய நிறுவனங்களில் முதலீடு செய்துள்ளார்.

ஈலோன் மஸ்க், தான் வெறுமனே பணம் சம்பாதிப்பதற்காக வணிகத்தில் ஈடுபடவில்லை என்று அடிக்கடி கூறி வருகிறார். சமீபத்தில் ட்விட்டர் கையகப்படுத்திய போதும் இதை அவர் மீண்டும் தெரிவித்தார்.

"சமூக நலன் அல்லது மனிதநேயம் போன்ற சில காரணங்களின் அடிப்படையில், அந்த வணிகங்கள் மிக முக்கியமானவை என்று உணர்ந்தால் மட்டுமே ஈலோன் மஸ்க் அவற்றில் ஈடுபடுகிறார்." என்று அவரின் நண்பரும் டெஸ்லா முதலீட்டாளருமான ரோஸ் கெர்பர் கூறுகிறார்.

பட மூலாதாரம்,GETTY IMAGES

மஸ்க், 2002ஆம் ஆண்டில் அமெரிக்க குடியுரிமை பெற்றார். தன் மீது அரசியலை முத்திரை குத்தும் முயற்சிகளை அவர் நீண்ட காலமாகவே எதிர்த்து வந்தார். தன்னை “‘ஒரு பாதி ஜனநாயகவாதி’ (Half Democrat), ‘பாதி குடியரசுக் கட்சிக் ஆதரவாளர்’ (half-Republican)”, ‘அரசியல் ரீதியாக மிதமான கொள்கை உடையவன்’ மற்றும் ‘சுயாதீனமானவன்’ என்று விவரித்தார்.

பராக் ஒபாமா, ஹிலாரி கிளிண்டன் மற்றும் ஜோ பைடனுக்கு வாக்களித்ததாக அவர் கூறினார், அவர்கள் அனைவரும் ஜனநாயகக் கட்சியினர் என்பது குறிப்பிடத்தக்கது.

ஆனால் சமீபத்திய ஆண்டுகளில் அவர் குடியரசுக் கட்சியைச் சேர்ந்த டொனால்ட் டிரம்ப் பக்கம் சாய்ந்தார். 2024இல் டிரம்ப் மீது நடத்தப்பட்ட படுகொலை முயற்சிக்குப் பிறகு, அவருக்கு மஸ்க் அதிகாரப்பூர்வமாக ஆதரவு அளித்தார். டிரம்பின் பிரசாரத்தின் முன்னணி ஆதரவாளராகவும், அதில் செல்வாக்கு செலுத்துபவர்களில் ஒருவராகவும் மாறினார்.

பொருளாதாரம், குடியேற்றம் மற்றும் துப்பாக்கி கட்டுப்பாடு உட்பட பல பிரச்னைகளில் ஜனநாயகக் கட்சியின் நிலைப்பாட்டை அவர் விமர்சித்தார்.

ஜனநாயகக் கட்சியின் ஆட்சி மீண்டும் அமைந்தால் அமெரிக்க அரசியலமைப்பின் முதல் திருத்தத்தில் பொறிக்கப்பட்டுள்ள ‘பேச்சு சுதந்திரம்’ என்பது அச்சுறுத்தலுக்கு உள்ளாகும் என்றும் மஸ்க் மீண்டும் மீண்டும் கூறினார்.

பட மூலாதாரம்,GETTY IMAGES

தேர்தலுக்கு முன்னதாக அவர் பல குடியரசுக் கட்சி பேரணிகளில் தோன்றினார். டிரம்பை மீண்டும் அதிபராக தேர்ந்தெடுக்க உதவும் ‘ஒரு அரசியல் நடவடிக்கைக் குழுவுக்கு’ நிதியளிக்க மில்லியன்கணக்கான டாலர்களைத் திரட்டினார். மேலும் எக்ஸ் தளத்தில் தொடர்ச்சியான பதிவுகள் மூலம் டிரம்புக்கு ஆதரவாக அடிக்கடி குரல் கொடுத்தார்.

ஈலோன் மஸ்க்கின் ‘அமெரிக்கா சூப்பர் பிஏசி’ எனும் அரசியல் நடவடிக்கைக் குழு, தேர்தல் பிரசாரத்தின் இறுதி வாரங்களில் முடிவைத் தீர்மானிக்கும் ‘ஸ்விங்’ மாகாணங்களில் வாக்காளர்களுக்கு சர்ச்சைக்குரிய வகையில் ‘1 மில்லியன் டாலர்’ நன்கொடையை வழங்கியது.

ஆனாலும் இது அவரது முதல் அரசியல் சர்ச்சையுடன் ஒப்பிடும் போது, பெரிய விஷயமில்லை.

பிரிட்டனில், ஆகஸ்ட் மாதத்தில் வன்முறை போராட்டங்கள் நடைபெற்ற போது, “பிரிட்டன் ‘உள்நாட்டுப் போரின்’ விளிம்பில் இருப்பதாக அவர் கூறியது உட்பட, உலகெங்கிலும் உள்ள நாடுகள் எதிர்கொள்ளும் பிரச்னைகள் குறித்து எக்ஸ் தளத்தில் சர்ச்சைக்குரிய கருத்துகளை அவர் பகிர்ந்தார்.

மஸ்க் தனது ஸ்டார்லிங்க் செயற்கைக்கோள் இணைய சேவையை யுக்ரேனுக்கு வழங்கியிருந்தாலும் கூட, ரஷ்ய கடற்படையின் ஒரு பெரிய பிரிவிற்கு தாயகமாக இருக்கும் செவஸ்டபோலில் ஸ்டார்லிங்கை செயல்படுத்துவதற்கான அவசர கோரிக்கையை யுக்ரேன் விடுத்த போது, அதை அவர் நிராகரித்தார். இது விமர்சனங்களை எழுப்பியது

அமெரிக்காவில், கலிபோர்னியாவின் விதிமுறைகள் மற்றும் அதிக வரிகள் குறித்து புகார் தெரிவித்த மஸ்க், டெக்சாஸுக்கு குடிபெயர்ந்தார். அவருக்கு தொழிற்சங்க அமைப்பாளர்களுடன் மோதல் ஏற்பட்டது. பிறகு 2020இல், கொரோனா பெருந்தொற்று ஊரடங்குகளை ‘பாசிச நடவடிக்கைகள்’ என்று கண்டித்தார்.

டெஸ்லா நிறுவனம் காலநிலை மாற்றம் போன்ற முக்கிய மனித குல பிரச்னைகளைத் தீர்ப்பதில் கவனம் செலுத்துவதால், தனது வணிகங்களை ஒரு மனிதநேய நோக்கத்துடனே அணுகுவதாக அவர் கூறியுள்ளார்.

பட மூலாதாரம்,GETTY IMAGES

செயற்கை நுண்ணறிவு துறையில் அவருக்கு பெரும் ஆர்வம் உள்ள போதிலும், அதிபுத்திசாலித்தனமான ஏஐ தொழில்நுட்பங்கள் மனித குலத்தின் எதிர்காலத்திற்கு அச்சுறுத்தலாக இருப்பது குறித்து கவலை தெரிவிக்கும் மிக முக்கியமான நபர்களில் ஒருவராகவும் அவர் உள்ளார்.

செயற்கை நுண்ணறிவின் வளர்ச்சி மற்றும் குறைந்து வரும் பிறப்பு விகிதம் ஆகியவற்றைக் குறிப்பிட்டு, எதிர்காலத்தில் உலகில் ‘போதுமான மக்கள்’ இல்லாமல் போகக் கூடும் என்று அவர் கூறியுள்ளார்.

ஈலோன் மஸ்க்கிற்கு, அவரது முதல் மனைவி மூலமாக ஆறு குழந்தைகளும், கனடிய பாடகி கிரிம்ஸ் மூலமாக மூன்று குழந்தைகளும், ஷிவோன் ஜிலிஸ் மூலமாக மூன்று குழந்தைகளும் என 12 பிள்ளைகள் உள்ளனர்.

ஜிலிஸ் மூலமாக அவருக்கு இரட்டையர்கள் பிறந்ததைத் தொடர்ந்து, "மக்கள் தொகை குறைந்து வருவதைத் தடுக்க, என்னால் முடிந்த அனைத்தையும் செய்கிறேன்." என்று மஸ்க் ட்வீட் செய்திருந்தார்.

லிவ் மக்மோஹன் தந்த கூடுதல் விவரங்கள் கட்டுரையில் சேர்க்கப்பட்டுள்ளன.

- இது, பிபிசிக்காக கலெக்டிவ் நியூஸ்ரூம் வெளியீடு.

https://www.bbc.com/tamil/articles/cgmv4ldj23do

பட மூலாதாரம்,GETTY IMAGES

சௌதி அரேபியாவும் மற்றும் ஐக்கிய அரபு எமிரேட்ஸும் இரானுடனான மோதல் போக்கை குறைக்க வேண்டும் என விரும்புகின்றன.

அமெரிக்கா - இரானுடனான உறவுகளை மேம்படுத்த புதிதாக தேர்ந்தெடுக்கப்பட்ட அமெரிக்க அதிபர் டொனால்ட் டிரம்பை சமாதானப்படுத்தப்படுத்த முடியும் என்றும் அவர்கள் நம்புகின்றனர்.

இரானுடனான சௌதி அரேபியாவின் உறவு பதற்றமாகவே உள்ளது. ஆனால் அரபு நாடுகள், டிரம்ப் தனது இரண்டாவது முறை பதவிக்காலத்தில் இரான் மீது சுமூகமான போக்கை கொண்டிருக்க வேண்டும் என்றும், காஸா மற்றும் லெபனானில் நடந்து வரும் ராணுவ நடவடிக்கையை முடிவுக்கு கொண்டுவர இஸ்ரேலுக்கு அழுத்தம் கொடுக்க வேண்டும் என்றும் விரும்புகின்றன.

இரானுக்கும் சௌதி அரேபியாவுக்கும் இடையே நீண்ட காலமாக கருத்து வேறுபாடுகள் உள்ளன. ஆனால், கடந்த ஆண்டு சீனா மத்தியஸ்தம் செய்த பிறகு, இரான் மீதான சௌதி அரேபியாவின் அணுகுமுறை மாறிவிட்டது.

இரானுக்கு எதிரான தனது நிலைப்பாட்டை அமெரிக்கா சுமூகமாக்க வேண்டும் என்று சௌதி அரேபியா விரும்புகிறது.

சௌதி அரேபியா தலைநகர் ரியாத்தில் செவ்வாய்கிழமை நடைபெற்ற அரபு இஸ்லாமிய நாடுகளின் உச்சி மாநாட்டில், இரான் மீதான இஸ்ரேலின் ஏவுகணை தாக்குதல் குறித்து பட்டத்து இளவரசர் முகமது பின் சல்மான் விமர்சித்து பேசியுள்ளார்.

இரானின் இறையாண்மை மதிக்கப்பட வேண்டும் என்று சௌதி அரேபியாவின் பட்டத்து இளவரசர் கூறினார்.

டிரம்ப் தனது கடந்த பதவிக்காலத்தில் இரானுடனான அணுசக்தி ஒப்பந்தத்தை முடித்துக் கொண்டார், மேலும் அதன் மீது பல தடைகளையும் விதித்தார்.

சமீபத்தில், ஹெஸ்பொலா மற்றும் ஹமாஸ் இயக்கத்தின் முக்கிய தலைவர்கள் இஸ்ரேலிய தாக்குதலில் இறந்ததை அடுத்து இஸ்ரேலுக்கும் இரானுக்கும் இடையே பதற்றம் அதிகரித்துள்ளது. இருவரும் ஒருவர் மீது ஒருவர் ஏவுகணைத் தாக்குதலை நடத்தியுள்ளனர்.

திங்கட்கிழமையன்று அபுதாபியில் நடைபெற்ற மாநாட்டில், ஐக்கிய அரபு எமிரேட்ஸ் அதிபரின் ஆலோசகர் அன்வர் கர்காஷ் கூறும் போது, “டிரம்ப் நிர்வாகத்துடன் ஒரு முழுமையான அணுகுமுறையை கட்டமைக்க வேண்டிய அவசியம் உள்ளது” என்றார்.

2017-ல் டிரம்ப் அதிகாரத்திற்கு வரும் போது கவலையில்லாமல் இருந்த சௌதி அரேபியாவும், ஐக்கிய அரபு எமிரேட்ஸும் தற்போது எச்சரிக்கையுடன் இருப்பதாக பார்க்கப்படுகிறது.

உறுதியற்ற தன்மை, உலகளாவிய விவகாரங்களில் ஒதுக்கப்படுவது போன்ற அமெரிக்காவின் கொள்கைகள் குறித்த அச்சங்கள் அரபு நாடுகளிலும் அதிகரித்துள்ளது.

2018-ம் ஆண்டு, இரானுடனான அணுசக்தி ஒப்பந்தத்தை டிரம்ப் முறித்துக் கொண்டபோது, சௌதி அரேபியாவும் ஐக்கிய அரபு எமிரேட்ஸும் மகிழ்ச்சியை வெளிப்படுத்தின.

அணுசக்தி ஒப்பந்தத்தை முறித்துக் கொண்ட பிறகு இரான் மீது கடுமையான பொருளாதாரத் தடைகளை விதித்தார் டிரம்ப்.

ஆனால், இந்த முறை இரானுக்கு எதிராக டிரம்ப் எடுக்க நினைக்கும் கடுமையான நிலைப்பாட்டை சௌதியும் ஐக்கிய அரபு எமிரேட்ஸும் ஒப்புக்கொண்டதாகத் தெரியவில்லை.

பட மூலாதாரம்,GETTY IMAGES

ஐநாவுக்கான அமெரிக்க தூதராக எலைஸ் ஸ்டெஃபானிக்-கை டொனால்ட் டிரம்ப் நியமித்துள்ளார்.

இரானுக்கு அதிகபட்ச அழுத்தத்தை கொடுக்கும் பிரசாரத்திற்கு அமெரிக்கா தயாராக இருப்பதாக எலைஸ் ஸ்டெஃபானிக், எக்ஸ் தள பதிவில் தெரிவித்துள்ளார்.

மேலும், அவர், "நீண்ட காலமாக, பைடன்- ஹாரிஸ் நிர்வாகத்தின் பலவீனம் காரணமாக எங்கள் எதிரிகள் தைரியமாகிவிட்டனர். அதிபர் டிரம்ப் திரும்பிய உடன், வலிமை மூலம் அமைதி திரும்பியுள்ளது” என்று குறிப்பிட்டுள்ளார்.

இஸ்ரேல் தொடர்பாக டிரம்ப் மீது அரபு நாடுகள் அழுத்தம் கொடுக்க முயற்சித்தாலும், அது டிரம்பிற்கு எந்த பாதிப்பையும் ஏற்படுத்துவதாக தெரியவில்லை.

இஸ்ரேலுக்கான அமெரிக்க தூதராக ஆகன்சா மாகாணத்தின் ஆளுநர் மைக் ஹக்கபீ-யை நியமிப்பதாக அறிவித்ததன் மூலம், இஸ்ரேல் தொடர்பான தனது நிலைப்பாடு என்னவாக இருக்கும் என்பதை டிரம்ப் சுட்டிக்காட்டியுள்ளார்.

டிரம்ப் கடந்த முறை அதிபராக இருந்த காலத்தில் இஸ்ரேலுக்கு முழு ஆதரவை அளித்தார்.

டொனால்ட் டிரம்ப் அதிபர் தேர்தலில் வெற்றி பெற்ற உடனேயே இந்த மாநாட்டை அரபு மற்றும் இஸ்லாமிய நாடுகள் ஏற்பாடு செய்திருக்கிறது.

இதன் மூலம், காஸா மற்றும் லெபனானில் நடக்கும் பிரச்னைகளை விரைவில் நிறுத்துமாறு இஸ்ரேலுக்கு அறிவுறுத்த அமெரிக்கா மீது அழுத்தம் கொடுக்க விரும்புகின்றன.

பட மூலாதாரம்,GETTY IMAGES

ஹக்கபீ இஸ்ரேலின் தீவிர ஆதரவாளர். ஆக்கிரமிக்கப்பட்ட மேற்குக் கரையில் யூத குடியிருப்புகள் நிறுவப்படுவதை அவர் ஆதரிக்கிறார்.

காஸா மற்றும் லெபனான் மீது நடக்கும் இஸ்ரேலிய நடவடிக்கைகள் மற்றும் மத்திய கிழக்கில் அமைதியை மீட்டெடுப்பது குறித்து டிரம்ப் என்ன செய்ய முடியும் என்பதற்கு இது ஒரு அறிகுறியாகும்.

