பட மூலாதாரம்,GETTY IMAGES

தமிழ்நாட்டில் தனிக்கட்சி தொடங்கியுள்ள நடிகர் விஜய், அதன் கொடியை அறிமுகம் செய்த பிறகு வாகை மலர் அதிக அளவில் பேசுபடு பொருளாக மாறியுள்ளது. அந்த கொடியின் மையத்தில் வாகை மலர் இருப்பதே அதற்குக் காரணம்.

சமூக வலைதளங்களிலும் ஊடகங்களிலும் வாகை மலர் குறித்த பல்வேறு தகவல்களும் தொடர்ச்சியாக பதிவு செய்யப்பட்டு வருகின்றன.

வாகை மலருக்கும் தமிழ்நாட்டிற்கும் என்ன தொடர்பு? தமிழர் வாழ்க்கையில் அதன் முக்கியத்துவம் என்ன?

பட மூலாதாரம்,TVK HQ

தாவரவியல் பெயர் : அல்பிசியா லெப்பெக்

குடும்பம் : ஃபபேசியா

வாகை மரம் 5-20 மீட்டர் உயரம் வளரும தன்மையுடையது. வாகையில் சிறுவகை ,பெருவாகை, நிலவாகை, காட்டு வாகை, செவ்வாகை, கருவாகை, தூங்குவாகை என பல வகைகள் உள்ளன.

சங்க காலத்தில் போரில் வெற்றி பெறும் வீரர்கள் வாகை மலர் சூடி வெற்றிக் களிப்பை பகிர்ந்ததாக தமிழ் இலக்கியங்களில் குறிப்புகள் உள்ளன. தற்போது கூட விளையாட்டுப் போட்டிகளில் வெற்றி பெற்றவர்களை "வெற்றி வாகை சூடினார்" என்று அழைப்பதையும், புகழ்வதையும் கேட்க முடியும் என்கிறார் கள்ளக்குறிச்சி அரசு கலை மற்றும் அறிவியல் கல்லூரியில் பணிபுரியும் தமிழ் துறை பேராசிரியர் முனைவர். நாகராஜன்.

"போரில் வெற்றி பெற்றவர்கள் சூடுவது வாகை மலர்க் கொத்தாகும். வாகைப்பூவை வெற்றிப் பூ என்பர். வாகைப் பூ தமிழ் கடவுள் கொற்றவைக்கு உரியதாகும்" என்று அவர் கூறினார்.

மிக மெல்லிய இழைகளாலான மயில்களின் தலையில் இருக்கும் கொண்டை போல் உள்ள இந்த வாகை மலர் இலக்கிய பாடல்களில் பல்வேறு இடங்களில் பதிவு செய்யப்பட்டுள்ளது.

வாகை என்பது வாழ்க்கையின் மேம்பட்ட வெற்றிநிலையைக் குறிப்பது என்று தொல்காப்பியம் குறிப்பிட்டுள்ளது. வெற்றி பெற்ற அரசனும் அவனது வீரர்களும் வெற்றியின் அடையாளமாக வாகைப்பூவைச் சூடி வெற்றியைக் கொண்டாடுதலைக் குறிக்கும் என்று புறப்பொருள் வெண்பாமாலை குறிப்பிடுகிறது.

வாகை என்பதற்குத் தொல்காப்பிய உரையாசிரியர் இளம்பூரணர், "ஒழுக்கத்தான் மிகுதல் வாகையாம்" எனக் குறிப்பிடுவது வாகை என்பது வெற்றியின் அடையாளம் என்பதனைத் தெளிவுபடுத்தும் குறிப்பாகும்.

போர்களில் வெற்றி பெற்றவர்கள் ‘வாகை’ சூடியவராவர்.

“வடவனம் வாகை வான்பூங் குடசம்”

என்று குறிஞ்சிப் பாட்டு பாடல் வரிகள் குறிப்பிடுகிறது.

வாகையின் பூ ஆண் மயிலின் தலைக்குடுமி போல் இருக்கும் என்பதை,

"குமரி வாகை கோல் உடை நறு வீ

மட மா தோகை குடுமியின் தோன்றும்"

என்ற குறுந்தொகையின் பாடல் வரிகள் மூலம் அறிய முடியும்.

வாகைப்பூ பஞ்சுபோல் மென்மையாக இருக்கும், அதன் இலைகள் இரண்டிரண்டாகப் பிரிந்திருக்கும் என்பதை "மென் பூ வாகை புன் புற கவட்டு இலை " என்ற அகத்திணை பாடல் வரிகள் உணர்த்துகின்றது.

சிற்றரசன் நன்னனது கொங்கண நாட்டில் வாகை மரம் மிகுதி. அவன் வாகை மரத்தைக் காவல் மரமாகக் கொண்டான். அதனைக் கழங்காய்ச் சென்னி நார் முடிச் சேரல் என்ற மற்றொரு சிற்றரசன் வெட்டி வீழ்த்தினான். இதை,

“பொன்படு கொண்கான நன்னன் நன்னாடு ”

“பொன்அம் கண்ணி பொலந்தேர் நன்னன் சுடர்வீ வாகைக் கடிமுதல் தடிந்த தார்மிகு மைந்தின் நார்முடிச் சேரல்”

என்ற வரிகள் மூலம் அறிய முடியும். இலக்கியப் பாடல்களில் வாகை மலர் பற்றி அதிகமான குறிப்புகள் உள்ளன.

பட மூலாதாரம்,GETTY IMAGES

தமிழர்கள் தங்களின் வாழ்வியல் அடிப்படையில் நிலங்களை குறிஞ்சி, முல்லை, மருதம், நெய்தல், பாலை என்று ஐந்து வகைகளாக பிரித்தனர். அதில் வயலும் வயல் சார்ந்த இடமும் மருத நிலப்பகுதி என்று அழைக்கப்படுகிறது.

இந்த நிலப் பரப்பிற்கு சொந்தமான மலர் வாகை மலராகும். மருதம் விவசாயம் மற்றும் மேய்ச்சல் நிலப்பரப்பை குறிக்கிறது.

"பண்டைய காலத்திலும் தமிழர்கள் விவசாயத்தில் சிறந்து விளங்கினர். அதன்படி அந்த நிலப்பரப்பிற்கு சொந்தமான வாகை மலரை வெற்றியின் அடையாளமாகக் கருதி அதை சூடியிருக்கலாம்" என்று முனைவர் நாகராஜன் கூறினார்.

மேலும் தொடர்ந்த அவர் "பெண்கள் இதை காதணியாக அணிந்து கொள்வர் என்று சங்க நூல்கள் தெரிவிக்கின்றன. அக்கால தமிழ் மக்களின் இறை வழிபாட்டில் பூக்கள் முக்கியத்துவம் கொண்டிருந்தன. அவை சிலைகளை அலங்கரிப்பதற்கும் பயன்படுத்தப்பட்டன. பூக்கள் வெற்றியின் அடையாளமாக மங்களகரமான சின்னமாக பார்க்கப்பட்டன. அப்படித்தான் வெற்றியின் பின்னணியில் வாகை மலர் அடையாளப்படுத்தப்பட்டிருக்கும்" என்றார்.

https://www.bbc.com/tamil/articles/cr40dng01ryo

பட மூலாதாரம், ASHISH VAISHNAV/SOPA IMAGES/LIGHTROCKET VIA GETTY IMAGES

கொல்கத்தாவில் பெண் மருத்துவர் பாலியல் வன்புணர்வு செய்யப்பட்டு கொலை செய்யப்பட்ட சம்பவம் ஒட்டுமொத்த இந்தியாவையும் அதிர்ச்சியில் ஆழ்த்தியுள்ளது.

இந்த அதிர்ச்சியில் இருந்து மீள்வதற்குள் மகாராஷ்டிராவின் பத்லாபூரில் உள்ள ஒரு பள்ளியில் இரண்டு சிறுமிகள் பாலியல் வன்புணர்வுக்கு ஆளாயினர்.

இந்த சம்பவங்களை தொடர்ந்து அப்பகுதிகளில் பொது மக்கள் சாலை மறியலில் ஈடுபட்டனர். குற்றவாளிகளுக்கு மரண தண்டனை வழங்க வேண்டும் என்று வலியுறுத்தினர்.

இந்த சூழலில், ஜனநாயக சீர்திருத்தங்களுக்கான கூட்டமைப்பு (ஏடிஆர் : Association for Democratic Reforms) புதன்கிழமை (ஆகஸ்ட் 21 ) வெளியிட்ட அறிக்கையின்படி, 151 எம்எல்ஏக்கள் மற்றும் எம்பிக்கள் மீது பெண்களுக்கு எதிரான குற்றங்களில் ஈடுபட்டதாக வழக்குகள் பதிவு செய்யப்பட்டுள்ளன.

300 பக்கங்கள் கொண்ட இந்த அறிக்கையில் பெண்களுக்கு எதிரான குற்றங்கள் மற்றும் வன்புணர்வு செய்ததாக எத்தனை எம்.பி.க்கள் மற்றும் எம்.எல்.ஏ.க்கள் குற்றம் சாட்டப்பட்டுள்ளனர் என்பது பற்றிய தகவல்கள் உள்ளன. இது தவிர, எந்தெந்த கட்சியை சேர்ந்த எத்தனை எம்.எல்.ஏ.க்கள், எம்.பி.,க்கள் இந்த பட்டியலில் உள்ளனர் என்ற தகவலும் தெரிவிக்கப்பட்டுள்ளது.

இந்த அறிக்கைக்காக, நாட்டில் உள்ள 4,809 எம்பிக்கள் மற்றும் எம்எல்ஏக்களில் 4,693 பேர் தேர்தல் ஆணையத்தில் சமர்ப்பித்த பிரமாணப் பத்திரங்களை ஏடிஆர் மற்றும் நேஷனல் எலக்ஷன் வாட்ச் அமைப்புகள் இணைந்து ஆய்வு செய்துள்ளன.

இந்த பிரமாணப் பத்திரங்கள் மூலம், எம்.எல்.ஏ.,க்கள், எம்.பி.,க்கள், தங்களுக்கு எதிராக பதிவு செய்யப்பட்ட வழக்குகள் குறித்த தகவல்களை அளித்துள்ளனர். இதில் 776 எம்.பி.க்களில் 755 பேரின் பிரமாணப் பத்திரங்களும், 4,033 எம்.எல்.ஏக்களில் 3,938 பேரின் பிரமாணப் பத்திரங்களும் அடங்கும்.

2019 முதல் 2024 வரை நடைபெற்ற இடைத்தேர்தல்கள் உட்பட அனைத்து தேர்தல்களின் போது தாக்கல் செய்யப்பட்ட பிரமாணப் பத்திரங்களில் இருந்து ஏடிஆர் மற்றும் நேஷனல் எலக்ஷன் வாட்ச் அமைப்புகள் இந்தத் தகவல்களைச் சேகரித்துள்ளன.