ஹக்கபீயின் நியமனத்தை தனது ட்ரூத் சமூக ஊடக தள பதிவில் அறிவித்த டிரம்ப், "அவர் (ஹக்கபீ) இஸ்ரேலையும் இஸ்ரேலிய மக்களையும் நேசிக்கிறார். இஸ்ரேலியர்கள் அவரை நேசிக்கின்றனர். மத்திய கிழக்கில் அமைதியை ஏற்படுத்த மைக் ஹக்கபீ அயராது உழைப்பார்” என்று குறிப்பிட்டார்.

இஸ்ரேலின் ஆதரவாளரும், கிறிஸ்தவ மதத்தைச் சார்ந்தவருமான ஹக்கபீ, 2008-ம் ஆண்டுக்குப் பிறகு இஸ்ரேலுக்கான முதல் யூதர் அல்லாத அமெரிக்கத் தூதராக இருப்பார்.

2008-ல் அப்போதைய அமெரிக்க அதிபர் ஜார்ஜ் டபிள்யூ புஷ், இஸ்ரேலுக்கான அமெரிக்க தூதராக யூதர் அல்லாத ஜேம்ஸ் கன்னிங்காமை நியமித்தார்.

பட மூலாதாரம்,GETTY IMAGES

2025 ஜனவரியில் டிரம்ப் ஆட்சி பொறுப்பை கையிலெடுப்பதற்கு முன்பே ஆக்கிரமிக்கப்பட்ட மேற்குக் கரையை நாட்டுடன் இணைக்க வேண்டிய ஆயத்தப் பணிகளைத் தொடங்குமாறு இஸ்ரேலின் தீவிர வலதுசாரி தலைவரும் நிதி அமைச்சருமான பெசலெல் ஸ்மோட்ரிச் இரண்டு நாட்களுக்கு முன்பு கூறியிருந்தார்.

“2025 - ஜுடியா மற்றும் சமாரியாவில் இறையாண்மை ஆண்டு” என ஸ்மோட்ரிச் எக்ஸ் தளத்தில் பதிவிட்டார்.

(Judea and Samaria = மேற்குக் கரைப் பகுதியைக் குறிக்க பைபிளில் பயன்படுத்தப்பட்ட பெயர்கள்.)

திங்களன்று நடைபெற்ற தீவிர வலதுசாரி நாடாளுமன்ற உறுப்பினர்கள் கூட்டத்தில் டிரம்பின் தேர்தல் வெற்றியை வரவேற்று பேசினார் ஸ்மோட்ரிச்.

மேலும், இஸ்ரேலுடன் பகுதிகளை இணைப்பதற்கான கள ஆய்வுகளை தயாரிக்கத் தொடங்குமாறு அதிகாரிகளிடம் அறிவுறுத்தியுள்ளார்.

டிரம்ப் தனது கடந்த கால பதவிக்காலத்தில் தைரியத்தையும் உறுதியையும் வெளிப்படுத்தியதைப் போலவே, தனது இரண்டாவது பதவிக்காலத்திலும் இஸ்ரேலின் நடவடிக்கையை ஆதரிப்பார் என்பதில் சந்தேகமில்லை என்று ஸ்மோட்ரிச் கூறினார்.

டிரம்ப் தனது கடந்த பதவிக்காலத்தில், ஜெருசலேமை இஸ்ரேலின் தலைநகராக அங்கீகரித்து, அமெரிக்க தூதரகத்தை இஸ்ரேலின் டெல் அவீவ் நகரில் இருந்து ஜெருசலேமிற்கு மாற்றினார்.

கோலான் குன்றை இஸ்ரேல் ஆக்கிரமித்ததையும் அவர் அங்கீகரித்தார். இது இஸ்லாமிய நாடுகளை கோபப்படுத்தியது.

ஆக்கிரமிக்கப்பட்ட மேற்குக் கரைப் பகுதிகளை இஸ்ரேலுடன் இணைப்பது குறித்த ஸ்மோட்ரிச்சின் கருத்துக்கு ஒரு நாள் கழித்து, டிரம்ப் மைக் ஹக்கபீ-யை இஸ்ரேலுக்கான அமெரிக்க தூதராக நியமித்திருக்கிறார். இதன் மூலம் தனது எண்ணத்தை வெளிப்படுத்தியிருக்கிறார் டிரம்ப். இதிலிருந்து இஸ்ரேலுக்கான அவரின் ஆதரவு பழையபடி தொடரும் என்று தெரிகிறது.

மேற்குக்கரை இணைப்பு தொடர்பாக இஸ்ரேல் நிதியமைச்சர் தெரிவித்த கருத்துக்கு கத்தார் எதிர்ப்பு தெரிவித்துள்ளது.

ஸ்மோட்ரிச் கருத்துக்கு எதிராக கத்தார் வெளியுறவு அமைச்சகம் வெளியிட்டுள்ள அறிக்கையில், “ஆக்கிரமிக்கப்பட்ட மேற்குக் கரையை இணைக்க தேவையான உள்கட்டமைப்புகளை தயார் செய்யுமாறு உத்தரவிட்டுள்ள இஸ்ரேலிய நிதியமைச்சரின் கருத்தை கத்தார் வன்மையாகக் கண்டிக்கிறது. இது சர்வதேச சட்டம் மற்றும் ஐக்கிய நாடுகளின் பாதுகாப்பு கவுன்சில் தீர்மானம் 2334 ஆகியவற்றின் அப்பட்டமான மீறலாகும். இது இந்த பகுதியில் அமைதிக்கான வாய்ப்புகளை கடுமையாக பாதிக்கலாம்.” என்று குறிப்பிட்டுள்ளது.

பட மூலாதாரம்,GE

ஆக்கிரமிக்கப்பட்ட மேற்குக் கரையில் இஸ்ரேலின் இறையாண்மை குறித்து பேசிய இஸ்ரேல் அமைச்சரின் கருத்துக்கு சௌதி அரேபியாவின் வெளியுறவு அமைச்சகம் கடும் கண்டனம் தெரிவித்துள்ளது.

இதுபோன்றகருத்துக்கள், இரு நாடுகளுக்கும் இடையே சமரச தீர்வுகளை அமல்படுத்தி அமைதியை நிலைநாட்டும் மற்ற முயற்சிகளை பலவீனப்படுத்துவதாக சௌதி அரேபியாவின் வெளியுறவு அமைச்சகம் தெரிவித்துள்ளது.

டிரம்பின் கடந்த பதவிக் காலத்தில், அரபு உலகம் முற்றிலும் மாறுபட்ட சூழ்நிலையில் இருந்தது. ஆனால், அவரது இரண்டாவது பதவிக்காலத்தில், விஷயங்கள் வேகமாக மாறிவிட்டன. டிரம்ப் தனது கடந்த பதவிக்காலத்தில் மேற்கொண்ட முதல் வெளிநாட்டுப் பயணம் சௌதி அரேபியா. அந்தப் பயணம் அவரது முன்னுரிமைகள் என்ன என்பதை சுட்டிக்காட்டியது.

ஆனால், இப்போது அரபு நாடுகள் தங்கள் முன்னுரிமைகளை தீர்மானிக்கின்றன, இவை டிரம்பின் முன்னுரிமைகளுடன் முரண்படலாம்.

ரியாத்தில் நடந்த அரபு இஸ்லாமிய நாடுகளின் மாநாடு இந்த முயற்சிக்கு சான்றாக கருதப்படுகிறது.

https://www.bbc.com/tamil/articles/c206dp4n73vo

பட மூலாதாரம்,GETTY IMAGES

அமெரிக்க அதிபர் தேர்தலில் டொனால்ட் டிரம்பின் வெற்றிக்குப் பிறகு, பிட்காயின் எனும் இணைய நாணயம் (கிரிப்டோகரன்சி) 90,000 அமெரிக்க டாலர்களைத் தாண்டி விற்பனையாகி வருகிறது.

அதிபர் தேர்தல் பிரசாரத்தின் போது டொனால்ட் டிரம்ப் அமெரிக்காவை உலகின் ‘கிரிப்டோ தலைநகராக’ உருவாக்குவதாக உறுதியளித்திருந்தார்.

உலகின் மிகப்பெரிய கிரிப்டோகரன்சியான பிட்காயினின் விலை, இந்த வருடம் 80%-க்கு மேல் உயர்ந்துள்ளது.

பிட்காயின் மட்டுமின்றி இதரக் கிரிப்டோகரன்சியான டோஜ்காயினும் (Dogecoin) டிரம்பின் ஆதரவாளரான ஈலோன் மஸ்க் ஊக்குவித்ததால் அபரிவிதமான வளர்ச்சியைக் கண்டுள்ளது.

2021-ஆம் ஆண்டு ஜோ பைடன் தலைமையிலான அரசு, பத்திரங்கள் மற்றும் பரிவர்த்தனை ஆணையத்தின் தலைவராக கேரி ஜென்ஸ்லரை நியமித்திருந்தது, இவர் கிரிப்டோ சந்தையின் பின்னணியைத் தகர்க்க வேலை செய்தவர்.

ஸ்டோன்எக்ஸ் நிதி நிறுவனத்தின் சந்தை ஆய்வாளர் மேட் சிம்ப்சன் பிபிசி-யிடம், டிரம்ப் தலைமையிலான அரசு கிரிப்டோகரன்சி மீதான கட்டுப்பாட்டை மாற்றினால், பிட்காயினின் விலை 1 லட்சம் அமெரிக்க டாலர்களைத் தாண்டக் கூடும் எனக் கூறினார். (இந்திய மதிப்பில் சுமார் ரூ.85 லட்சம்)

இது இவ்வாறிருக்க, கிரிப்டோகரன்சி என்றால் என்ன? அதை எப்படி வாங்குவது? அதற்கு வரி விதிக்கப்படுமா?

இதுபோன்ற கேள்விகளுக்கான பதில்களைக் காணலாம்.

பெரியக் கணினிகள் ஒரு சூத்திரத்தை அல்லது வழிமுறையைத் தீர்க்கின்றன. இது ‘சுரங்கம்’ என அழைக்கப்படுகிறது. இதன்மூலமே கிரிப்டோகரன்சி உருவாகிறது.

பிட்காயின் உட்பட 4,000 வகையான மெய்நிகர் நாணயங்கள் (Virtual Coins) சந்தையில் இருக்கின்றன. இந்த நாணயங்கள்தான் ‘கிரிப்டோகரன்சி’ என்று அழைக்கப்படுகின்றன.

சாதாரண நாணயங்கள் ஏதேனும் ஒரு நிறுவனங்களால் கட்டுப்படுத்தப்படுகின்றன. உதாரணமாக, இந்தியாவின் நாணயத்தை இந்திய ரிசர்வ் வங்கி அச்சிட்டுக் கட்டுப்படுத்துகிறது.

ஆனால், கிரிப்டோகரன்சியை எந்த நிறுவனமும் கட்டுப்படுத்துவதில்லை.

கிரிப்டோகரன்சியின் அனைத்து பறிமாற்றங்களும் உலகெங்கும் உள்ள பல கணினிகள் மூலம் பதிவு செய்யப்படுகின்றன.

எளிமையாகச் சொல்வதெனில், உலகில் உள்ள அனைத்து மக்களும் ஒரு பெரிய அறையில் அமர்ந்திருப்பதாக வைத்துக்கொள்வோம். அங்கு ஒருவர் ஒரு கிரிப்டோகரன்சி பரிமாற்றம் செய்தால், அது அந்த அறையில் அமர்ந்திருக்கும் அனைவருக்கும் தெரியவரும். அதற்காகத்தான், இந்தத் தகவல்கள் பல இடங்களில் சேகரிக்கப்படுகின்றன.

உலகெங்கும் உள்ள பல கணினிகள் இந்தத் தரவுகளைச் சேகரிக்கின்றன. அதனால், இதனை நெறிப்படுத்தத் தனியாக வங்கிகள் போன்ற நிறுவனங்கள் தேவைப்படுவதில்லை.

2008-ஆம் ஆண்டு, பிட்காயின் எனப் பெயரிடப்பட்ட கிரிப்டோகரன்சி உருவக்கப்பட்டது. அப்போதிருந்து எந்த வாலட்டிலிருந்து (பணப்பை) எந்த வாலட்டுக்கு பிட்காயின் பரிவர்த்தனை நடைபெற்றது என அனைத்து தகவல்களும் பதிவுசெய்யப்பட்டுள்ளன.

இதிலிருக்கும் பிரச்னை என்னவென்றால், இந்த வாலட் யாருக்குச் சொந்தமானது என்ற தகவல் தெரியாமலிருப்பது.

பட மூலாதாரம்,GETTY IMAGES

மெய்நிகர் என்பதை நம்மால் தொட்டுப்பார்த்து உணரமுடியாத ஒன்று.

பிட்காயின், டோஜ்காயின், எத்தரியம், உள்ளிட்ட அனைத்து கிரிப்டோகரன்சியும் மெய்நிகர் சொத்துகளே. இவை நான்-ஃபஞ்சிபிள் டோக்கன்கள் (Non-fungible tokens - NFT) எனும் தொழில்நுட்பத்தின் மூலமாகச் செயல்படுகின்றன.

நான்-ஃபஞ்சிபிள் டோக்கன் என்பது ப்ளாக் செயினில் கணினித் தரவு வடிவில் பதிவு செய்யப்படிருக்கும் ஒரு குறியீடு. இந்தக் குறியீடு ஒரு கலைப்படைப்பையோ, ஒரு பொருளையோ குறிக்கும். இந்தக் குறியீட்டை வேறு பொருளுக்கு மாற்ற முடியாது. அதனால்தான் அது ‘நான்-ஃபஞ்சிபிள்’ என்று அழைக்கப்படுகிறது.

உதாரணமாக, உலகில் முதல் முதல் அனுப்பப்பட்ட SMS குறுஞ்செய்தியை ஒரு நபர் நான் ஃபஞ்சிபிள் டோக்கனாக மாற்றிப் பாதுகாத்து வைத்திருக்கிறார்.

NFT மூலம் பலர் ஓவியங்கள், கலைப்பொருட்கள் ஆகியவற்றை உருவாக்கினர். அவறை மெய்நிகர் வடிவில் வாங்கவோ விற்கவோ முடியும்.

ஒரு நபர் தனது பணத்தைத் தனது வாலட்டில் (பணப்பை, பர்ஸ்) வைத்துக்கொள்கிறார். அதுபோல, கிரிப்டோகரன்சியை வைத்துக்கொள்ள டிஜிட்டல் வாலட் (Digital Wallet) தேவைப்படுகிறது.

டிஜிட்டல் வாலட்டைத் திறக்கக் கடவுச்சொல் அவசியம். டிஜிட்டல் வாலட்டின் கடவுச்சொல்லை வைத்திருப்பவர்கள் யாராக இருந்தாலும் அவர்களால் கிரிப்டோகரன்சியை வாங்கவும், விற்கவும் முடியும்.

டிஜிட்டல் வாலட்டிற்கு 40 முதல் 50 இலக்க முகவரி உள்ளது. இந்த முகவரி, எண்கள் மற்றும் எழுத்துக்களால் ஆனது.

அனைத்து டிஜிட்டல் வாலட்டுகளுக்கும் ஒரு தனிப்பட்ட முகவரி இருக்கும். டிஜிட்டல் உலகில் இதுபோல பல கோடி வாலட்கள் உள்ளன.

பட மூலாதாரம்,GETTY IMAGES

கிரிப்டோகரன்சி தொடர்பான ஒரு பரிவர்த்தனை மேற்கொண்டால், அது ‘ப்ளாக்’ (Block) ஆகப் பதிவு செய்யப்படும். ஒரு ப்ளாக் என்பது பல கணினித் தரவுகள் கொண்ட ஒரு திரட்டு. ஒரு ப்ளக்கில் ஒரு குறிப்பிட்ட அளவு பரிவர்த்தனைக்கான தரவுகள் மட்டுமே பதிவு செய்ய முடியும்.

ஒரு ப்ளாக் நிறைந்தபிறகு, பரிவர்த்தனை தரவுகள் மற்றொரு ப்ளாக்கில் பதிவு செய்யப்படும்.

இதுபோல அடுத்தடுத்த ப்ளாக்-கள் ஒன்றோடு ஒன்று இணைந்துகொள்ளும். இந்தச் சங்கிலிப் பிணைப்புதான் ‘ப்ளாக் செயின்’ என்று அழைக்கப்படுகிறது.

கிரிப்டோகரன்சியை வாங்கவும், விற்கவும் ஒரு தளம் உள்ளது. பணத்தை கிரிப்டோகரன்சியாக மாற்ற அதற்கான பரிமாற்றுத் தளத்தை அணுகி மாற்றிக்கொள்ளலாம்.

நீங்கள் ஒரு கிரிப்டோகரன்சியை விற்றுவிட்டு மற்றொன்றை வாங்கவும், இந்தப் பரிமாற்ற நடவடிக்கை உங்களுக்கு உதவியாக இருக்கும்.

ஆன்லைன் தளங்களில் பொருட்களை வாங்குவது போல, கிரிப்டோ பரிமாற்ற தளங்களின் உதவியுடன் கிரிப்டோகரன்சி வாங்கப்படுகிறது.