பெண்களை துன்புறுத்தல் செய்ததாக எந்தெந்த எம்.பி., எம்.எல்.ஏ.க்கள் மீது வழக்குப்பதிவு செய்யப்பட்டுள்ளது என்பது குறித்த விரிவான தகவல்கள் இந்த அறிக்கையில் தெரிவிக்கப்பட்டுள்ளன.

பெண் மீது ஆசிட் வீச்சு, பாலியல் வன்கொடுமை, பாலியல் துன்புறுத்தல், வன்புணர்வு, பெண்ணின் ஆடையைக் களைவதற்காக ஒரு பெண்ணைத் தாக்குதல், ஒரு பெண்ணைப் பின்தொடர்தல், மைனர் பெண்களை பாலியல் தொழிலுக்காக வாங்குவது மற்றும் விற்பது, கணவன் அல்லது உறவினர்களால் பெண்கள் துன்புறுத்தப்படுவது ஆகிய குற்றங்கள் இதில் அடங்கும்.

திருமணமான பெண்ணை வேண்டுமென்றே பின்தொடர்வது அல்லது கடத்திச் செல்வது, அந்தப் பெண்ணின் அனுமதியின்றி வலுக்கட்டாயமாக சேர்ந்து வாழ்வது, முதல் மனைவி உயிருடன் இருக்கும்போதே வேறொரு பெண்ணைத் திருமணம் செய்து கொள்வது மற்றும் வரதட்சணைக் கொலை ஆகியவையும் இதில் அடங்கும்.

பட மூலாதாரம், DIBYANGSHU SARKAR/AFP VIA GETTY IMAGES

ஏடிஆர் அறிக்கையின்படி, 755 எம்.பி.க்கள் மற்றும் 3,938 எம்.எல்.ஏ.க்களில் 151 எம்.எல்.ஏ.க்கள் மற்றும் எம்.பி.க்கள் பெண்களை துன்புறுத்துவது தொடர்பான குற்றங்களில் தங்கள் மீது வழக்கு பதியப்பட்டுள்ளது குறித்து பிரமாணப் பத்திரங்களில் தெரிவித்துள்ளனர். இதில் 16 எம்பிக்களும், 135 எம்எல்ஏக்களும் அடங்குவர்.

பாலியல் வன்புணர்வு, பெண்களிடம் தவறாக நடந்து கொள்ளுதல், பாலியல் வன்கொடுமை, மைனர் சிறுமிகளை பாலியல் தொழிலுக்காக கடத்தல், குடும்ப வன்முறை போன்ற குற்றங்கள் பிரமாணப் பத்திரத்தில் குறிப்பிடப்பட்டுள்ளன.

பெண்களுக்கு எதிரான வன்கொடுமை தொடர்பான வழக்குகள் நிலுவையில் உள்ள 151 மக்கள் பிரதிநிதிகளில், எந்தக் கட்சியில் எத்தனை பேர் உள்ளனர் என்ற தகவலும் ஏடிஆர் மற்றும் `நேஷனல் எலெக்ஷன் வாட்ச்’ அறிக்கையில் தெரிவிக்கப்பட்டுள்ளது.

அதன்படி, நாடு முழுவதும் 135 எம்.பி. மற்றும் எம்எல்ஏக்கள் மீது பெண்களுக்கு எதிரான குற்ற வழக்குகள் நிலுவையில் உள்ளன. அதிகபட்சமாக பாஜகவைச் சேர்ந்த 54 மக்கள் பிரதிநிதிகள் மீது இத்தகைய வழக்குகள் கொண்டுள்ளது. காங்கிரஸில் 23, தெலுங்கு தேசம் கட்சியில் 17, ஆம் ஆத்மி கட்சியில் 13, அகில இந்திய திரிணாமுல் காங்கிரஸில் 10, ராஷ்டிரிய ஜனதா தளத்தின் 5 பேர் மீது இத்தகைய வழக்குகள் நிலுவையில் உள்ளன.

பாஜக எம்எல்ஏ தேவயானி ஃபராண்டே பிபிசியிடம் கூறுகையில், "அரசியல் ரீதியான வெறுப்பு காரணமாக பல நேரங்களில் தலைவர்கள் மீது பொய் வழக்குகள் பதிவு செய்யப்படுகின்றன. ஆனால் பெண்கள் துன்புறுத்தப்பட்ட சம்பவங்கள் மிகவும் வருந்தத்தக்கது. பெண்கள் மீதான வன்கொடுமைகளை அரசியலாக்கக் கூடாது." என்றார்.

"பெண்களை துன்புறுத்துவது தொடர்பான குற்றப் பின்னணி கொண்ட தலைவர்களை நியமனம் செய்யும் போது, அவர்களின் ஆளுமைத் தன்மையை ஆய்வு செய்து அதன் பின்னரே வேட்புமனுவை அனுமதிக்க வேண்டும்” என்கிறார் அவர்.

ஏடிஆர் மற்றும் நேஷனல் எலெக்ஷன் வாட்ச் ஆகியவை மாநில வாரியாக எம்.எல்.ஏ.க்கள் மற்றும் எம்.பி.க்களின் எண்ணிக்கை குறித்து தங்கள் அறிக்கைகளில் தெரிவித்துள்ளன.

இதன்படி, மேற்கு வங்கத்தில் அதிகபடியான மக்கள் பிரதிநிதிகள் மீது பெண்களுக்கு எதிரான குற்ற வழக்குகள் உள்ளன. அடுத்தபடியாக ஆந்திராவில் அதிகளவிலான மக்கள் பிரதிநிதிகள் மீது வழக்குகள் உள்ளன.

இந்த எண்ணிக்கை மேற்கு வங்கத்தில் 25 (21 எம்எல்ஏக்கள், 4 எம்பிகள்), ஆந்திராவில் 21 (21 எம்எல்ஏக்கள்), ஒடிசாவில் 17 (16 எம்எல்ஏக்கள், 1 எம்பி), டெல்லி மற்றும் மகாராஷ்டிராவில் 13 (டெல்லியில் 13 எம்எல்ஏக்கள், மகாராஷ்டிராவில் 12 எம்எல்ஏக்கள் மற்றும் 1 எம்.பி) ஆக உள்ளது.

இது தவிர, பிகாரில் 9, கர்நாடகாவில் 7, ராஜஸ்தானில் 6, மத்தியப் பிரதேசம், கேரளா மற்றும் தெலங்கானாவில் 5-5, குஜராத், தமிழ்நாடு மற்றும் உத்தரபிரதேசத்தில் தலா 4, ஜார்கண்டில் 3, பஞ்சாபில் 2, அசாம் மற்றும் கோவாவில் தலா 2, இமாச்சலப் பிரதேசம், மணிப்பூர், தாத்ரா நகர் ஹவேலி மற்றும் டாமன் டையூவில் தலா ஒருவருக்கு எதிராக பெண்களை துன்புறுத்தல் செய்ததாக வழக்குகள் உள்ளன.

தேர்தல் ஆணையத்திடம் உள்ள வேட்பாளர்களின் பிரமாணப் பத்திரங்களை ஏடிஆர் மற்றும் நேஷனல் எலெக்ஷன் வாட்ச், அமைப்புகள் பகுப்பாய்வு செய்ததில், 151 எம்.பி. மற்றும் எம்.எல்.ஏ.க்களுக்கு எதிராக பெண்களை துன்புறுத்தியதாக வழக்குகள் உள்ளன. இவர்களில் 16 பேர் மீது வன்புணர்வு வழக்குகள் உள்ளன. இவர்களில் 2 பேர் எம்.பி.க்கள், 14 பேர் எம்.எல்.ஏ.க்களாக உள்ளனர்.

மாநில வாரியாகப் பார்த்தால், மத்தியப் பிரதேசம் முதலிடத்தில் உள்ளது. அங்கே 2 பேர் மீது வன்புணர்வு வழக்குகள் பதிவு செய்யப்பட்டுள்ளன. மேற்கு வங்கத்தைச் சேர்ந்த எம்.பி. மீதும் இதே போன்ற குற்றச்சாட்டு பதிவு செய்யப்பட்டுள்ளது.

ஆந்திரா, அசாம், டெல்லி, கோவா, குஜராத், ஜார்கண்ட், கர்நாடகா, கேரளா, மகாராஷ்டிரா, ஒடிசா மற்றும் தமிழ்நாடு ஆகிய மாநிலங்களைச் சேர்ந்த தலா ஒருவர் மீது பாலியல் வன்புணர்வில் ஈடுபட்டதாக குற்றம் சாட்டப்பட்டுள்ளது. தெலங்கானா எம்.பி., மீது வன்புணர்வு வழக்கு பதிவு செய்யப்பட்டுள்ளது.

கட்சி வாரியாக, வன்புணர்வு வழக்குகள் பதிவு செய்யப்பட்ட பொதுப் பிரதிநிதிகளில், அதிகபட்சமாக பாஜகவைச் சேர்ந்த 5 பேர் (3 எம்எல்ஏக்கள், 2 எம்பிக்கள்) மற்றும் காங்கிரஸில் 5 பேர் உள்ளனர்.

இது தவிர, ஆம் ஆத்மி, திரிணாமுல் காங்கிரஸ், அகில இந்திய ஐக்கிய ஜனநாயக முன்னணி (AIUDF), பாரத் ஆதிவாசி கட்சி மற்றும் பிஜு ஜனதா தளம் (BJD) ஆகிய கட்சிகளைச் சேர்ந்த தலா ஒரு எம்எல்ஏ மீது வன்புணர்வு வழக்கு உள்ளது.

பாலியல் வன்புணர்வு வழக்குகள் பதிவு செய்யப்பட்ட தலைவர்களின் பெயர்களும் அறிக்கையில் கொடுக்கப்பட்டுள்ளன. குற்றச்சாட்டுகள் முன்வைக்கப்பட்ட பின்னர் இந்த தலைவர்கள் பலர் மீது வழக்கு பதிவு செய்யப்பட்டது. ஆனால் குற்றச்சாட்டுகள் இன்னும் நிரூபிக்கப்படவில்லை. சில வழக்குகளின் விசாரணை இன்னும் நீடிக்கிறது.

இந்த தலைவர்கள் ஒவ்வொருவரும் அப்போது தங்கள் மீதான குற்றச்சாட்டுகளை மறுத்துள்ளனர். ஆனால், தேர்தல் ஆணையத்திடம் அளித்த பிரமாணப் பத்திரத்தில் வழக்குகள் குறித்து அவர்கள் தகவல் தெரிவித்துள்ளனர்.

ஒருபுறம், நாட்டில் பெண்களுக்கு எதிரான வன்முறை சம்பவங்கள் தொடர்கின்றன. பெண்களின் பாதுகாப்பு குறித்த விவாதம் தீவிரமாக நடந்து கொண்டிருக்கிறது. மற்றொரு புறம் நாட்டில் தேர்ந்தெடுக்கப்பட்ட தலைவர்கள் குறித்த இதுபோன்ற அறிக்கைகள் வெளியாகின்றன.

இதனை பெண் அரசியல் ஆய்வாளர்கள் எப்படி பார்க்கிறார்கள்?