இங்கு கிரிப்டோகரன்சியை வாங்குபவர்களும், விற்பவர்களும் இருக்கிறார்கள்.

பட மூலாதாரம்,GETTY IMAGES

இந்தியாவில் கிரிப்டோகரன்சி மூலம் ஈட்டப்படும் வருவாய்க்கு 30% வரி விதிக்கப்படுகிறது.

இந்த வரி 2022-ஆம் ஆண்டு அறிமுகப்படுத்தப்பட்டது.

உதாரணமாக, ஒரு நபர் ரூ.1 லட்சம் மதிப்பிலான கிரிப்டோகரன்சி வாங்கி, இரண்டு மாதங்கள் கழித்து அதை ரூ-2 லட்சத்துக்கு விற்பனை செய்கிறார் என்று வைத்துக்கொள்வோம்.

இதன்படி, அவர் ரூ.1 லட்சம் ஒரு லட்சம் ரூபாய் லாபம் ஈட்டியுள்ளார். இப்போது, அந்த நபர் அந்த லாபத்திலிருந்து 30%, அதாவது ரூ.30,000-த்தை இந்திய அரசுக்கு வரி செலுத்த வேண்டும்.

ஒரு நபர் ரூ.1 லட்சம் மதிப்பிலான கிரிப்டோகரன்சியை மற்றொரு நபரிடமிருந்து வாங்கியதாக வைத்துக்கொள்வோம்.

அப்போது, முதல் நபர் 1% வரிப் பிடித்தத்தை (TDS), அதாவது ரூ.1,000 தவிர்த்து மீதம் ரூ.99,000 ரூபாயைச் செலுத்துவார்.

இந்த ரூ.1,000 இந்திய அரசின் வருமானப் வரி பிடித்தமாக (TDS) வைப்பு வைக்கப்படும். பிறகு இது வரியாக வரவு வைக்கப்படும்.

இது அரசிற்கு அந்த கிரிப்டோகரன்சி பரிமாற்றம் பற்றிய தகவல்களை அறிய உதவும்.

பட மூலாதாரம்,GETTY IMAGES

ஆம், சில சமயங்களில், நெருங்கிய உறவுகளுக்கு வழங்கப்படும் பரிசுப் பொருட்கள் மீது வரி விதிக்கப்படாது.

ஆனால், இந்தியாவில், கிரிப்டோகரன்சி பரிசுப் பொருட்களின் பிரிவில் சேர்க்கப்படவில்லை.

அதனால், உங்கள் உறவினருக்கு நீங்கள் கிரிப்டோகரன்சி பரிசளித்தால், அதற்கு வரி விதிக்கப்படும்.

கிரிப்டோகரன்சி மூலம் எற்படும் லாபம் அல்லது இழப்புகளை ஆண்டு வருமானத்தில் சேர்க்க முடியாது.

ஒருவேளை நீங்கள் உங்கள் தொழில் மூலம் ரூ.5 லட்சம் லாபம் ஈட்டியுள்ளீர்கள். அதேசமயம் கிரிப்டோகரன்சியில் ரூ.1 லட்சம் இழந்துள்ளீர்கள்.

இந்நிலையில், உங்களுக்கு லாபமாகக் கிடைத்த ரூ.5 லட்சத்துக்கான வரியை நீங்கள் அரசுக்குச் செலுத்த வேண்டும். இதில், கிரிப்டோகரன்சி மூலம் எற்பட்ட இழப்பை ஈடுசெய்ய முடியாது.

இழப்பைக் கழித்துவிட்டு உங்கள் வருமானத்தை ரூ.4 லட்சமாகக் கணக்கு காட்ட முடியாது.

பட மூலாதாரம்,GETTY IMAGES

டிஜிட்டல் நாணயம், உங்கள் கைபேசியில் அல்லது டிஜிட்டல் வாலட்டில் டிஜிட்டல் வடிவில் (கணினித் தரவுகளாக) இருக்கும்.

இதன் மூலம் பரிவர்த்தனை செய்ய வங்கி தேவையில்லை.

ஆனால், பேடிஎம் போன்ற இ-பரிவர்த்தனை நிறுவனங்கள் நாம் அன்றாடம் பயன்படுத்தும் ரூபாய் போன்ற சாதாரணப் பணத்தை ஆன்லைனில் பரிவர்த்தனை செய்ய உதவும் நிறுவனங்கள். இவை இடைத்தரகர்களாகச் செயல்படுகின்றன.

இவற்றின் மூலம் ஒருவர் பணப்பரிவர்த்தனை செய்ய வங்கி அல்லது இ-வாலட்டைச் சார்ந்திருக்க வேண்டியுள்ளது.

பிட்காயின்களின் மொத்த மதிப்பு 2.1 கோடியைத் தாண்ட முடியாது.

பிட்காயினின் இருப்பு வரையறுக்கப்படதால், பிட்காயின்கள் குறைவாகவே உள்ளன. பிட்காயினின் தேவை அதிகரிக்கும் போது அதன் விலை அதிகரிக்கிறது.

ஐந்து வருடங்களுக்கு முன், பிட்காயினின் விலை ரூ.22,000 ஆக இருந்தது.

2022-ஆம் ஆண்டு பிப்ரவரி மாதம் இது ரூ.30 லட்சமாக உயர்ந்தது.

இன்று ஒரு பிட்காயினின் மதிப்பு 90,000 அமெரிக்க டாலர்களை தாண்டியுள்ளது. அதாவது இந்திய மதிப்பில் சுமார் ரூ.75 லட்சம்.

பிட்காயினின் மதிப்பு தொடர்ந்து உயர்ந்து கொண்டே வருகிறது.

மறுபுறம், இ-பரிவர்த்தனை மூலம் அனுப்பப்படும் ரூபாய் போன்ற நாணயங்களின் மதிப்பு மாறாது.

இ-பரிவர்த்தனை மூலம் ரூ.10-ஐ எப்போது அனுப்பினாலும், அதன் மதிப்பு ரூ.10-ஆகத்தான் இருக்கும்.

இ-பரிவர்த்தனைகள் நாம் பணம் அனுப்பும் முறையை மட்டுமே மாற்றியுள்ளன.

https://www.bbc.com/tamil/articles/cvgx1dwvpldo

பட மூலாதாரம்,GETTY IMAGES

2022-ஆம் ஆண்டு பிப்ரவரி மாதம் ரஷ்யா - யுக்ரேன் இடையே போர் தொடங்கியதிலிருந்து ரஷ்யாவும் யுக்ரேனும் மாறி மாறி ட்ரோன் தாக்குதல்களை நடத்தி வருகின்றன. சமீபத்திய நாட்களில் இந்த தாக்குதல்களின் தீவிரம் அதிகரித்துள்ளது.

யுக்ரேன் ரஷ்யாவிற்கு எதிராக 80 ட்ரோன்களை செலுத்தியது. அவற்றில் சில மாஸ்கோவை இலக்காகக் கொண்டவை. மற்றொருபுறம் யுக்ரைன் முழுவதும் உள்ள இலக்குகளை நோக்கி ரஷ்யா 140க்கும் மேற்பட்ட ட்ரோன்களை செலுத்தியது.

இந்த மோதலில் ஆளில்லா விமானங்களான ட்ரோன்களை ஆயுதங்களாகப் பயன்படுத்துவது போர் முறையில் ஏற்பட்டுள்ள மாற்றத்தை காட்டுகிறது.

மின்னணுப் போர்முறை மற்றும் பீரங்கித் தாக்குதல்களோடு ஒருங்கிணைந்து செயல்படுத்தப்படும் போது ட்ரோன்கள் ஒரு சிறந்த தற்காப்பு ஆயுதமாகவும், எதிரி படைகள் மீது குறி வைத்து தாக்குதல் நடத்துவதற்கும் மிகவும் பயனளிப்பதாக நிரூபிக்கப்பட்டுள்ளது.

ட்ரோன்: போர்களத்தில் அனைத்தையும் கண்காணிக்கும் கண்கள்

பட மூலாதாரம்,GETTY IMAGES

யுக்ரேன் போரில் முக்கிய அம்சமாக ட்ரோன்கள் மாறியுள்ளன, மேலும் அவை போர் நடக்கும் விதத்தை ஆழமாக பாதித்துள்ளன என்று ஸ்காட்லாந்தில் உள்ள செயின்ட் ஆண்ட்ரூஸ் பல்கலைக்கழகத்தின் போர் ஆய்வுகள் பேராசிரியரான பிலிப்ஸ் ஓ பிரையன் கூறுகிறார்.

"அவை போர்க்களத்தை மிகவும் வெளிப்படையானதாக மாற்றியுள்ளன" என்றும் அவர் கூறினார்.

கண்காணிப்புப் பணியில் இருக்கும் ட்ரோன்கள் மூலம் படை வீரர்களின் நகர்வை அல்லது போரின் முன்னணியில் தாக்குதலுக்கான ஏற்பாட்டை, நிகழ் நேரத்தில் நோட்டமிட முடியும்.

போர்க்களத்தில் ஒரு இலக்கினை கண்டால், அதை பற்றிய தகவல்களை கட்டளை மையத்திற்கு தெரியப்படுத்தப்பட்டு, அதன் பின்னர் அந்த இலக்கின் மீது பீரங்கித் தாக்குதலுக்கு உத்தரவிடப்படும்.

இலக்கைப் கண்டுபிடிப்பது முதல் அதைத் தாக்குவது வரையிலான இந்த செயல்முறை, ராணுவ அகராதியில் "கொலை சங்கிலி" (kill chain) என்று அழைக்கப்படுகிறது.

தற்போது இதில் ட்ரோன்களைப் பயன்படுத்துவதன் மூலம் இந்த செயல்முறை மிகவும் துரிதமாக்கப்பட்டுள்ளது என்று பேராசிரியர் ஓ பிரையன் கூறுகிறார்.

"ஆழமான மறைவான பகுதிகளில் இல்லையென்றால் ட்ரோனின் கண்காணிப்பில் இருந்து தப்பிக்கவே முடியாது. டாங்கிகள் மற்றும் பிற கவச ஆயுதங்களை ட்ரோன்களை தாண்டி கொண்டு செல்ல முடியாது," என்று அவர் கூறுகிறார்.

பட மூலாதாரம்,GETTY IMAGES

எதிரிகளைத் தாக்க பீரங்கிகளுடன் சேர்ந்து தாக்குதல் ட்ரோன்களும் பயன்படுத்தப்படுகின்றன. யுக்ரேன் படைகள் ட்ரோன்களை மட்டும் பயன்படுத்தி ரஷ்ய டாங்கிகளின் குழுக்களின் முன்னேற்றத்தைத் தடுக்க முடிந்தது.

போரின் தொடக்கத்தில் யுக்ரேன், துருக்கியில் தயாரிக்கப்பட்ட TB-2 Bayraktar-ஐ பயன்படுத்தியது, இது வெடிகுண்டுகள் மற்றும் ஏவுகணைகளை வீசக்கூடிய ராணுவ தர ட்ரோன் ஆகும்.

இருப்பினும், தற்போது இரு தரப்பினரும் விலைக் குறைந்த "காமிகேஸ்" (kamikaze) ட்ரோன்களுக்கு மாறி வருகின்றனர். இவை பெரும்பாலும் வணிக ரீதியாக பயன்படுத்தப்படும் ட்ரோன்கள், அவற்றில் வெடிபொருட்களும் இணைக்கப்பட்டுள்ளன. அவற்றை பல கிலோமீட்டர் தொலைவில் இருந்து கட்டுப்படுத்தலாம்.

பட மூலாதாரம்,GETTY IMAGES

யுக்ரேனில் உள்ள ராணுவ மற்றும் பொது மக்கள் வசிக்கும் இலக்குகளை தாக்குவதற்கு இரானில் தயாரிக்கப்பட்ட ஷாஹெட்-136 போன்ற ஆயிரக்கணக்கான காமிகேஸ் ட்ரோன்களை ரஷ்யா பயன்படுத்துகிறது.

யுக்ரேனிய வான் பாதுகாப்பைக் கடக்க அவை அதிகளவில் பயன்படுத்தப்படுகின்றன.

பட மூலாதாரம்,GETTY IMAGES

யுக்ரைன் போரில் பீரங்கிகளே அதிகம் பயன்படுத்தப்படும் ஆயுதமாக இருக்கிறது.

பிரிட்டனைத் தளமாகக் கொண்ட சிந்தனைக் குழுவான ராயல் யுனைடெட் சர்வீசஸ் இன்ஸ்டிடியூட்ட்டின் கூற்றுப்படி, ரஷ்யா ஒரு நாளைக்கு சுமார் 10,000 ஷெல் குண்டுகளை வீசுகிறது மற்றும் யுக்ரைன் ஒரு நாளைக்கு 2,000 - 2,500 ஷெல் குண்டுகளை வீசுகிறது.

எதிரி படைகளின் நடமாட்டத்தை சரிபார்க்கவும், அதன் கவச வாகனங்கள், பாதுகாப்பு வசதிகள், கட்டளை மையங்கள் மற்றும் சப்ளை டிப்போக்களை தாக்கவும் பீரங்கி தொடர்ந்து பயன்படுத்தப்படுகிறது.

"போரின் போது, வெடிபொருட்கள் என்பது மனிதர்கள் அருந்தும் தண்ணீரைப் போன்றது, அல்லது காருக்கு எரிபொருளைப் போன்றது" என்று பீரங்கி நிபுணர் மற்றும் ராணுவ வல்லுநர் பெட்ரோ பியாடகோவ் கூறுகிறார்.

பட மூலாதாரம்,GETTY IMAGES

இரு தரப்பினரும் வெளிநாடுகளிலிருந்து வந்த மில்லியன் கணக்கான பீரங்கி குண்டுகளைப் பயன்படுத்துகின்றன. அமெரிக்கா மற்றும் ஐரோப்பிய நாடுகள் அவற்றை யுக்ரேனுக்கு வழங்குகின்றன. ரஷ்யா வட கொரியாவிலிருந்து அவற்றை இறக்குமதி செய்கிறது.

பிரிட்டனைத் தளமாகக் கொண்ட பாதுகாப்பு ஆய்வு நிறுவனமான சிபிலின் தலைமை நிர்வாகி ஜஸ்டின் க்ரம்ப் கூறுகையில், ''மேற்கத்திய நாடுகள் யுக்ரேனுக்கு தேவையான குண்டுகளை வழங்க திணறுகின்றன. இது அந்த நாடுகளின் ராணுவத் தொழில்களில் உள்ள சிக்கலை எடுத்துக்காட்டுகிறது.''

அவர் மேலும் கூறுகையில் "மேற்கத்திய பாதுகாப்பு நிறுவனங்கள் இப்போது ஒப்பீட்டளவில் குறைந்த எண்ணிக்கையிலான உயர் துல்லியமான ஆயுதங்களை உற்பத்தி செய்கின்றன. இருப்பினும், ஷெல் குண்டுகள் போன்ற அடிப்படை ஆயுதங்களை அதிகளவில் உற்பத்தி செய்யும் திறன் அவர்களுக்கு இல்லை" என்றார்.

பட மூலாதாரம்,GETTY IMAGES/RUSSIAN DEFENCE MINISTRY

2023-ஆம் ஆண்டின் முற்பகுதியில் இருந்து, ரஷ்யப் படைகள் போர்க்களத்தில் யுக்ரேனிய நிலைகள் மீது குண்டுவீசுவதற்கும், பொதுமக்கள் குடியிருப்பு பகுதிகள் மற்றும் உள்கட்டமைப்புகளைத் தாக்குவதற்கும் ஆயிரக்கணக்கான "க்ளைட் குண்டுகளை" (Glide bombs) பயன்படுத்தியது.

அவை மடிக்கக்கூடிய இறக்கைகள் கொண்ட செயற்கைக்கோளால் வழிநடத்தப்படும் அமைப்புகளுடன் கூடிய வழக்கமான "ஃப்ரீ-ஃபால்" குண்டுகள் ஆகும்.

ரஷ்யா க்ளைட் குண்டுகளை அதிகம் பயன்படுத்துகிறது. அவற்றின் எடை 200 கிலோ முதல் 3,000 கிலோ அல்லது அதற்கும் அதிகமாக இருக்கும்.

"க்ளைட் குண்டுகள் வலுவூட்டப்பட்ட நிலைகளை உடைப்பதிலும் கட்டடங்களை அழிப்பதிலும் திறம்பட செயல்படுகின்றன" என்று வான்வழிப் போர் நிபுணரான ஜஸ்டின் ப்ரோங்க் கூறுகிறார்.

பிப்ரவரி 2024 இல் கிழக்கு யுக்ரேனில் ரஷ்யா கைப்பற்றிய முக்கியத்துவம் வாய்ந்த அட்விவ்கா நகரத்தைச் சுற்றியுள்ள யுக்ரேனிய பாதுகாப்பு நிலைகளை அழிக்க ரஷ்யா இதை அதிகளவில் பயன்படுத்தியது என்று அவர் மேலும் கூறினார்.