மூத்த பத்திரிகையாளர் பிரதிமா ஜோஷி பிபிசியிடம், "இவ்வாறு குற்றம்சாட்டப்பட்டவர்கள் எவரும் சமீப காலத்தில் அரசியலுக்கு வந்தவர்கள் இல்லை. காலம்காலமாக அரசியலில் இருப்பவர்கள். இந்த குற்றச் சம்பவங்கள் படிப்படியாக அதிகரித்து வருகின்றன. அதிகாரத்தில் இருப்பவர்கள் மீதே குற்றச்சாட்டுகள் இருக்கும் போது நீதியை எப்படி எதிர்பார்க்க முடியும்?"

"பில்கிஸ் பானோ வழக்கில், குற்றம் சாட்டப்பட்டவர்கள் கால அவகாசம் முடிவதற்குள் விடுவிக்கப்பட்டனர். இது வெட்கக் கேட்டின் உச்சம். இது போன்ற நபர்களுக்கு ஆளும் வர்க்கம் அடைக்கலம் கொடுப்பதாகத் தெரிகிறது. சாதாரண பெண்கள் யாரிடம் நீதியை எதிர்பார்க்க வேண்டும்? இந்த போக்கு அரசியலில் ஈடுபடும் பெண்களின் எண்ணிக்கையை குறைத்துள்ளது." என்று அவர் கூறினார்.

இதுபோன்ற தலைவர்களுக்கு தேர்தலில் களம் காண தொகுதி ஒதுக்கீடு செய்வது அனைத்து அரசியல் கட்சிகளின் பாசாங்குத்தனம் என்று மூத்த பத்திரிகையாளர் நீரஜா சவுத்ரி நம்புகிறார்.

அவர் பிபிசியிடம், "பெண்களுக்கு எதிரான துன்புறுத்தல் வழக்குகள் பதிவு செய்யப்பட்ட எம்.எல்.ஏ.க்கள் மற்றும் எம்.பி.க்களின் எண்ணிக்கை மிகப் பெரியது. அரசியல் கட்சிகள் பெரிய தலைவர்களுக்கு தேர்தலில் போட்டியிட வாய்ப்பு கொடுக்கின்றன. அவர்கள் மீது பதிவு செய்யப்பட்ட குற்றங்களை புறக்கணிக்கப்படுகின்றன. பெண்களுக்கு எதிரான குற்றங்களில் ஈடுபட்டதாக வழக்குகள் பதிவு செய்யப்பட்டாலும் தேர்தலில் போட்டியிட வாய்ப்பு கொடுப்பது கவலைக்குரிய விஷயம்?" என்கிறார் அவர்.

"ஒருபுறம், அரசியல் கட்சிகளே நீதியைப் பற்றிப் பேசுகின்றன, உரிமைகளுக்காக குரல் எழுப்புகின்றன, மறுபுறம், குற்ற வழக்குகளில் சிக்கியவர்களை தேர்தலில் களமிறக்குகின்றன. இது அனைத்து அரசியல் கட்சிகளின் பாசாங்குத்தனம். 2024 இன் இந்தியாவை நினைத்து அவர்கள் வெட்கப்பட வேண்டும்" என்று நீரஜா கூறுகிறார்.

https://www.bbc.com/tamil/articles/c984n5ldl0po

பட மூலாதாரம்,GETTY IMAGES

கிருஷ்ணகிரி மாணவி பாலியல் வன்கொடுமை வழக்கில் கைதான போலி என்.சி.சி ஆசிரியர் சிவராமனும் அவரது தந்தையும் அடுத்தடுத்து மரணம் அடைந்துள்ளனர்.

இந்த வழக்கில் யாரையோ காப்பாற்றும் முயற்சியாக, தந்தை, மகன் இருவரின் மரணங்களும் நிகழ்ந்துள்ளனவா என்ற பலத்த சந்தேகம் எழுவதாக, தமிழக பா.ஜ.க தலைவர் அண்ணாமலை கேள்வி எழுப்பியுள்ளார்.

முன்னதாக, மாணவியை பாலியல் வன்கொடுமை செய்ததாக பெறப்பட்ட புகாரின் அடிப்படையில், காவேரிபட்டினத்தைச் சேர்ந்த போலி என்.சி.சி பயிற்சியாளர் சிவராமன், தனியார் பள்ளி முதல்வர் சதீஷ்குமார் ஆகியோர் மீது போக்சோ வழக்குப் பதிவு செய்யப்பட்டது.

இந்த வழக்கில் சேலம் சரக டி.ஐ.ஜி உமா, கிருஷ்ணகிரி, மாவட்ட எஸ்.பி., தங்கதுரை ஆகியோர் நேரில் விசாரணை நடத்தினர். இதையடுத்து, சிவராமன், பள்ளி தாளாளர் வெஸ்லி, முதல்வர் சதீஷ், ஆசிரியை ஜெனிபர், போலி என்.சி.சி பயிற்சியாளர் சக்திவேல் உள்பட 11 பேர் கைது செய்யப்பட்டனர்.

கிருஷ்ணகிரி மாவட்டத்தில் உள்ள அனைத்து மகளிர் காவல் நிலையத்தில் கடந்த ஆகஸ்ட் 17 ஆம் தேதி புகார் ஒன்று பதிவானது. அந்தப் புகாரின் அடிப்படையில் பதிவான முதல் தகவல் அறிக்கையில் அதிர்ச்சியூட்டும் தகவல்கள் இடம்பெற்றுள்ளன.