பட மூலாதாரம்,REUTERS

யுக்ரேன், அமெரிக்கா மற்றும் பிரான்ஸ் வழங்கும் நீண்ட தூரம் செல்லும் க்ளைட் குண்டுகளையும் பயன்படுத்துகிறது.

அமெரிக்காவால் தயாரிக்கப்பட்ட சிறிய விட்டம் கொண்ட குண்டுகளுக்கு இறக்கைகளை இணைத்து அதன் சொந்த க்ளைட் குண்டுகளை உருவாக்குகிறது.

எவ்வாறாயினும் யுக்ரேனில் ரஷ்யாவை விட குறைவான க்ளைட் குண்டுகளே உள்ளன.

பட மூலாதாரம்,GETTY IMAGES

முன்னெப்போதையும் விட ரஷ்யா-யுக்ரேன் போரில் மின்னணுப் போர்முறை மிகவும் தீவிரமாகப் பயன்படுத்தப்படுகிறது.

ஒவ்வொரு பக்கத்திலும் ஆயிரக்கணக்கான படைகள் சிறப்புப் பிரிவுகளில் வேலை செய்கின்றனர். மறுபக்கத்தின் ட்ரோன்கள் மற்றும் தகவல் தொடர்பு அமைப்புகளை முடக்கவும், எதிரி ஏவுகணைகளை இலக்கில் இருந்து வீழ்த்தவும் முயற்சி செய்கின்றனர்.

ரஷ்யப் படைகள் Zhitel போன்ற அமைப்புகளைக் கொண்டுள்ளன. அவை 10 கிமீ சுற்றளவில் அனைத்து செயற்கைக்கோள் தகவல் தொடர்புகள், வானொலி தொடர்புகள் மற்றும் மொபைல் போன் சிக்னல்களை முடக்கும் திறன் கொண்டவை.

இது மின்காந்த ஆற்றலின் பெரும் துடிப்புகளை வெளியிடுவதன் மூலம் ரேடியோ அலைகளை முறியடிக்கிறது.

அதன் Shipovnic-Aero பிரிவின் மூலம், ரஷ்யப் படைகள் 10கிமீ தொலைவில் இருந்து ஒரு ட்ரோனை வீழ்த்த முடியும்.

இந்த அமைப்பு ட்ரோன் இயக்குபவர்களின் இருப்பிடத்தைக் கண்டறிந்து, பின்னர் பீரங்கி பிரிவுகளுக்கு தகவல்களை அனுப்ப முடியும்.

பட மூலாதாரம்,GETTY IMAGES

லண்டனில் உள்ள கிங்ஸ் கல்லூரியின் போர் ஆய்வுத் துறையில் பணிபுரியும் மெரினா மிரோன்,''யுக்ரேனில் உள்ள ஹிமார்ஸ் போன்ற உயர் தொழில்நுட்ப ஏவுகணைகளை ரஷ்ய மின்னணு போர் அமைப்புகள் எவ்வளவு எளிதாக முடக்கியது என்பதை மேற்கத்திய நாடுகள் கண்டு அதிர்ச்சியடைந்திருக்கக்கூடும்.'' என்கிறார்

"இது சமச்சீரற்ற போர்," என்று அவர் கூறுகிறார்.

"நேட்டோ படைகள் ரஷ்யா வைத்திருப்பதை விட தொழில்நுட்ப ரீதியாக உயர்ந்த ஆயுதங்களைக் கொண்டிருக்கலாம், ஆனால் அவற்றைச் செயலிழக்கச் செய்ய ஒப்பீட்டளவில் மலிவான எலக்ட்ரானிக் கருவிகளைப் பயன்படுத்த முடியும் என்று ரஷ்யா காட்டியது." என்றார்.

லண்டன் கிங்ஸ் கல்லூரியில் உள்ள ஃப்ரீமேன் இன்ஸ்டிடியூட் ஆப் ஏவியேஷன் அண்ட் ஸ்பேஸைச் சேர்ந்த டங்கன் மெக்ரோரி, ''யுக்ரேனில் ரஷ்யா தனது மின்னணுப் போர்முறையை நடத்தும் விதத்தில் இருந்து நேட்டோ நாடுகளில் உள்ள ராணுவத் தலைவர்கள் பாடம் கற்றுக்கொள்ள வேண்டும்'' என்றார்.

"மின்னணுப் போர்முறையை இனி எளிதாகக் எடுத்துக் கொள்ள முடியாது. உங்களின் தந்திரங்கள், பயிற்சி மற்றும் புதிய ஆயுத அமைப்புகளை உருவாக்கும் போதெல்லாம் அதைக் கருத்தில் கொள்ள வேண்டும்." என்றார்.

- இது, பிபிசிக்காக கலெக்டிவ் நியூஸ்ரூம் வெளியீடு.

https://www.bbc.com/tamil/articles/cy4np93plzeo

பட மூலாதாரம்,GETTY IMAGES

காஸ்பியன் கடலுக்கு நடுவே, வானுயர்ந்த ஸ்டீல் கோபுரங்கள், துருப்பிடித்த குழாய்கள், மரப் பாலங்கள், சோவியத் காலத்தை சேர்ந்த பிரமாண்டமான கட்டடங்கள் என உலக வரைபடத்தில் இல்லாத மனிதனால் உருவாக்கப்பட்ட தீவு ஒன்று இருக்கிறது. அது தான் நெப்ட் டேஷ்லரி நகரம்.

1940களில், காஸ்பியன் கடலில் எண்ணெய் வளங்கள் இருப்பதை கண்டறிய ஜோசப் ஸ்டாலின் உத்தரவிட்டார். அதன் விளைவாகவே இந்த நகரம் உருவானது.

அஜர்பைஜானின் பாகு நகரத்தில் இருந்து 55 கிலோ மீட்டர் தூரத்தில் இந்த நகரம் அமைந்துள்ளது. உலக சாதனைக்கான கின்னஸ் புத்தகத்தின் படி இந்த நகரம், கடலில் அமைந்துள்ள மிகப் பழமையான எண்ணெய் உற்பத்தி இடமாக அறியப்படுகிறது. இந்த நகரின் பெயரை ரஷ்ய மொழி மற்றும் ஆங்கிலத்தில் மொழி பெயர்த்தால் 'எண்ணெய் பாறைகள்' என்றும் பொருள் தருகிறது.

2024ஆம் ஆண்டிற்கான ஐக்கிய நாடுகள் சபையின் 29-வது காலநிலை மாற்ற மாநாடு (COP29), பாகு நகரில் நடப்பது குறிப்பிடத்தக்கது.

அஜர்பைஜானில் 1920ஆம் ஆண்டு செம்படைகள் நுழைந்த போது, பாகு நகரம் சோவியத் ஒன்றியத்துடன் (USSR) சேர்க்கப்பட்டது. சோவியத் ஒன்றியம் கலைக்கப்படுவதற்கு சில காலம் முன்பு வரை இந்நகரம் 1991ஆம் ஆண்டு அக்டோபர் மாதம் வரை அதன் ஒரு அங்கமாகவே இருந்தது.

இரண்டாம் உலகப் போரின் போது, கிழக்கு போர் முனையில் பயன்படுத்தப்பட்ட பெரும்பகுதி எண்ணெய் பாகுவிலிருந்து வந்ததால், இந்நகரம் மிகவும் முக்கியத்துவம் வாய்ந்ததாக இருந்தது.

ஜோசப் ஸ்டாலினின் ஐந்தாண்டு திட்டங்களின் ஒரு பகுதியாக இந்நகரம் உருவாக்கப்பட்டது. பொருளாதாரம், குறிப்பாக தொழிற்துறை போன்ற துறைகளின் மேம்பாட்டிற்காக ஸ்டாலின் ஐந்தாண்டு திட்டங்களை உருவாக்கினார். இந்த திட்டம் சோவியத் அதிகாரத்துவத்தின் முதன்மையாக இருந்தது. அதில் சில திட்டங்கள் முழுமையாக செயல்படுத்தப்படவில்லை, மேலும் சில கைவிடப்பட்டன அல்லது தோல்வியடைந்தன.

1949ஆம் ஆண்டு நவம்பர் 7ஆம் தேதி அன்று மேற்கொள்ளப்பட்ட வெற்றிகரமான எண்ணெய் வளங்கள் ஆய்வுக்கு பிறகு இந்நகரத்தை உருவாக்குவதற்கான வேலைகள் தொடங்கின. அதன் பிறகு இது மத்திய ஆசியாவின் மிகப்பெரிய எண்ணெய் இருப்பு உள்ள இடமாக மாறியது.

பட மூலாதாரம்,SOCAR

"நவம்பர் 7ஆம் தேதி அன்று, இங்குள்ள எண்ணெய் கிணற்றில், நாள் ஒன்றுக்கு 100 டன் வரை எண்ணெய் உற்பத்தி செய்யப்பட்டது. இங்குதான் உலகின் முதல் கடலோர எண்ணெய் உற்பத்தி செய்யப்பட்டது. காஸ்பியன் கடல்பகுதியில் இருந்து எண்ணெய் உற்பத்தி செய்வதில் அஜர்பைஜான் முதன்மையானது" என்று அஜர்பைஜானின் அரசின் எண்ணெய் நிறுவனமான SOCAR வலைதளத்தில் குறிப்பிடப்பட்டுள்ளது.

தொழிலாளர்கள் தங்குவதற்கான வீடுகளை கொண்டு சிறிய அளவில் உருவான இந்நகரத்தில், 1951ஆம் ஆண்டு முதல் பெரிய கட்டுமானங்கள் நடந்தன.

"இந்நகரம் ஒரு கட்டடக் கலை மற்றும் தொழில்நுட்ப அதிசயம்" என்று 1990களின் பிற்பகுதியில் இந்த நகரத்தை பார்க்க வந்த திரைப்படத் தயாரிப்பாளர் மார்க் வோல்ஃபென்ஸ்பெர்கர் கூறினார்.

கடற்கரையில் பணிகளை விரைவுபடுத்துவதற்காக, தனித்துவமான ஒரு செயல்பாடு செய்யப்பட்டது. பயன்படுத்தப்படாத கப்பல்களை கடலுக்கு அடியில் மூழ்க செய்து, அவற்றை அடித்தளமாக பயன்படுத்தி அதன் மீது தூண்கள் எழுப்பப்பட்டன.

பட மூலாதாரம்,GETTY IMAGES

இந்த கப்பல்களுள் ஒன்று ஜோராஸ்டர் டேங்கர் ஆகும். இது உலகில் முதன்முதலில் தயாரிக்கப்பட்ட கப்பல்களுள் ஒன்று. இதனை உருவாக்கியவர் லுட்விக் நோபல் ஆவார். இவர் ஆல்பர்ட் நோபலின் சகோதரர். 19ஆம் நூற்றாண்டின் இறுதியில் எண்ணெய் போக்குவரத்துக்கு ஒரு தீர்வாக இந்த கப்பலை அவர் தயாரித்தார்.

"1951ஆம் ஆண்டில், இந்த தீவை காற்று மற்றும் அலைகளிலிருந்து பாதுகாக்க, கசார்டாங்கர் மற்றும் கசார்டோனன்மா நிறுவனங்களின் ஆறு கூடுதல் கப்பல்கள் பிரித்தெடுக்கப்பட்டு, இங்கு கொண்டு வரப்பட்டன. இந்த கப்பல்களின் அறைகள் குழு உறுப்பினர்களின் தங்கும் அறைகள், உணவருந்தும் அறைகள், மருத்துவ அறைகள் மற்றும் பிற செயல்பாடுகளுக்காக பயன்படுத்தப்பட்டன. எனவே இந்த இடத்தின் உண்மையான பெயர் 'ஏழு கப்பல்களின் தீவு' ஆகும்" என்று SOCAR வலைதளம் தெரிவிக்கின்றது.

அதிலிருந்து தற்போது வரை இந்த தீவு, 'நெப்ட் டேஷ்லரி' என்ற பெயரை கொண்டே அழைக்கப்படுகிறது.

காலப்போக்கில் நெப்ட் டேஷ்லரி வளர்ச்சி அடைந்ததால், இந்நகரம் கடலின் மீதிருக்கும் பிரமாண்ட ஆக்டோபஸ் போல கட்சியளிக்கின்றது.

அங்கு பணிபுரியும் நபர்களுக்காக, பேக்கரி, கடைகள், மருந்தகங்கள், கால்பந்து விளையாட்டு மைதானம், ஹெலிபோர்ட் மற்றும் திரையரங்கமும் கட்டப்பட்டன.

கடலடியில் இருந்து தூண்கள் எழுப்பப்பட்டு, நெப்ட் டேஷ்லரி நகரமானது அடிமட்டத்திற்கு சில மீட்டர்களுக்கு மேல் கட்டப்பட்டுள்ளாதாக, அஜர்பைஜானின் எண்ணெய் மற்றும் எரிவாயு துறையின் தொழிலாளர்களின் உரிமைகள் பாதுகாப்பு அமைப்பின் இயக்குநர் மிர்வாரி கஹ்ராமன்லி பிபிசியிடம் கூறினார்.

இங்கு மக்கள் தங்கக்கூடிய கட்டடங்கள், மருந்தகம் மற்றும் கடைகள் இருக்கின்றன. கூடுதலாக, இங்கு மரங்கள் நடப்பட்டும், பூங்காக்கள் அமைக்கப்பட்டும் வருவதாகவும் அவர் தெரிவித்தார்.

"உலகில் திறந்தவெளி கடல்பரப்பில் முதலில் எண்ணெய் உற்பத்தி செய்யப்படும் இடமாக நெப்ட் டேஷ்லரி கருதப்படுகின்றது. சில சமயங்களில் இந்த இடம் இதன் தனித்தன்மைகளால் உலகின் எட்டாவது அதிசயம், ஏழு கப்பல்களின் தீவு, அதிசயங்களின் தீவு எனவும் அழைக்கப்படுகின்றது" என கஹ்ராமன்லி தெரிவித்தார்.

இங்கு சுமார் 2000 எண்ணெய் கிணறுகள் இருப்பதாகவும், அவை 12 கிலோ மீட்டர் நீளமும், 6 கிலோ மீட்டர் அகலமும் மற்றும் 200 கிலோமீட்டர் ஆழம் வரை இருப்பதாக, கஹ்ராமன்லியின் தரவுகள் கூறுகின்றன.

"இங்கு முதலில் 5,000 ஊழியர்கள் பணிபுரிந்தனர். தற்போது இங்கு 3000 ஊழியர்கள் பணிபுரிகின்றனர். அவர்கள் 15 நாட்கள் கடலிலும் மற்றும் 15 நாட்கள் நிலத்திலும் இருக்கின்றனர்", என்று கஹராமன்லி கூறுகிறார்.

பட மூலாதாரம்,SOCAR

நெப்ட் டேஷ்லரி அஜர்பைஜானின் அரசுக்கு சொந்தமான எண்ணெய் நிறுவனமான SOCAR-க்கு சொந்தமானது. இது எண்ணெய் மற்றும் எரிவாயு பொருட்களின் உற்பத்தி, சுத்திகரித்தல் மற்றும் ஏற்றுமதி மற்றும் விற்பனை செய்தல் போன்ற பணிகளுக்கு பொறுப்பாக உள்ளது.

SOCAR-ஐ பொருத்தவரை, காஸ்பியன் கடலில் எண்ணெய் உற்பத்தி செய்வதில் இந்த தீவு மிகவும் சிறப்பு வாய்ந்ததாக இருக்கிறது. 75 ஆண்டுகளாக செயல்பட்டு வரும் இந்த தீவில் இருந்து சுமார் 180 மில்லியன் டன் எண்ணெய் உற்பத்தி செய்யப்பட்டுள்ளது. 1967 ஆம் ஆண்டு 7.6 மில்லியன் டன் உற்பத்தி செய்து இந்த தீவு சாதனை படைத்துள்ளது.

இந்த ஆண்டு ஜனவரியில் SOCAR-இன் தரவுகளின் படி, தற்போது நாள் ஒன்றுக்கு 3000 டன் மட்டுமே எண்ணெய் உற்பத்தி செய்யப்பட்டு, மிகவும் குறைவாக இருப்பதாக தெரியவந்துள்ளது.

1960-களில் எண்ணெய் உற்பத்தியில் இந்த நகரம் உச்சத்தை எட்டியது. ஆனால், அதற்கு அடுத்த ஆண்டுகளில் நிலையற்ற எண்ணெய் விலை மற்றும் சோவியத் யூனியனின் சரிவு போன்றவை காரணமாக இந்நகரம் அதன் சிறப்பை இழக்க தொடங்கியது.

2012 ஆம் ஆண்டு நிலவரப்படி, 300 கிலோமீட்டர் சாலை கொண்ட இந்த நகரத்தில் வெறும் 45 கிலோமீட்டர் சாலைகள் மட்டுமே பயன்படுத்தும் வகையில் இருப்பதாக டெர் ஸ்பியிகள் (Der Spiegel) என்ற ஜெர்மன் செய்தித்தாள் குறிப்பிட்டுள்ளது. Oil Rocks – City Above The Sea என்ற ஆவணப்படத்தின் மூலம் இயக்குநர் மார்க் ஒல்ஃப்ஸ்பெர்கர் இந்த நகரத்தில் நடந்த சிலவற்றை பதிவு செய்துள்ளார்.

இந்த படத்தில், "நான் இளம் வயதில் இருந்தபோது, இந்த சாலைகள் அனைத்தும் நல்ல நிலையில் இருந்தன," என உள்ளூர் தொழிலாளி ஒருவர் தனது கனரக வாகனத்திலிருந்து பயணம் செய்தவாறு கூறினார். அடுத்த காட்சியில் முற்றிலும் சிதைந்த, கைவிடப்பட்ட கட்டடங்கள் காட்சிப்படுத்தப்படுகின்றன.

நகரத்தின் கட்டமைப்பு அல்லது காலநிலை மாற்றத்தால், இந்நகரம் கடலில் மூழ்குவதற்கான ஆபத்து உள்ளதா என்ற கேள்விக்கு, "இந்த நகரம் தற்போது மூழ்குவதற்கான சாத்தியமில்லை, தற்போது அது போன்ற ஆபத்து எதுவும் இல்லை" என்று மிர்வரி கஹ்ராமன்லி பதில் கூறினார்.

"நெப்ட் டேஷ்லரி என்பது கடலோரத்தில் அமைந்துள்ள ஒரு தொழில்நுட்ப நகரம். இங்கு கடல் படுக்கைகளும் எண்ணெய் கிணறுகள் இருக்கின்றன, அதில் துளையிடப்பட்டு, எண்ணெய் பிரித்தெடுக்கப்படுகிறது", என்றார் அவர்.

பட மூலாதாரம்,GETTY IMAGES

இந்த இடத்தைப் பற்றிய தற்போதைய படங்களை கண்டுபிடிப்பது எளிதானது அல்ல.

1990களின் பிற்பகுதியில் ஜேம்ஸ் பாண்ட் தொடரில் வெளியான The World is Never Enough உட்பட அந்தப் பகுதியில் படமாக்கப்பட்ட அனைத்து திரைப்படங்கள் பற்றியும் SOCAR வலைதளத்தில் பதிவுகள் இருக்கின்றன.

இந்த நகரின் கட்டமைப்பினால் இங்கு கப்பல் அல்லது ஹெலிகாப்டர் மூலமாக தான் சென்றடைய முடியும். எளிதாக இந்த இடத்தை சென்றடையவோ அல்லது சுற்றிப் பார்க்கவே முடியாமல் போக இதுவும் காரணமாகியுள்ளது.

இருப்பினும், எண்ணெய் உற்பத்தியில் சரிவு மற்றும் தீவின் கட்டமைப்புகளில் தொய்வு ஆகியவற்றால், இது ஒரு சுற்றுலா தலமாக மாறும் சாத்தியக்கூறுகளும் உள்ளன.

மிர்வரி கஹ்ராமன்லி, "கடற்கரை ரிசார்ட்டுகள் மற்றும் சுற்றுலா இருப்பிடங்கள் போன்றவை இந்த நகரத்தின் எதிர்காலமாக இருக்கும்", என்றார்.

- இது, பிபிசிக்காக கலெக்டிவ் நியூஸ்ரூம் வெளியீடு.

https://www.bbc.com/tamil/articles/c1e73nj97dlo

மத்திய கிழக்கில், காஸா மற்றும் லெபனானில் இஸ்ரேல் தொடர் தாக்குதல்கள் நடத்தி வரும் நிலையில் இஸ்லாமிய மற்றும் அரபு நாடுகளின் தலைவர்கள் சௌதி அரேபியா தலைநகர் ரியாத்தில் ஒன்று கூடியுள்ளனர்.

அப்போது பேசிய சௌதி அரேபியாவின் பட்டத்து இளவரசர் முகமது பின் சல்மான், காஸாவில் இஸ்ரேலின் தாக்குதல்களை "இனப்படுகொலை" என்று குறிப்பிட்டுள்ளார். மேலும் லெபனான் மற்றும் இரான் மீது இஸ்ரேல் நடத்தும் தாக்குதல்களையும் அவர் விமர்சித்தார்.

"பாலத்தீன மக்கள் மீது இஸ்ரேல் நடத்திவரும் தொடர் தாக்குதல்கள் மற்றும் லெபனான் மக்கள் மீதும் அந்நாடு தாக்குதலை விரிவுபடுத்த வாய்ப்புள்ள இந்த சூழலில், இவ்வுச்சிமாநாடு நடைபெறுகிறது", என்று அவர் கூறினார்.

ஆனால் இனப்படுகொலை குற்றச்சாட்டுகளை இஸ்ரேல் வலுவாக மறுத்துள்ளது.

மேலும் எதிரியாக இருந்த நாடுகளான இரான் மற்றும் சௌதி அரேபியா ஆகிய இரு நாடுகளுக்கு இடையே உறவுகளை மேம்படுத்துவதற்கான ஒரு அறிகுறியாக, அவர் இரானில் இஸ்ரேல் தாக்குதல் நடத்துவதற்கு எதிராக இஸ்ரேலுக்கு எச்சரிக்கை விடுத்தார்.

இதற்கு முன்பு, சௌதி அரேபிய ராணுவத்தின் உயர்நிலைக் குழு ஒன்று இரானுக்கு பயணம் மேற்கொண்டது. இது 'வழக்கத்திற்கு மாறான' ஒன்றாக கருதப்படுகிறது.

அதேசமயம், சௌதி அரேபியாவின் பட்டத்து இளவரசர் முகமது பின் சல்மானுடன் இரான் அதிபர் மசூத் பெசெஷ்கியன் பேசியுள்ளார்.

இரான் ராணுவ அதிகாரிகளுடன் இரு நாடுகளுக்கும் இடையிலான ராணுவ உறவுகள் குறித்து சௌதி அரேபிய ராணுவத்தின் உயர்நிலைக் குழு கலந்துரையாடியதாக இரான் நாட்டின் ஊடகங்கள் தெரிவிக்கின்றன.

சௌதி அரேபிய ராணுவ தளபதி லெப்டினன்ட் ஜெனரல் ஃபயாத் பின் ஹமீத் அல்-ருவைலி, இரான் ராணுவ தளபதி மேஜர் ஜெனரல் முகமது பகேரியுடன் இரு நாடுகளின் பாதுகாப்பு உறவுகள் குறித்து பேச்சு வார்த்தை நடத்துவார் என்று இரான் ராணுவத்தின் செய்தி தொடர்பு துறை தெரிவித்துள்ளது.

இரு நாடுகளுக்கும் இடையிலான நேரடி ராணுவ தொடர்பு 2023-ஆம் ஆண்டு தொலைபேசி மூலம் மட்டுமே நடந்ததால் இரான் ஊடகங்கள் இந்த பயணத்தை 'வழக்கத்திற்கு மாறான' ஒன்று என்று குறிப்பிடுகின்றன.

பட மூலாதாரம்,MINISTRY OF DEFENSE IN THE KSA

சௌதி அரேபியாவின் பாதுகாப்பு அமைச்சகம் இந்த பயணம் குறித்த தகவல்களை 'எக்ஸ்' சமூக ஊடகத்தில் பதிவிட்டுள்ளது. இரு நாடுகளும் ராணுவம் மற்றும் பாதுகாப்பு ஒத்துழைப்பு குறித்து பேச்சு வார்த்தை நடத்தவே இந்த சந்திப்பு நடைபெற உள்ளதாக தெரிவித்துள்ளது.

ஆனால், விஷயம் இது மட்டுமல்ல. கடந்த வெள்ளிக்கிழமை அன்று, ஏமென் நாட்டின் ஹத்ரமவுட் மாகாணத்தில் உள்ள சயூன் நகரில் சௌதி அரேபிய ராணுவ முகாம் மீது நடந்த தாக்குதலில், சௌதி அரேபிய அதிகாரி ஒருவரும், ராணுவ வீரர் ஒருவரும் கொல்லப்பட்டனர். இதில் ஒரு நபரும் காயமடைந்தார்.

ஏமெனில் உள்ள அரசாங்கம் சௌதி அரேபியாவின் ஆதரவை பெரும் அதே வேளையில் ஏமெனில் உள்ள ஹூதி ஆயுதக்குழுவை இரான் ஆதரிக்கின்றது.

ஏமெனில் நடந்த இந்த தாக்குதல் 'துரோகம் மற்றும் கோழைத்தனமான' செயல் என்று சௌதி அரேபியா கண்டித்தது.

பட மூலாதாரம்,EPA/RESUTERS

சௌதி அரேபியாவின் குழு இரானுக்குச் சென்றிருந்தபோது, இரான் அதிபர் மசூத் பெசெஷ்கியன் சௌதி அரேபியாவின் பட்டத்து இளவரசர் முகமது பின் சல்மானை தொலைபேசியில் அழைத்துப் பேசியிருந்தார்.

இந்த அழைப்பில் ஐக்கிய இஸ்லாமிய ஒத்துழைப்பு உச்சி மாநாட்டை பற்றி முகமது பின்னிடம், பெசெஷ்கியன் பேசியதாக சௌதி செய்தி முகமை தெரிவித்துள்ளது.

சொல்லப்போனால், இந்த உச்சி மாநாட்டில் பங்கேற்கவே அரபு மற்றும் இஸ்லாமிய நாடுகளின் தலைவர்கள் திங்கட்கிழமை அன்று சௌதி அரேபியாவின் தலைநகர் ரியாத்திற்கு வந்தடைந்தனர்.

இந்த உச்சி மாநாட்டில் தற்போது காஸா மற்றும் லெபனானில் இஸ்ரேல் நடத்தி வரும் போர் குறித்து பேசப்படுகிறது.

இரானின் சார்பாக, துணை அதிபர் முகமது ரெசா ஆரிஃப் இந்த உச்சி மாநாட்டில் பங்கேற்றுள்ளார். இந்த உச்சி மாநாடு வெற்றிகரமாக அமையும் என அதிபர் மசூத் பெசெஷ்கியன் நம்பிக்கை தெரிவித்தார்.

சௌதி அரேபியாவின் அரசு ஊடக முகமையான வஃபா, '' பாலத்தீனம் மற்றும் லெபனான் பகுதிகளில் தற்போது இஸ்ரேல் நடத்தி வரும் மோசமான தாக்குதல் அரபு மற்றும் இஸ்லாமிய நாட்டின் தலைவர்களை உடனடியாக இந்த சந்திப்பு நடத்த கட்டாயப்படுத்தியது'' என்று குறிப்பிட்டுள்ளது.

பாலத்தீனம் மற்றும் லெபனான் பகுதிகளில் இஸ்ரேல் படைகளின் தாக்குதலை நிறுத்துவது, அங்குள்ள பொதுமக்களை பாதுகாப்பது மற்றும் அந்த பிராந்தியத்தில் அமைதி மற்றும் ஸ்திரத்தன்மையை நிலைநாட்ட உலக நாடுகளுக்கு அழுத்தம் கொடுப்பது என்பதே இந்த உச்சி மாநாட்டின் முக்கிய நோக்கமாகும்.

பட மூலாதாரம்,GETTY IMAGES

எதிரி நாடுகளாக இருந்த இரான் மற்றும் சௌதி அரேபியா கடந்த ஆண்டு முதல் நெருக்கமாக நகர தொடங்கின. இரு நாடுகளுக்கும் இடையிலான உறவை மேம்படுத்த சீனா மத்தியஸ்தம் செய்தது.

இரான் போராட்டகாரர்கள் டெஹ்ரான் மற்றும் மஷாத் நகரில் உள்ள சௌதி அரேபியா தூதரகங்களை 2016-ஆம் ஆண்டு தாக்கியதில் இருந்து இரு நாடுகளுக்கு இடையேயான உறவுகள் மோசமாக தொடங்கின.

அக்டோபர் மாதத் தொடக்கத்தில், இரான் வெளியுறவுத்துறை அமைச்சர் அப்பாஸ் அராச்சி ரியாத்துக்கு பயணம் செய்து சௌதியின் பட்டத்து இளவரசரையும் சந்தித்தார்.

அதன்பிறகு இரு நாடுகளுக்கும் இடையேயான உறவுகள் சற்று சரிவர தொடங்கின. கடந்த அக்டோபர் மாதம் இரு நாடுகளும் கூட்டு ராணுவப் பயிற்சியை நடத்தியது.

இரான் உட்பட பல நாடுகளுடன் இணைந்து அரபிக்கடல் பகுதியில் சௌதி அரேபியா கடற்படை ராணுவ பயிற்சி மேற்கொண்டதாக, சௌதி அரேபியாவின் பாதுகாப்பு அமைச்சகம் தெரிவித்தது.

பட மூலாதாரம்,EPA

இஸ்ரேல் புதிய தகவல் ஒன்றை வெளியிட்ட அதே சமயம் இந்த சந்திப்பு நடந்துள்ளது.

பிராந்தியத்தின் பாதுகாப்பை உறுதி செய்வதற்காக ஈலாட் வளைகுடாவில் அமெரிக்கா தலைமையில் இஸ்ரேல், ஜோர்டன், எகிப்த் மற்றும் சௌதி அரேபியா போன்ற நாடுகளை உள்ளடக்கிய ஒரு புதிய கூட்டணி அமைக்கப்படும் என இஸ்ரேல் தெரிவித்தது.

கப்பல் போக்குவரத்து, எண்ணெய் மற்றும் எரிவாயு கிணறுகள் மற்றும் உத்தி ரீதியில் முக்கியத்துவம் வாய்ந்த சொத்துக்களை இரானின் அச்சுறுத்தலில் இருந்து பாதுகாப்பதே, செங்கடலில் இந்த ராணுவ ஒத்துழைப்பின் நோக்கம் என ஞாயிற்றுக்கிழமை அன்று இஸ்ரேல் தெரிவித்துள்ளது.

இரான் மற்றும் அதன் கூட்டணி நாடுகள், இராக் மற்றும் ஏமெனில் கொடுக்கும் அச்சுறுத்தல்களில் இருந்து பாதுகாத்துக் கொள்ள இந்த 'பிராந்திய பாதுகாப்பு கூட்டணி' உருவாக்கப்பட்டது என்று இஸ்ரேல் செய்தி இணையதளமான 'ஜமானே இஸ்ரேல்' செய்தி வெளியிட்டுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு.

https://www.bbc.com/tamil/articles/cqxw3vpele3o

பட மூலாதாரம்,REUTERS

ரஷ்யா- யுக்ரேன் போர் தொடங்கியதில் இருந்து, இதுவரை இல்லாத அளவுக்கு மிகப்பெரிய அளவிலான ட்ரோன் தாக்குதல்களை இரு நாடுகளும் நடத்தியுள்ளன.

மாஸ்கோவை நோக்கி வந்த சில ட்ரோன்கள் உட்பட ஆறு பிராந்தியங்களில் 84 யுக்ரேனிய ட்ரோன்களை இடைமறித்து அழித்ததாக ரஷ்யாவின் பாதுகாப்பு அமைச்சகம் தெரிவித்துள்ளது. இதனால் ரஷ்ய தலைநகர் மாஸ்கோவின் மூன்று முக்கிய விமான நிலையங்களில் விமானங்கள் திருப்பி விடப்பட்டன.

சனிக்கிழமை இரவு, யுக்ரேன் நாட்டின் ஒவ்வொரு பகுதியையும் நோக்கி ரஷ்யா 145 ட்ரோன்களை ஏவியதாகவும், அவற்றில் பெரும்பாலானவை சுட்டு வீழ்த்தப்பட்டதாகவும் யுக்ரேன் விமானப்படை தெரிவித்துள்ளது.

அமெரிக்க அதிபராக தேர்ந்தெடுக்கப்பட்டுள்ள டொனால்ட் டிரம்ப், மோதலை முடிவுக்குக் கொண்டுவர இரு தரப்பினருக்கும் அழுத்தம் கொடுக்கக் கூடும் என்ற எதிர்பார்ப்புகளுக்கு மத்தியில் இந்த தாக்குதல்கள் நடந்துள்ளன.

மாஸ்கோ மீது யுக்ரேன் நடத்திய இந்தத் தாக்குதல் முயற்சி என்பது போர் தொடங்கியதிலிருந்து ரஷ்ய தலைநகர் மீது தொடுக்கப்பட்ட மிகப்பெரிய தாக்குதலாகும். மாஸ்கோ பிராந்திய ஆளுநரும் இதை ‘மிகப்பெரிய அளவிலான தாக்குதல்’ என்றே விவரித்தார்.