ஆகஸ்ட் 5ஆம் தேதி குற்றம் சுமத்தப்பட்டுள்ள தனியார் பள்ளியில் என்.சி.சி முகாம் ஒன்று நடந்தது. இந்த முகாமில் பாதிக்கப்பட்ட மாணவியுடன் சேர்த்து 17 மாணவிகள் பங்கேற்றனர். ஆகஸ்ட் 8 ஆம் தேதி அதிகாலையில் என்.சி.சி அலுவலர் எனக் கூறப்படும் சிவராமன் என்பவர், எட்டாம் வகுப்பு மாணவி ஒருவரை பாலியல் ரீதியாக துன்புறுத்தியதாக அந்த குற்றச்சாட்டில் குறிப்பிடப்பட்டுள்ளது.

தனக்கு நேர்ந்த கொடூரத்தை சக மாணவிகளிடமும் ஆசிரியைகளிடமும் மாணவி தெரியப்படுத்தியுள்ளார். சீனியர் மாணவிகளுடன் இணைந்து பள்ளியின் தலைமை ஆசிரியரிடமும் மாணவி முறையிட்டுள்ளார். அவரோ, 'இந்த விவகாரத்தை பெரிதுபடுத்த வேண்டாம். உங்கள் பெற்றோருக்கு தெரிந்தால் வருத்தப்படுவார்கள்' எனக் கூறி மாணவியை திருப்பி அனுப்பியதாக முதல் தகவல் அறிக்கையில் கூறப்பட்டது.

இந்த சம்பவத்துக்குப் பிறகு மாணவிக்கு உடல்நலக் குறைவு ஏற்பட்டுள்ளது. இதுதொடர்பாக, மாணவியின் பெற்றோர் விசாரித்தபோது தான், நடந்த கொடூரம் வெளியில் தெரியவந்துள்ளது. இதையடுத்து, மாணவி தரப்பில் அளிக்கப்பட்ட புகாரின் அடிப்படையில், சிவராமன், பள்ளி தாளாளர், முதல்வர், ஆசிரியை உள்பட 11 பேர் போக்சோ சட்டத்தின்கீழ் கைது செய்யப்பட்டனர்.

தேசிய மாணவர் படையின் தமிழ்நாடு, புதுச்சேரி, அந்தமான் நிகோபார் தலைமை அலுவலம் வெளியிட்டுள்ள செய்திக் குறிப்பில், கிருஷ்ணகிரியில் நடந்தது போலியான என்.சி.சி முகாம் என்றும் முகாம் நடத்தியவர்களுக்கும் என்.சி.சி அமைப்புக்கும் எந்த தொடர்பும் இல்லை எனத் தெரிவித்துள்ளது.

“என்.சி.சி முகாமுக்காக பதிவு செய்யப்பட்ட பட்டியலில் இந்தப் பள்ளி இல்லை. கிருஷ்ணகிரியில் என்.சி.சி சார்பில் முகாம்களும் நடத்தப்படவில்லை,” என அந்த அறிக்கையில் தெரிவிக்கப்பட்டுள்ளது.

பட மூலாதாரம்,GETTY IMAGES

கைது செய்யப்பட்ட சிவராமன், வலது காலில் கட்டுப்போடப்பட்ட நிலையில் சிகிச்சை பெறுவது போன்ற புகைப்படம் வெளியானது. அவர் போலீஸ் காவலில் இருந்து தப்ப முயன்றதாகவும் இதனால் அவரது வலது காலில் எலும்பு முறிவு ஏற்பட்டதாகவும் கூறப்பட்டது.

இந்த வழக்கில் கைதான சிவராமன், நாம் தமிழர் கட்சியின் கிருஷ்ணகிரி கிழக்கு மாவட்ட இளைஞர் பாசறைச் செயலாளராகவும் பதவி வகித்துள்ளார். வழக்கு தொடர்பான செய்திகள் வெளிவந்த நிலையில், அக்கட்சியில் இருந்து அவர் நீக்கப்பட்டதாக அறிவிப்பு வெளியானது.

இந்த நிலையில், உடல்நலக் குறைவு காரணமாக சேலம் மோகன் குமாரமங்கலம் அரசு மருத்துவமனையில் அனுமதிக்கப்பட்ட சிவராமன், சிகிச்சைப் பலனின்றி வெள்ளிக்கிழமை அதிகாலை மரணம் அடைந்ததாக போலீஸ் தரப்பில் தெரிவிக்கப்பட்டுள்ளது.

அதற்கு முதல் நாள் இரவு சிவராமனின் தந்தை அசோக்குமார், காவேரிபட்டினம் அருகே இருசக்கர வாகனத்தில் சென்று கொண்டிருந்தபோது, நிலை தடுமாறிக் கீழே விழுந்து உயிரிழந்ததாகத் தகவல் வெளியானது.

சிவராமன் மரணம் குறித்து காவல்துறை வெளியிட்டுள்ள செய்திக் குறிப்பில், கடந்த 19ஆம் தேதி எலும்பு முறிவு காரணமாக கிருஷ்ணகிரி அரசு மருத்துவமனையில் சிகிச்சைக்காக சிவராமன் அனுமதிக்கப்படுவதற்கு, இரண்டு நாள்களுக்கு முன்பு எலி மருந்து சாப்பிட்டுத் தற்கொலைக்கு முயன்றதாகக் கூறப்பட்டுள்ளது.

அவரது உயிரைக் காப்பாற்ற கிருஷ்ணகிரி மருத்துவர்கள் பரிந்துரையின் பேரில் மேல் சிகிச்சைக்காக சேலம் அரசு மருத்துவமனையில் 21ஆம் தேதி அனுமதிக்கப்ப்டட நிலையில், சிகிச்சைப் பலனின்றி அவர் வெள்ளிக்கிழமை காலை இறந்ததாகத் தெரிவிக்கப்பட்டுள்ளது.