ரஷ்யாவின் ரமென்ஸ்கோய், கொலோம்னா மற்றும் டொமோடெடோவோ மாவட்டங்களில் பெரும்பாலான ட்ரோன்கள் சுட்டு வீழ்த்தப்பட்டதாக அதிகாரிகள் தெரிவித்தனர்.

மாஸ்கோவின் தென்மேற்கில் உள்ள ரமென்ஸ்கோய் மாவட்டத்தில், ட்ரோன் பாகங்கள் விழுந்ததால் ஐந்து பேர் காயமடைந்தனர் மற்றும் நான்கு வீடுகள் தீப்பிடித்தன என்று ரஷ்ய பாதுகாப்பு அமைச்சகம் தெரிவித்துள்ளது. அங்கு 34 ட்ரோன்கள் சுட்டு வீழ்த்தப்பட்டதாகவும் பாதுகாப்பு அமைச்சகம் கூறியது.

கடந்த செப்டம்பரில், ரமென்ஸ்கோய் மீது நடந்த ட்ரோன் தாக்குதலில் ஒரு பெண் கொல்லப்பட்டார். கடந்த ஆண்டு மே மாதம், மத்திய மாஸ்கோவில் கிரெம்ளின் அருகே இரண்டு ட்ரோன்கள் அழிக்கப்பட்டன.

யுக்ரேனில், ஒடேசா பிராந்தியத்தில் ட்ரோன் தாக்கியதில் குறைந்தது இரண்டு பேர் காயமடைந்தனர். சில கட்டிடங்களில் இருந்து தீப்பிழம்புகள் எழுவதையும், அதனால் ஏற்பட்ட சேதங்களையும் புகைப்படங்கள் காட்டின.

பட மூலாதாரம்,REUTERS

இரானில் தயாரிக்கப்பட்ட 62 ட்ரோன்கள் சுட்டு வீழ்த்தப்பட்டதாக யுக்ரேன் விமானப்படை தெரிவித்துள்ளது. மேலும் 10 ட்ரோன்கள், யுக்ரேன் வான்வெளியில் இருந்து ரஷ்யா மற்றும் அண்டை நாடுகளான பெலாரஸ் மற்றும் மால்டோவாவை நோக்கிச் சென்றன என்றும் யுக்ரேன் விமானப்படை கூறியுள்ளது.

‘இன்ஸ்டிடியூட் ஃபார் தி ஸ்டடி ஆஃப் வார்’ என்ற அமைப்பின் தரவுகளை பகுப்பாய்வு செய்த ஏ.எஃப்.பி செய்தி முகமை, ‘மார்ச் 2022-க்குப் பிறகு, ரஷ்யப் படைகள் அதிக நிலப்பரப்பைக் கைப்பற்றியதாக கடந்த அக்டோபரில் தகவல்கள் வெளியான நிலையில் இந்த ட்ரோன் தாக்குதல்கள் நடைபெற்றுள்ளன’ என்று கூறியுள்ளது.

ஆனால் பிபிசியிடம் பேசிய, பிரிட்டிஷ் பாதுகாப்புப் படைகளின் தலைமைத் தளபதி சர் டோனி ராடகின், ‘போர் தொடங்கியதிலிருந்து, ரஷ்யா அதன் மிக மோசமான உயிரிழப்புகளை சந்தித்தது கடந்த அக்டோபர் மாதத்தில் தான்’ என்றார்.

ரஷ்யப் படையில், அக்டோபர் மாதத்தில் ‘ஒவ்வொரு நாளும்’ சராசரியாக சுமார் 1,500 பேர் இறந்தனர் மற்றும் காயமடைந்தனர் என்றும் அவர் கூறினார்.

பட மூலாதாரம்,GETTY IMAGES

அமெரிக்காவின் அதிபர் தேர்தலில் வெற்றி பெற்றுள்ள டிரம்ப், ரஷ்யா - யுக்ரேன் போரை எவ்வாறு அணுகுவார் என்பது குறித்து தீவிரமான ஊகங்கள் எழுந்துள்ளன.

அமெரிக்க அதிபராக தேர்ந்தெடுக்கப்பட்டுள்ள டிரம்ப், தனது தேர்தல் பிரசாரத்தில் ‘ஒரே நாளில் தன்னால் ரஷ்யா- யுக்ரேன் போரை முடிவுக்குக் கொண்டுவர முடியும்’ என்று தொடர்ந்து கூறி வந்தார். ஆனால் அவர் அதை எவ்வாறு செய்வார் என்பது குறித்த விவரங்களை வழங்கவில்லை.

டிரம்பின் முன்னாள் ஆலோசகர் பிரையன் லான்சா பிபிசியிடம் கூறுகையில், “வரவிருக்கும் புதிய அமெரிக்க நிர்வாகம், ரஷ்யாவிடம் இருந்து யுக்ரேன் பகுதிகளை திரும்பப் பெறுவதற்கு உதவுவதை விட, இரு நாடுகளுக்கும் இடையே அமைதியை நிலைநாட்டுவதில் தான் கவனம் செலுத்தும்” என்றார்.

இதற்கு பதிலளித்த டிரம்பின் செய்தித் தொடர்பாளர் ஒருவர், “பிரையன் லான்சா ‘டிரம்பின் பிரதிநிதி அல்ல’” என்று கூறி, இப்போதைக்கு இந்த விவகாரத்தில் டிரம்ப் ஏதும் கூறப் போவதில்லை என்றும் தெரிவித்தார்.

ரஷ்ய அதிபர் அலுவலகத்தின் (கிரெம்ளின்) செய்தித் தொடர்பாளர் டிமிட்ரி பெஸ்கோவ், ஞாயிறன்று அரசு ஊடகங்களில் பேசிய போது, ‘புதிய அமெரிக்க நிர்வாகத்திடம் இருந்து ரஷ்யாவிற்கு ‘சாதகமான’ சமிக்ஞைகள் வருவது’ குறித்து தெரிவித்தார்.

“டிரம்ப் தனது தேர்தல் பிரசாரத்தின் போது அமைதியை நிலைநாட்ட விரும்புவதைப் பற்றி தான் பேசினார், ரஷ்யா மீது தோல்வியைத் திணிக்க அவருக்கு விருப்பம் இல்லை” என்று டிமிட்ரி கூறினார்.

அமெரிக்க அதிபர் தேர்தல் வெற்றிக்குப் பிறகு, யுக்ரேன் அதிபர் வொலோதிமிர் ஜெலென்ஸ்கியுடன் டிரம்ப் பேசியுள்ளார். இந்த உரையாடல் சுமார் அரை மணி நேரம் நீடித்ததாக நம்பத்தகுந்த வட்டாரம் பிபிசியிடம் தெரிவித்துள்ளது.

அமெரிக்காவின் உதவி இல்லையென்றால், யுக்ரேன் இந்தப் போரில் தோல்வியடையக் கூடும் என்று ஜெலன்ஸ்கி முன்பு கூறியிருந்தார். ரஷ்யாவுக்கு தங்களின் பிராந்தியத்தை விட்டுக்கொடுப்பதற்கும் அவர் எதிர்ப்பு தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு.

https://www.bbc.com/tamil/articles/cn8gv55v0k1o

பட மூலாதாரம்,REUTERS

அமெரிக்காவில் அமையவிருக்கும் புதிய நிர்வாகம், யுக்ரேன் ரஷ்யாவிடம் இழந்த பிராந்தியங்களை மீட்பதற்கு உதவுவதைக் காட்டிலும், அமைதியை நிலை நிறுத்தவே முக்கியத்துவம் அளிக்கும் என்று டொனால்ட் டிரம்பின் முன்னாள் ஆலோசகர் கூறியுள்ளார்.

ப்ரையன் லான்ஸா என்ற அந்த ஆலோசகர் 2024-ஆம் ஆண்டு அமெரிக்க தேர்தலில் டிரம்பின் பரப்புரை பணிகளில் பங்கேற்றார். பிபிசியிடம் பேசிய அவர், "வருகின்ற புதிய நிர்வாகம், யுக்ரேன் அதிபர் வொலோதிமிர் ஜெலன்ஸ்கியிடம் உள்ள அமைதியை நிலை நிறுத்துவதற்கான திட்டங்கள் என்ன என்று கேட்கும்" என்று கூறினார்.

"அவர் இங்கே வந்து, கிரைமியாவை திரும்பப் பெற்றால்தான் எங்களால் அமைதியாக இருக்க முடியும் என்று கூறினால், அவர் இந்த விவகாரத்தில் தீவிரமாக இல்லை என்று எடுத்துக் கொள்ள வேண்டியது தான்," என்று கூறினார் ப்ரையன்.

டிரம்பின் செய்தித் தொடர்பாளர் ஒருவரிடம் இது குறித்து பேசிய போது டொனால்ட் டிரம்பின் பிரதிநிதியாக ப்ரையன் பேசவில்லை என்று கூறினார்.

2014-ஆம் ஆண்டு ரஷ்யா, கிரைமியா தீபகற்பத்தை தன்னுடைய நாட்டோடு இணைத்தது. 8 ஆண்டுகளுக்குப் பிறகு, யுக்ரேன் மீது முழுவீச்சில் போர் தொடுத்த ரஷ்யா, யுக்ரேனின் கிழக்கு பகுதியில் அமைந்திருக்கும் பிராந்தியங்களை கைப்பற்றியது.

அமெரிக்க அதிபராக தேர்வு செய்யப்பட்டிருக்கும் டொனால்ட் டிரம்ப் தொடர்ச்சியாக போரை நிறுத்துவது குறித்தும், யுக்ரேனுக்கான உதவிகளை குறைப்பது குறித்தும் பேசி வருகிறார். அவரைப் பொறுத்தமட்டில் யுக்ரேனுக்கு ராணுவ ரீதியாக அளிக்கும் உதவிகள் அமெரிக்காவின் வளங்களில் பற்றாக்குறையை ஏற்படுத்துகிறது.

ஆனால் தற்போது வரை, இந்த போரை அவர் எவ்வாறு நிறுத்துவார் என்பது குறித்து ஏதும் வெளிப்படையாக தெரிவிக்கவில்லை. ஆனால் யுக்ரேன் விவகாரத்தில் தன்னுடைய ஆலோசகர்களின் கருத்துகள் அனைத்தையும் அவர் கேட்கலாம் என்று எதிர்பார்க்கப்படுகிறது.

டிரம்பிற்கு ஆலோசகராக 2016 மற்றும் 2024 தேர்தல்களில் செயல்பட்ட ப்ரையன், பிபிசியிடம் பேசும் போது யுக்ரேனின் கிழக்கு பிராந்தியம் குறித்து ஏதும் பேசவில்லை. ஆனால் ரஷ்யாவிடம் இருந்து கிரைமியாவைப் பெறுவது சாத்தியமற்றது என்றும் அமெரிக்காவின் இலக்கு அது அல்ல என்றும் கூறினார்.

ஜெலன்ஸ்கி , எங்களுக்கு கிரைமியா கிடைத்தால் மட்டுமே சண்டையிடுவதை நிறுத்துவோம் என்று கூறினால் அவருக்காக நாங்கள் ஒரு செய்தியை வைத்திருக்கிறோம். அது என்னவென்றால், "கிரைமியா ஏற்கனவே கையைவிட்டு சென்றுவிட்டது," என்று பிபிசியின் உலக சேவையில் அவர் தெரிவித்தார்.

கிரைமியாவை திரும்பப் பெறுவதற்கு அமெரிக்க வீரர்கள் போரிட வேண்டும் என்று நீங்கள் நினைத்தால் அதனை நீங்கள் தனியாக தான் செய்ய வேண்டும் என்றும் அவர் கூறினார்.

அமெரிக்கா தன்னுடைய துருப்புகளை யுக்ரேனுக்கு போருக்காக அனுப்பவில்லை. கீவும் அமெரிக்க துருப்புகளை அனுப்புங்கள் என்று கோரிக்கையும் வைக்கவில்லை. தங்களுடைய ராணுவ வீரர்களுக்கு அமெரிக்க ராணுவம் உதவ வேண்டும் என்று தான் கோரிக்கை வைத்திருக்கிறது யுக்ரேன்.

யுக்ரேன் மக்கள் மீது அளவு கடந்த மரியாதை வைத்திருப்பதாக தெரிவித்த அவர், அவர்கள் சிங்கங்களைப் போன்ற பலமான இதயங்களைக் கொண்டவர்கள் என்று குறிப்பிட்டார். மேலும், "ஆனால் அமெரிக்காவின் முன்னுரிமை அமைதியை நிலைநிறுத்துவதும், உயிரிழப்புகளை தடுப்பதும் தான்," என்றார்.

"அமைதிக்கான உண்மையான பார்வை என்ன? அது வெற்றி பெறுவதில் அல்ல. மாறாக அமைதியை உருவாக்கக் கூடியது. நாம் ஒரு நேர்மையான உரையாடலை தொடங்குவோம் என்று தான் யுக்ரேனிடம் கூற இருக்கிறோம்," என்றார் அவர்.

பட மூலாதாரம்,EPA

இதற்கு பதில் அளித்த, ஜெலென்ஸிகியின் ஆலோசகர் திம்த்ரோ லைட்வைன், ப்ரையனின் கருத்துகள் அமைதிக்காக யுக்ரேன் மீது அழுத்தம் தருவது போன்று இருக்கிறது. உண்மையில் ரஷ்ய அதிபர் புதின் தான் போரை நீட்டிக்கிறார்," என்று கூறினார்.

"2022ம் ஆண்டில் இருந்தே நாங்கள் அமைதிக்கான பேச்சுவார்த்தைக்கு தயாராக இருக்கிறோம். சாத்தியமான முன்மொழிவுகளை தான் நாங்கள் முன்வைத்தோம். ஆனால், அமைதி வேண்டும் என்றும், அது சாத்தியமானது என்றும் ரஷ்யாவைத் தான் கேட்க வைக்க வேண்டும்," என்று அவர் கூறினார்.

டிரம்பின் வருங்கால நிர்வாகத்தை அமைக்க இருக்கும் குழுவின் செய்தித் தொடர்பாளர் இது குறித்து பேசும் போது, "ப்ரையன் பிரசார நிகழ்வுக்காக நியமிக்கப்பட்ட ஒரு ஒப்பந்ததாரர். அவர் டொனால்ட் டிரம்பின் கீழ் பணியாற்றவும் இல்லை. அவரின் கருத்துகளை பிரதிபலிக்கவும் இல்லை" என்று கூறினார்.

அதிகாரத்திற்கு வந்த பிறகு, நெருங்கிய வட்டங்களுடன் அமர்ந்து இந்த விவகாரத்தை எப்படி கையாளுவது என்பது குறித்து டொனால்ட் பேசுவார் என்று எதிர்பார்க்கப்படுகிறது.

வால் ஸ்ட்ரீட் ஜேர்னல் இதழில், டிரம்பின் கீழ் தேசிய பாதுகாப்பு கவுன்சிலில் பணியாற்றிய, பெயர் குறிப்பிடாத அதிகாரி ஒருவர், "ட்ரம்பின் வட்டாரத்தில் ஒருவர் எவ்வளவு மூத்தவராக இருந்தாலும் சரி, டிரம்பின் திட்டங்கள் குறித்து நன்றாக தெரிந்து வைத்திருப்பதாக கூறினாலோ, அல்லது மாறுபட்ட கருத்துகளை கொண்டிருப்பதாக தெரிவித்தாலோ, அவர்கள் என்ன பேசுகின்றார்கள் என்று அவர்களுக்கே தெரியவில்லை என்று தான் எடுத்துக் கொள்ள வேண்டும்," என்று கூறியுள்ளார்.

நாட்டின் பாதுகாப்பு விவகாரங்கள் குறித்து எடுக்கப்படும் எந்த முடிவையும் தானாக எடுக்கும் பழக்கத்தை டிரம்ப் கொண்டிருக்கிறார் என்றும், பல நேரங்களில் அந்த நொடியில் எடுக்கப்படும் முடிவுகளாகவே அவை இருந்திருக்கின்றன என்றும் அவர் கூறினார்.

தேர்தல் வெற்றிக்குப் பிறகு ஜெலென்ஸிகியுடன் போனில் உரையாடினார் டிரம்ப். அந்த அழைப்பில் ஈலோன் மஸ்க்கும் உடனிருந்ததாக கூறப்படுகிறது.

ஒரு மணி நேரத்திற்கும் மேலாக இரு நாட்டு தலைவர்களும் போனில் உரையாடினார்கள் என்று யுக்ரேனின் அதிபர் அலுவலக தரப்பில் இருந்து பிபிசியிடம் தெரிவிக்கபப்ட்டது.

"மிக முக்கியமான விவகாரங்களுக்கான அழைப்பு போன்று அது இல்லை. அமைதியான முறையில் மகிழ்ச்சியான ஒரு உரையாடலாக அது இருந்தது," என்று யுக்ரேன் அதிபர் அலுவலக தரப்பில் கூறப்பட்டது.