பட மூலாதாரம்,FACEBOOK/K.ANNAMALAI

மாணவி பாலியல் வன்கொடுமை வழக்கின் விசாரணை துரிதமாக நடந்து கொண்டிருந்த நிலையில், தந்தையும் மகனும் உயிரிழந்துள்ளது சர்ச்சையை ஏற்படுத்தியுள்ளது.

"இந்த இரண்டு மரணங்களுமே, சந்தேகத்திற்கு இடமானவையாக இருக்கின்றன. சிறப்புப் புலனாய்வுக் குழு விசாரணையில், பாலியல் குற்றத்தில் தொடர்புடைய வேறு யாரேனும் முக்கியப் புள்ளிகளின் பெயர்களை சிவராமன் வெளியில் கூறிவிடுவாரோ என்ற அச்சத்தில் கொல்லப்பட்டிருக்கலாமோ என்ற கேள்வி எழுகிறது" எனத் தனது எக்ஸ் பக்கத்தில் தமிழக பா.ஜ.க தலைவர் அண்ணாமலை பதிவிட்டுள்ளார்.

உண்மையில் இந்த வழக்கில் தொடர்புடைய அனைவரும் கைது செய்யப்பட்டுள்ளனரா அல்லது யாரையோ காப்பாற்றும் முயற்சியாக, தந்தை, மகன் இருவரின் மரணங்களும் நிகழ்ந்துள்ளனவா என்ற பலத்த சந்தேகம் எழுவதாகவும் அண்ணாமலை குறிப்பிட்டுள்ளார்.

பள்ளி மாணவிகள் பாலியல் வன்முறை தொடர்பாக அமைக்கப்பட்டுள்ள சிறப்புப் புலனாய்வுக் குழு, இது தொடர்பாக முழுமையான விசாரணை நடத்தி, இந்தக் கேள்விகளுக்கான உண்மையான பதில்களை வெளிக்கொண்டு வரவேண்டும் என்றும் அண்ணாமலை வலியுறுத்தியுள்ளார்.

இதுதொடர்பாக, பள்ளிக்கல்வித் துறை அதிகாரிகள் விசாரணை நடத்தி வரும் நிலையில், என்.சி.சி என்ற பெயரில் வெளியில் உள்ள ஆட்களை அழைத்து வந்து முகாம் நடத்தியதாக குறிப்பிடுகிறார் கிருஷ்ணகிரி மாவட்ட ஆட்சியர் சரயு.

செய்தியாளர்களிடம் பேசிய ஆட்சியர் சரயு, "முகாமில் மாணவிகளுக்கு பாதுகாப்பு வழிகாட்டுதல் எதுவும் பின்பற்றப்படவில்லை. முகாமில் பங்கேற்ற மாணவிகளுக்கு கவுன்சலிங் வழங்கப்பட்டு வருகிறது. வேறு பள்ளிகளில் போலி என்.சி.சி முகாம்கள் நடத்தப்பட்டதா என்பது குறித்து விசாரணை நடந்து வருகிறது," என்றார்.

பொதுவாக, பள்ளிகளில் தேசிய மாணவர் படை, சாரணர் படை என பல்வேறு அமைப்புகளில் மாணவர்கள் ஆர்வமுடன் இணைகின்றனர்.

பட மூலாதாரம்,KMSARAYU

என்.சி.சி.,யில் பின்பற்றப்படும் பாதுகாப்பு நடைமுறைகள் என்னென்ன, பெற்றோர் எந்தளவுக்கு விழிப்புடன் இருக்க வேண்டும் என்பது குறித்து, சென்னையை சேர்ந்த தேசிய மாணவர் படை அலுவலர் ஆனந்தராஜிடம் பிபிசி தமிழ் சார்பில் பேசினோம். அவர் கூறிய தகவல்கள் பின்வருமாறு குறிப்பிடப்பட்டுள்ளது.