பட மூலாதாரம்,GETTY IMAGES

புதினுடன் இணைந்து பணியாற்றுவது குறித்து ஜனநாயகக் கட்சியினர் டிரம்ப் மீது குற்றச்சாட்டுகளை வைத்தனர். யுக்ரேனை அடிபணிய வைக்கும் நோக்கில் தான் அவர் போரை அணுகுகிறார் அது ஒட்டுமொத்த ஐரோப்பாவையும் ஆபத்தில் கொண்டு போய் நிறுத்திவிடும் என்றும் குற்றம்சுமத்துகின்றனர்.

எஸ்தோனியாவின் பிரதமர் பிபிசியிடம் பேசும் போது, யுக்ரேன் இந்த போரில் பின்வாங்கிவிட்டால், ரஷ்யாவின் பசி அதிகரிக்கத்தான் செய்யும் என்றார்.

சண்டே வித் லாரா குவென்ஸ்பெர்க் என்ற பிபிசி நிகழ்ச்சியில் பேசிய கிறிஸ்டன் மைக்கேல், "நீங்கள் பின்வாங்க முடிவு செய்துவிட்டால், அதற்காக அதிகம் இழக்க நீங்கள் தயாராக இருக்க வேண்டும்," என்று கூறினார்.

"நீங்கள் எங்காவது ஒரு எல்லைக் கோட்டை நிர்ணயம் செய்து, அங்கே படைகளைக் கொண்டு அந்த பகுதியை காக்க நினைத்தால் ரஷ்யாவும் அதையே செய்யும். ஆனால் அதனை பொறுமையாக செய்யாது. அது திட்டத்திலேயே இல்லை" என்றார் அவர்.

கடந்த மாதம் 'வெற்றிக்கான திட்டம்' ஒன்றை நாடாளுமன்றத்தில் சமர்;gபித்தார் அதிபர் ஜெலன்ஸ்கி. அதில், யுக்ரேனின் பிராந்தியங்களையும் இறையாண்மையையும் இணைக்க மறுத்தல் என்ற சொற்றொடரும் இடம் பெற்றிருந்தது.

தேர்தல் பிரசாரங்களின் போது ஒரே நாளில் போரை நான் நிறுத்திவிடுவேன் என்று டிரம்ப் கூறிக் கொண்டே இருந்தார். ஆனால், அதனை அவர் எவ்வாறு செய்வார் என்பது குறித்த விவரம் எதையும் வழங்கவில்லை.

அமெரிக்கா தொடர்ந்து ஆயுதங்களை வழங்கலாம். ஆனால் ரஷ்யாவுடன் அமைதிப் பேச்சுவார்த்தைக்கு யுக்ரேன் ஒப்புக்கொள்ள வேண்டும் என்ற நிர்பந்தம் அங்கே இருக்க வேண்டும் என்று, டிரம்பின் முன்னாள் பாதுகாப்பு ஆலோசகர்கள் இருவர் எழுதிய ஆராய்ச்சிக் கட்டுரையில் குறிப்பிடப்பட்டிருந்தது.

"போரில் தான் இழந்த பிராந்தியங்களை மீட்கும் செயல்பாடுகளை யுக்ரேன் கைவிடக் கூடாது. ஆனால் அது தற்போதைய எல்லைகளின் அடிப்படையில் அதற்கான பேச்சுவார்த்தையை துவங்க வேண்டும்" என்றும் குறிப்பிடப்பட்டிருந்தது.

இந்த வாரத்தின் துவக்கத்தில் தேர்தலில் வெற்றி பெற்ற டொனால்ட் டிரம்பை வாழ்த்தினார் புதின்.

2022-ஆம் ஆண்டு பிப்ரவரி மாதம் ரஷ்யா யுக்ரேன் மீது துவங்கிய படையெடுப்பிற்கு பிறகு யுக்ரேனுக்கு பைடன் - ஹாரிஸ் நிர்வாகம் மற்றும் ஐரோப்பிய நாடுகள் வழங்கிய ஆதரவையும் ப்ரையன் விமர்சனம் செய்தார்.

"உண்மை நிலவரம் என்னவென்றால், பைடன் நிர்வாகமோ, ஐரோப்பிய நாடுகளோ இந்த போரில் யுக்ரேன் வெல்வதற்கு தேவையான ஆயுதங்களை வழங்கவில்லை. யுக்ரேன் வெல்வதற்கு தடையாக இருக்கும் அம்சங்களையும் அவர்கள் அகற்றவில்லை" என்று குற்றம்சுமத்தினார் அவர்.

இந்த ஆண்டின் துவக்கத்தில், அமெரிக்காவின் பிரதிநிதிகள் சபை, ரஷ்யாவுக்கு எதிரான யுத்தத்தில் யுக்ரேனுக்கு உதவ 61 பில்லியன் அமெரிக்க டாலர்களை வழங்க ஒப்புதல் அளித்தது.

யுக்ரேனுக்கு அதிக அளவில் ஆயுதங்களை விநியோகிக்கும் நாடாக அமெரிக்கா உள்ளது. 2022 பிப்ரவரி துவங்கி 2024 ஜூன் வரையான காலகட்டங்களில் 55.5 பில்லியன் அமெரிக்க டாலர்கள் மதிப்பிலான உதவிகளை அமெரிக்கா வழங்கியுள்ளது அல்லது தருவதாக ஒப்புக் கொண்டுள்ளது என்று ஜெர்மனியைச் சேர்ந்த ஆராய்ச்சி அமைப்பான கியெல் இன்ஸ்டிட்யூட் ஃபார் தி வேர்ல்ட் எக்கானமி தெரிவித்துள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/c98edn239lpo

பட மூலாதாரம்,BILLY HENRI

இந்தியப் பெருங்கடலில் அமைந்துள்ள அகலேகா எனும் சிறிய தீவிலிருந்து வெளியேற வேண்டுமென அர்னௌ பூலே ஒருபோதும் நினைத்ததில்லை. ஆனால், தன்னுடைய சொந்த ஊரை ராணுவமயப்படுத்துவதாகக் கூறி, இந்தாண்டு தன்னுடைய உடைமைகளுடன் நொறுங்கிய இதயத்துடன், இங்கிருந்து புறப்பட்டார்.

சமீப காலம் வரை அகலேகா தீவில் வெறும் 350 பேர் மட்டும்தான் மீன்பிடித்தல் மற்றும் தென்னைகளை வளர்ப்புப் பணிகளில் ஈடுபட்டு வந்தனர்.

மற்ற உணவுப்பொருட்கள், தெற்கில் 1,100 கி.மீ. தொலைவில் உள்ள மொரீஷியஸின் தலைநகரிலிருந்து கப்பல் மூலம் ஆண்டுக்கு நான்கு முறை இங்கு வந்திறங்கும். அவசரகால மருத்துவ சேவைகளுக்காக, விதிவிலக்காக சிறிய நிலப்பகுதி விமானத்தின் ஓடுபாதையாக பயன்படுத்தப்பட்டுள்ளது.

ஆனால், அகலேகாவை உள்ளடக்கிய தீவு நாடான மொரீஷியஸ், இந்தியாவின் 3,000 மீட்டர் நீளத்தில் விமான ஓடுதளம் மற்றும் புதிய, பெரியளவிலான படகுத்துறை அமைக்க வழிவகுக்கும் ஒப்பந்தத்தில் கையெழுத்திட்டது. கடல்வழி பாதுகாப்பில் இருநாடுகளுக்கும் இடையே ஒத்துழைப்பை ஆழப்படுத்தும் ஒருபகுதியாக இந்த ஒப்பந்தம் ஏற்படுத்தப்பட்டது.

ஆனால், இது முழு அளவிலான ராணுவ தளமாக மாறக்கூடும் என அகலேகா தீவை சேர்ந்த சிலர் அச்சத்தில் உள்ளனர்.

கைவினை கலைஞரும் ரெக்கே இசைக் கலைஞருமான (மேற்கத்திய இசை வகை) 44 வயதான அர்னௌ பூலே, இத்திட்டத்திற்கு எதிரான இயக்கத்தை வழிநடத்தி வருகிறார்.

"நான் என் தீவை நேசிக்கிறேன். இந்த தீவு என்னை நேசிக்கிறது," என்கிறார் அவர். "ஆனால், அந்த தளம் அமைக்கப்பட்டால் நான் வெளியேற வேண்டும் என்பது எனக்கு தெரியும்." என்று அவர் கூறுகிறார்.

பட மூலாதாரம்,ARNAUD POULAY

இந்தியப் பெருங்கடலில் தென்மேற்கு பகுதியில் சுமார் 25 சதுர கி.மீ பரப்பளவில் அமைந்திருக்கும் இரு சிறிய தீவுகள்தான் அகலேகா. இந்தியா கடல்வழி போக்குவரத்தைக் கண்காணிக்க இது சிறந்த இடமாக இருக்கக்கூடும். கடந்த 2019-ஆம் ஆண்டு எடுக்கப்பட்ட செயற்கைக்கோள் படங்களை இந்தாண்டு ஜூலை மாதம் எடுக்கப்பட்ட படங்களுடன் ஒப்பிடுகையில், அப்பகுதி எந்தளவுக்கு மாறியுள்ளது என்பது புலப்படுகிறது.

வடக்குத் தீவின் மையத்தில், வடக்கில் லா ஃபோர்ச்சே மற்றும் தெற்கில் விங்-சிங்க் ஆகிய இரு கிராமங்களை உள்ளடக்கி, பனை மர வரிசைகளுக்கு நடுவே ஓடுதளம் அமைக்கப்பட்டுள்ளது.

விமான நிறுத்துமிடத்தில் 60 மீட்டர் அகலமுள்ள இரு கட்டடங்கள் இருப்பதாகவும், அதில் ஒரு கட்டடம் இந்திய கடற்படையின் பி-81(P-8I) விமானத்தை நிறுத்திவைப்பதற்கான கட்டடமாக இருக்கலாம் என்றும், ஆஸ்திரேலிய தேசிய பல்கலைக்கழகத்தின் பிஹெச்டி ஆய்வாளரான சாமுவேல் பேஷ்ஃபீல்ட் தெரிவித்தார்.

பி-81 விமானம் நீர்மூழ்கி கப்பல்களை தாக்குவதற்கும் கடல்வழி தகவல் தொடர்புகளை கண்காணிப்பதற்கும் ஏற்ப மாற்றியமைக்கப்பட்ட போயிங் 737 ரக விமானம் ஆகும். விமான ஓடுதளத்தில் அந்த விமானம் இருப்பதை தீவுவாசிகள் ஏற்கனவே படம் எடுத்துள்ளனர்.

வடமேற்கில் புதிய கப்பல் துறை அமைந்துள்ளது. இந்திய கடலோர பாதுகாப்பு கப்பல்களுக்காகவும் அகலேகாவுக்கு சரக்குகளை கொண்டு வரும் கப்பல்களுக்காகவும் அது பயன்படுத்தப்படலாம் என்று பேஷ்ஃபீல்ட் கூறுகிறார்.

"புதிய செயற்கைக்கோள் படங்கள் கிடைத்திருப்பதால், இந்தியப் பெருங்கடல் தகவல் தொடர்பில் அகலேகா தீவின் பங்கை நாம் இன்னும் சிறப்பாக புரிந்துகொள்ளலாம்," என்கிறார் அவர்.

இந்த தளத்தை "கண்காணிப்பு நிலையம்" என்கிறது, இன்டர்நேஷனல் இன்ஸ்டிட்யூட் ஃபார் ஸ்டிராட்டஜிக் ஸ்டடீஸ் எனும் நிறுவனம். மொரீஷியஸின் மற்ற இடங்களில் உள்ள, இந்தியாவால் உருவாக்கப்பட்ட சாதனத்தை ஒத்த கடலோர ரேடார் கண்காணிப்பு அமைப்பும் அதில் இருக்கலாம் என்றும் அந்நிறுவனம் தெரிவிக்கிறது.

பட மூலாதாரம்,L'ASSOCIATION LES AMIS D'AGALEGA

அகலேகா குறித்த கேள்விகளுக்கு பதிலளிக்க மறுத்துள்ள இந்திய அரசாங்கம், தங்களின் இணையதளத்தில் உள்ள முந்தைய கூற்றுகளை பிபிசியிடம் குறிப்பிட்டது. அதில் ஒன்றில், இந்திய பிரதமர் நரேந்திர மோதி, இந்தியாவும் மொரீஷியஸும் வழக்கமான மற்றும் வழக்கத்திற்கு மாறான சவால்களை எதிர்கொண்டு வரும் இந்திய பெருங்கடல் பிரதேசத்தில் கடல் பாதுகாப்பு தொடர்பான "கூட்டாளிகள்" என தெரிவித்திருந்தார்.

இரு நாடுகளும் 1970கள் முதல் பாதுகாப்பு தொடர்பாக நெருங்கிய உறவை கொண்டுள்ளன. மொரீஷியஸின் தேசிய பாதுகாப்பு ஆலோசகர், கடலோர காவல்படையின் தலைவர் மற்றும் காவல்துறையின் ஹெலிகாப்டர் படைப்பிரிவின் தலைவர் ஆகியோர் இந்தியர்கள் ஆவர். அவர்கள் முறையே இந்தியாவின் உளவு முகமை, விமானப்படை, மற்றும் கடற்படை ஆகியவற்றில் அதிகாரிகளாக உள்ளனர்.

"இந்த தளத்தை ராணுவ பயன்பாட்டு தளமாக அல்லாமல், திறனை மேம்படுத்தும் ஒன்றாக" இரு தரப்பும் பார்க்க விரும்புவதாக, லண்டன் கிங்ஸ் காலேஜின் பேராசிரியர் ஹர்ஷ் பந்த் கூறுகிறார்.

இந்திய பெருங்கடலில் சீனாவின் இருப்பு அதிகரித்து வருவது குறித்து இந்தியாவும் அதன் நட்பு நாடுகளும் கவலை கொண்டுள்ளன என்பதில் எந்த ரகசியமும் இல்லை.

ஒரு பெரிய நாடு சிறிய நாடு ஒன்றின் பிரதேசத்தில் ராணுவ தளம் அமைப்பது வழக்கத்திற்கு மாறானது அல்ல என்றாலும், அகலேகாவில் நடைபெறும் கட்டுமான பணிகள், தீவுவாசிகள் சிலரை தொந்தரவு செய்துள்ளன.

அத்தீவில் பனை மரங்கள் நெடுக உள்ள வெள்ளை-மணல் கடற்கரைகள் உட்பட பல பகுதிகள் ஏற்கனவே இப்பணிக்காக சுற்றி வளைக்கப்பட்டுள்ளதாக அவர்கள் கூறுகின்றனர். வளர்ந்து வரும் இந்திய கட்டுமானங்களுக்காக லா ஃபோர்ச்சே கிராமமே காலி செய்யப்படலாம் என்றும், அங்கு வசிக்கும் 10 குடும்பங்கள் வெளியேற்றப்படலாம் என்றும் அங்கே தொடர்ந்து வதந்தி நிலவுகிறது.

"இந்தியர்களுக்கு மட்டுமேயான முழுமையாக கட்டுப்படுத்தப்பட்ட பகுதியாக அது மாறும்," என 'ஃபிரெண்ட்ஸ் ஆஃப் அகலேகா' எனும் சங்கத்தின் தலைவர் லாவல் சூப்ரமணியென் (Laval Soopramanien) கூறுகிறார்.

"சாகோஸ் தீவுகளின் கதை போன்று அகலேகாவும் மாறிவிடும்" என அவர் அஞ்சுகிறார். சாகோஸ் தீவுகளிலிருந்து வெளியேற்றப்பட்ட பெண் மற்றும் அகலேகாவை சேர்ந்த ஒருவரின் 26 வயது மகனான கைவினைஞர் பில்லி ஹென்றியும் இதே கவலையை எதிரொலிக்கிறார்.

"என் தாய் அவருடைய தீவை இழந்தார்," என்கிறார் ஹென்றி. "அடுத்து என் தந்தை இழக்கப் போகிறார்." என்று அவர் கூறினார்.

பட மூலாதாரம்,YOHAN HENRI

கிழக்கில் 2,000 கி.மீ. தொலைவில் உள்ள சாகோஸ் தீவுகளிலிருந்து வெளியேற்றப்பட்ட குடும்பங்களை சேர்ந்த பலர் தான் அகலேகா தீவில் வசித்துவருகின்றனர்.

1965-ம் ஆண்டில் சாகோஸ் தீவை பிரிட்டிஷ் பிரதேசமாக அறிவித்து, அதன் பெரிய தீவான டியகோ கார்சியா (Diego Garcia) தீவில் தகவல் தொடர்பு நிலையம் அமைக்க அமெரிக்காவுக்கு பிரிட்டன் அரசாங்கம் அனுமதி வழங்கியதையடுத்து வெளியேற்றப்பட்டவர்கள் அவர்கள். டியகோ கார்சியா தீவு பின்னர், படிப்படியாக முழு அளவிலான ராணுவ தளமாக மாறியது.

அகலேகாவின் முழு பகுதியையும் தங்கள் கட்டுப்பாட்டில் வைத்துள்ள அரசாங்கம், அனைவரும் வெளியேறும் அளவுக்கு நிலைமையை மோசமானதாக ஆக்க முயற்சிப்பதாக பில்லி ஹென்றி அச்சத்தில் உள்ளார்.

சுகாதாரம் மற்றும் கல்வி, உள்ளூர் பொருளாதாரத்தில் குறைவான முதலீடு, வேலைவாய்ப்புகளுக்கான பற்றாக்குறை மற்றும் உள்ளூர் மக்கள் தங்கள் சொந்த தொழில்களை தொடங்குவதற்கு நிலவும் தடை ஆகியவற்றில் உள்ள பிரச்னைகளை அவர் சுட்டிக்காட்டுகிறார்.

யாரையும் வெளியேறுமாறு கூற மாட்டோம் என, மொரீஷியஸ் அரசாங்கத்தின் செய்தித் தொடர்பாளர் ஒருவர் பிபிசியிடம் தெரிவித்தார். உள்ளூர் மக்கள் விமான நிலையம் மற்றும் துறைமுக பகுதிக்குள் நுழைவது மட்டும் தடுக்கப்படும் என்றும் கடற்கொள்ளை, போதைப்பொருள் கடத்தல் மற்றும் ஒழுங்குபடுத்தப்படாத மீன்பிடித்தல் ஆகியவற்றை கட்டுப்படுத்த இந்நடவடிக்கை நாட்டுக்கு உதவும் என்றும் அவர் கூறினார்.

முழு கட்டுப்பாடும் தேசிய காவல் துறையிடமே உள்ளதாக கூறியுள்ள மொரீஷியஸ், அகலேகாவில் ராணுவ தளம் அமைக்கப்படும் என்ற கூற்றுகளை மறுத்துள்ளது. எனினும், இந்திய செலவில் மேற்கொள்ளப்படும் அப்புதிய கட்டுமானங்களின் "நிர்வாகம் மற்றும் செயல்பாடு" ஆகியவற்றில் இந்தியா உதவி செய்யும் என்று அது உறுதிப்படுத்தியுள்ளது.

பட மூலாதாரம்,MAXAR

கடல்வழி மற்றும் வான்வழி போக்குவரத்தில் செய்யப்படும் முன்னேற்றங்கள் தீவில் வசிக்கும் மக்களுக்கு பயனளிக்கும் வகையிலேயே செய்யப்படுவதாகவும் வறுமையிலிருந்து அவர்களை வெளியேற்ற அவை உதவும் என்றும் இருநாட்டு அரசாங்கங்களும் தெரிவித்துள்ளன.

ஆனால், அவ்வாறு நடக்கவில்லை என உள்ளூர் மக்கள் கூறுகின்றனர். மொரீஷியஸின் தலைநகருக்கு செல்ல ஆண்டுதோறும் நான்கு படகு சேவைகள் மட்டுமே இன்னும் இயக்கப்படுவதாகவும் பயணிகள் விமானம் இல்லையென்றும் அவர்கள் கூறுகின்றனர்.

இந்தியாவால் கட்டப்பட்ட மருத்துவமனைக்கு செல்ல தங்களுக்கு தடையிருப்பதாகவும் அகலேகா தீவு மக்கள் கூறுகின்றனர். மொரீஷியஸ் அரசாங்கத்தின் செய்தி அறிக்கை ஒன்று, அதன் அறுவை சிகிச்சை அரங்கம், எக்ஸ்-ரே இயந்திரங்கள் மற்றும் பல் மருத்துவ உபகரணங்கள் குறித்து பெருமையாக குறிப்பிட்டாலும் இத்தடை இருப்பதாக கூறுகின்றனர்.

கடந்த அக்டோபர் மாதம் கொதிக்கும் சமையல் எண்ணெய் ஏற்படுத்திய தீக்காயத்தால் பாதிக்கப்பட்ட சிறுவன் ஒருவருக்கு மேல் சிகிச்சை தேவைப்பட்ட நிலையில், அம்மருத்துவமனைக்கு அழைத்துச் செல்லப்பட்ட போது அனுமதி மறுக்கப்பட்டதாக பில்லி ஹென்றி கூறுகிறார்.

"அது இந்தியர்களுக்கு மட்டுமேயானதாக இருக்கிறது" என்கிறார் அவர்.

பாதிக்கப்பட்ட சிறுவனும் அவருடைய பெற்றோரும் மொரீஷியஸ் தலைநகருக்கு சென்றனர். இன்னும் அச்சிறுவன் மருத்துவமனையில் தான் இருப்பதாகக் கூறும் லாவல் சூப்ரமணியென், அகலேகாவுக்கு அடுத்த கப்பல் புறப்படும் வரை அச்சிறுவனின் குடும்பம் அதே தீவில் தான் இருக்க வேண்டும் என்றும் கூறுகிறார்.

தீக்காயத்தால் பாதிக்கப்பட்ட அச்சிறுவனின் நிலை குறித்து கேட்ட போது, அதுகுறித்து மொரீஷியஸ் அரசாங்கம் பதிலளிக்கவில்லை. இதுதொடர்பாக பதிலளிக்க இந்திய அரசாங்கம் மறுத்துவிட்டது.

சமீபத்தில் மொரீஷியஸ் நாடாளுமன்றத்தில் பேசிய பிரதமர் பிரவீந்த் ஜூகனௌத், அகலேகா தீவின் சமூக-பொருளாதார வளர்ச்சிக்கு தங்கள் அரசு முன்னுரிமை அளிப்பதாக தெரிவித்தார்.

சுகாதாரம், கல்வி, போக்குவரத்து தொடர்புகள், மக்களுக்கான பொழுதுபோக்கு வசதிகள், மீன்பிடி துறையில் வளர்ச்சி மற்றும் தேங்காய் மதிப்புகூட்டு பொருட்கள் ஆகியவற்றை மேம்படுத்த "பெரும் திட்டம்" (master plan) உருவாக்கப்பட்டுள்ளதாகவும் அவர் கூறினார்.

ஆனால், கடந்த 2015-ம் ஆண்டில் போடப்பட்ட புரிந்துணர்வு ஒப்பந்தம் குறித்து இந்தியாவோ அல்லது மொரீஷியஸோ எவ்வித தகவல்களையும் வெளியிடாததால் மக்களிடையே நம்பிக்கையின்மை அதிகரித்துள்ளது, எனவே, எதிர்காலத்திற்கான அவர்களின் திட்டங்கள் குறித்து தெரியவில்லை.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/c5yrpg2m734o

பட மூலாதாரம்,GETTY IMAGES

அமெரிக்க அதிபராகத் தேர்ந்தெடுக்கப்படுவதற்கு முன்பு, டொனால்ட் டிரம்பைக் கொல்ல சதித் திட்டம் தீட்டியதாக ஆஃப்கானிஸ்தான் நாட்டவர் மீது அமெரிக்க அரசாங்கம் குற்றம் சாட்டியுள்ளது. இது இரானில் உருவான சதித்திட்டம் என்றும் அமெரிக்கா கூறுகிறது.

ஆஃப்கானிஸ்தானை சேர்ந்த, 51 வயதான ஃபர்ஹாத் ஷகேரி என்பவருக்கு எதிரான குற்றச்சாட்டுகளை அமெரிக்க நீதித்துறை வெள்ளிக்கிழமை அறிவித்தது. டிரம்பைக் கொல்ல 'திட்டமிட்டதாக’ ஃபர்ஹாத் மீது குற்றம் சாட்டப்பட்டுள்ளது.

ஷகேரி இன்னும் கைது செய்யப்படவில்லை என்றும் அவர் இரானில் இருப்பதாக நம்பப்படுவதாகவும் அமெரிக்க அரசு தெரிவித்துள்ளது. இந்த கூற்றுகள் "முற்றிலும் ஆதாரமற்றவை" என்று இரான் கூறியுள்ளது.

மன்ஹாட்டன் நீதிமன்றத்தில் தாக்கல் செய்யப்பட்டுள்ள புகாரில், இரானின் புரட்சிகர காவலர் படையை சேர்ந்த ஒரு அதிகாரி, டிரம்பை கண்காணிக்கவும், அவரை படுகொலை செய்வதற்கான திட்டத்தை தயாரிக்கவும் செப்டம்பர் மாதம் ஷகேரிக்கு உத்தரவிட்டதாக வழக்கறிஞர்கள் குற்றம் சாட்டியுள்ளனர்.

அமெரிக்க அட்டர்னி ஜெனரல் மெரிக் கார்லண்ட் ஒரு அறிக்கையில், "அமெரிக்காவின் புதிய அதிபர் டொனால்ட் டிரம்ப் உட்பட பலரை படுகொலை செய்யும் திட்டத்தில் குற்றவாளிகளின் வலையமைப்பை வழிநடத்த நியமிக்கப்பட்ட இரானிய அரசாங்க முகவர் மீது அமெரிக்க நீதித்துறை குற்றம் சாட்டியுள்ளது” என்று குறிப்பிட்டுள்ளார்.

இது தவிர, இந்த வழக்கில் மேலும் இருவர் மீதும் நீதித்துறை குற்றச்சாட்டுகளை முன்வைத்துள்ளது. இரானை வெளிப்படையாக கடுமையாக விமர்சிக்கும் ஒரு அமெரிக்க பத்திரிகையாளரைக் கொல்ல ஆள்சேர்ப்பு நடவடிக்கையில் ஈடுபட்டதாகக் கூறப்படும் வழக்கில் அவர்கள் குற்றம்சாட்டப்பட்டனர்.

இந்த இரண்டு பேரின் அடையாளங்களை நீதித்துறை வெளியிட்டுள்ளது. ஒருவர் நியூயார்க்கின் புரூக்ளினில் வசித்த 49 வயதான கார்லைல் ரிவேரா. மற்றொருவர் நியூயார்க்கிற்கு அருகிலுள்ள ஸ்டேட்டன் தீவைச் சேர்ந்த 36 வயதான ஜொனாதன் லேண்ட்ஹோல்ட் என அறிவிக்கப்பட்டுள்ளது.

இருவரும் வியாழன் அன்று நியூயார்க்கின் தெற்கு மாவட்ட நீதிமன்றத்தில் ஆஜர்படுத்தப்பட்டனர். அவர்களின் வழக்கு விசாரணை நிலுவையில் இருப்பதால் காவலில் வைக்கப்பட்டனர்.

இரானின் வெளியுறவு அமைச்சக செய்தித் தொடர்பாளர் எஸ்மாயில் பாகேய் கூறுகையில், "அமெரிக்க அதிபர்களைக் கொல்ல முயற்சித்ததாக கூறுப்படும் இதுபோன்ற குற்றச்சாட்டுகள் கடந்த காலங்களிலும் கூறப்பட்டன. அதை இரான் மறுத்தது, அதன் பின்னர் அவை பொய்யான குற்றச்சாட்டுகள் என தெரிய வந்தது." என்றார்.

எஸ்மாயில் வெளியிட்ட அறிக்கையில் அவர் மேலும் கூறியதாவது, "இதுபோன்ற கூற்றுகளை மீண்டும் மீண்டும் கூறுவது அமெரிக்காவிற்கும் இரானுக்கும் இடையிலான பிரச்னைகளை மேலும் சிக்கலாக்கும் அபாயம் உள்ளது" என்றார்.

டிரம்ப் இந்த ஆண்டு இரண்டு வெவ்வேறு கொலை முயற்சிகளை எதிர்கொண்டார். ஜூலை மாதம், பென்சில்வேனியா பேரணியின் போது ஒருவர் நடத்திய துப்பாச்சூட்டில் அவரது காது பகுதியில் காயம் ஏற்பட்டது.

செப்டம்பரில், வெஸ்ட் பால்ம் பீச்சில் கோல்ப் விளையாடிக் கொண்டிருந்த டிரம்பை நோக்கி துப்பாக்கியால் சுட்ட ஒரு நபர் கைது செய்யப்பட்டார். அந்த தாக்குதலிலும் டிரம்ப் உயிர் பிழைத்தார்.

வழக்கறிஞர்கள் கூற்றுபடி, ஆப்கானிஸ்தான் நாட்டவரான ஷகேரி குழந்தையாக இருந்தபோது அமெரிக்காவிற்கு வந்தார். ஒரு திருட்டு குற்றத்திற்காக 14 ஆண்டுகள் சிறையில் இருந்த அவர் இறுதியில் 2008 இல் அமெரிக்காவிலிருந்து நாடு கடத்தப்பட்டார்.

"51 வயதான அவர் இரானிய அரசாங்கம் குறி வைத்திருந்த இலக்குகளை கண்காணிப்பதற்காக சிறையில் இருந்த ரிவேரா மற்றும் லோடோல்ட் போன்றவர்களை பயன்படுத்தி உள்ளார். அவர்கள் "குற்றவாளிகளின் வலையமைப்பாக" கருதப்படுகின்றனர்” என வழக்கறிஞர்கள் கூறுகின்றனர்.

வழக்கறிஞர்கள் வெளியிட்ட அறிக்கையில், இரானில் மனித உரிமைகள் மற்றும் ஊழலின் நிலையை விமர்சித்த அமெரிக்க பத்திரிகையாளரின் கொலைக்கு ஈடாக ரிவேரா மற்றும் லோடோல்ட் ஆகியோருக்கு $100,000 கொடுப்பதாக ஷகேரி வாக்குறுதி அளித்ததாகக் கூறப்பட்டுள்ளது.

அந்த அறிக்கையில் பத்திரிகையாளரின் பெயர் குறிப்பிடப்படவில்லை. ஆனால் இதற்கு முன்பும் இரான் அரசின் இலக்காக அவர் இருந்ததாக கூறப்படுகிறது.

வெள்ளிக்கிழமை சமூக ஊடகங்களில் ஒரு பதிவில், புரூக்ளினை தளமாகக் கொண்ட பெண் பத்திரிகையாளர் மசிஹ் அலினெஜாட், தன்னைக் கொல்ல முயன்றதற்காக இரண்டு பேரை எஃப்.பி.ஐ. கைது செய்ததாக பதிவிட்டுள்ளார். கொலையாளிகள் என்று கூறப்படும் நபர்கள் புரூக்ளினில் உள்ள தனது வீட்டின் முன் வந்ததாக அவர் கூறினார்.

"பேச்சு சுதந்திரத்திற்கான எனது உரிமையை நடைமுறைப்படுத்த தான் நான் அமெரிக்காவிற்கு வந்தேன். நான் இறக்க விரும்பவில்லை" என்று மசிஹ் அலினெஜாட் குறிப்பிட்டுள்ளார்.

"நான் கொடுங்கோன்மைக்கு எதிராக போராட விரும்புகிறேன், எனக்கு பாதுகாப்பு மிகவும் அவசியம்” என்றும் பதிவிட்டுள்ளார்.

அமெரிக்க பத்திரிகையாளர் மற்றும் டிரம்ப் ஆகிய இருவரைத் தவிர, சமூக ஊடகங்களில் இஸ்ரேலுக்கு ஆதரவாக இருந்த நியூயார்க் நகரில் வசிக்கும் இரண்டு யூத அமெரிக்க தொழிலதிபர்களைக் கொல்லவும் இரானிய அரசாங்கம் முயன்றதாகவும் குற்றம்சாட்டப்படுகிறது.

இஸ்ரேல் மீது ஹமாஸ் நடத்திய தாக்குதல்களுக்கு ஒரு வருடம் கழித்து, 2024 அக்டோபரில் இலங்கையில் உள்ள இஸ்ரேலிய சுற்றுலாப் பயணிகளைக் குறிவைத்து துப்பாக்கிச் சூடு நடத்த திட்டமிடுமாறு தன்னுடன் தொடர்பில் இருக்கும் இரானிய முகவர்கள் கூறியதாகவும் ஷகேரி வழக்கறிஞர்களிடம் கூறியுள்ளார்.

ஷகேரி, ரிவேரா மற்றும் லோட்ஹோல்ட் ஆகியோர் அனைவரும் பணத்திற்காக கொலை செய்ததாக குற்றம் சாட்டப்பட்டுள்ளனர். இவர்களுக்கு அதிகபட்சமாக 10 ஆண்டுகள் சிறைத்தண்டனை விதிக்கப்படும். அவர்கள் மீது பணமோசடி, கொலைக்கு சதி செய்தல் உள்ளிட்ட வழக்குகளும் உள்ளதால் 20 ஆண்டுகள் வரை சிறைத்தண்டனை கிடைக்கலாம்.

- இது, பிபிசிக்காக கலெக்டிவ் நியூஸ்ரூம் வெளியீடு.

https://www.bbc.com/tamil/articles/clyv922j1z7o