• தேசிய மாணவர் படையில் இணையும் அனைவருக்கும் ஒருங்கிணைந்த வருடாந்திர பயிற்சி முகாம் என்பது பொதுவானது. இதில், பள்ளிக்கு 2 பேர் தேர்வு செய்யப்படுவார்கள். இவர்கள் பயிற்சி முகாமுக்கு அனுப்பப்படுவர்.
• பயிற்சி முகாம் நடப்பதாக இருந்தால் என்.சி.சியில் பதிவு செய்துள்ள பள்ளிகளுக்கு மின்னஞ்சல் அனுப்பப்படும். அதில், முகாமில் எவ்வளவு பேர் சேர்த்துக் கொள்ளப்பட வேண்டும் என்ற தகவல்கள் இடம்பெற்றிருக்கும்.
• அரசு மற்றும் அரசு உதவி பெறும் பள்ளி மாணவர்களுக்கு தங்கும் இடம், உணவு ஆகியவை இலவசமாக வழங்கப்படும். தனியார் பள்ளி மாணவர்கள், உணவு மற்றும் பயண செலவுகளை அவர்களே பார்த்துக் கொள்ள வேண்டும்.
• பயிற்சி முகாமில் மாணவர்கள் பங்கேற்பதற்கு தலைமை ஆசிரியர் ஒப்புதல் தெரிவிக்க வேண்டும். அதன்பின், மாணவர் தொடர்பான மருத்துவ சான்று, பெற்றோர் விருப்ப சான்று, அபாய சான்று (Risk) ஆகியவற்றை ஒப்படைக்க வேண்டும். அப்போது தான் என்.சி.சி அங்கீகரிக்கும்.
• முகாமுக்கு மாணவர்களை ஏ.என்.ஓ (Associate NCC Officer) எனப்படும் பள்ளியின் என்.சி.சி ஆசிரியர் அழைத்துச் செல்வார். கூடவே, அவரது கையெழுத்துடன் கூடிய விண்ணப்பத்தை சமர்ப்பித்தால்தான் முகாமுக்குள் நுழைய அனுமதி வழங்கப்படும்.
• இந்த சான்றுகளில் ஒன்று இல்லாவிட்டாலும் அனுமதி மறுக்கப்படும். எப்போது முகாம் நடக்கும், எப்போது முடியும், மாணவர்கள் எப்போது புறப்படுவார்கள் என்பதெல்லாம் ராணுவ ஒழுங்குடன் கட்டமைக்கப்பட்டிருக்கும்.
• ஒவ்வொரு முகாமுக்கும் 6 முதல் 10 என்.சி.சி ஆசிரியர்கள் இருப்பார்கள். இவர்கள் வகுப்பெடுப்பார்கள். மற்றபடி, பரேடு, பயிற்சி ஆகியவற்றை ராணுவத்தினர் முன்னெடுப்பார்கள்.
• ஒவ்வொரு மண்டலத்துக்கும் 500 மாணவர்கள் முகாமில் பங்கேற்பது வழக்கம். ஒரே முகாமில் மாணவர்களும் மாணவிகளும் இருப்பார்கள். ஆனால், அவர்கள் தங்கும் விடுதி தனித்தனியாக இருக்கும்.
• பெண் என்.சி.சி ஆசிரியர் (ANO) கட்டுப்பாட்டில் மாணவிகள் இருப்பார்கள். ராணுவத்தில் ஜிஏசி (Girls Cadet incharge) என்ற பணியிடம் உள்ளது. ஒவ்வொரு முகாமிலும் ஒரு ஜிஏசி கட்டாயம் இருப்பார். இவர்கள் தங்கியுள்ள பகுதிக்குச் செல்வதற்கு கமாண்டிங் அதிகாரிக்கு அனுமதியில்லை.
• மாணவ, மாணவிகள் இருவருக்கும் ராணுவ அதிகாரிகள் பயிற்சி கொடுப்பார்கள். 10 நாள்கள் நடக்கும் முகாமில் பரேடு பயிற்சி, ஆயுதப் பயிற்சி ஆகியவை வழங்கப்படும்.
• மாணவ, மாணவிகளுக்கு உடல்நிலை சரியில்லாமல் போனால் முதலுதவி வழங்கப்படும். அதன்பிறகும் உடல்நலக் குறைவு ஏற்பட்டால் முகாமில் இருந்து அனுப்பப்படுவார்கள்.
• ஒருவருக்கு பயிற்சி பிடிக்காவிட்டாலும் அவ்வளவு எளிதில் அனுப்ப மாட்டார்கள். பயிற்சியை மாணவரின் உடல் ஏற்கும் வரையில் என்.சி.சி ஆசிரியர் பயிற்சி வழங்குவார்.
• எட்டாம் வகுப்பு முதல் 9 ஆம் வகுப்பு வரையில் இரண்டாண்டுகள் என்.சி.சி பயிற்சி வழங்கப்படுகிறது. ஒன்பதாம் வகுப்பு சென்றவுடன் முகாமுக்கு செல்லும் மாணவர்கள் என்.சி.சி தேர்வை எழுதுவார்கள். கல்லூரி மாணவர்களுக்கும் தேர்வு நடக்கும். அரசின் சீருடை பணிகளில் என்.சி.சி. மாணவர்களுக்கு முன்னுரிமை வழங்கப்படுகிறது.
• என்.சி.சி முகாமில் கமாண்டிங் அலுவலராக (Commanding office) வருகிறவர், லெப்டினென்ட் கமாண்டன்ட் ஆகவோ மேஜர் அந்தஸ்தில் உள்ள அதிகாரியாகவோ இருப்பது நடைமுறை.

பட மூலாதாரம்,ANANDRAJ

• பள்ளி நிர்வாகம் தரப்பில் என்.சி.சி-க்கு விண்ணப்பித்து அனுமதி வாங்கியிருந்தால் அதற்கான ஆசிரியர் நேர்காணல் தலைமைச் செயலகத்தில் நடக்கும்.
• அந்த நேர்காணலில் தரைப்படை, கப்பல் படை, விமானப் படை அதிகாரிகள் இருப்பார்கள். இதில் ஆசிரியர் தேர்வு செய்யப்பட்டால் மட்டுமே பயிற்சிக்காக நாக்பூர் அனுப்புவார்கள். அதுவும் ஓராண்டுக்குப் பிறகுதான் பயிற்சிக்கு வரவழைக்கப்படுவார்கள்.
• முன்பு 90 நாள்களாக இருந்த பயிற்சி 60 நாள்களாக குறைத்துவிட்டார்கள்.பயிற்சி முடியும் போது, சம்பந்தப்ப்டட ஆசிரியர் கெஜட்டட் அலுவலராக வெளியில் வருவார்.

இந்த சம்பவங்கள் குறித்து முழுமையான விசாரணையை மேற்கொண்டு, சம்பந்தப்பட்ட அனைவரின் மீதும் தக்க நடவடிக்கைகள் எடுக்கும் வகையில் காவல்துறை தலைவர் பவானீஸ்வரி ஐ.பி.எஸ் தலைமையில் சிறப்பு புலனாய்வுக் குழு (SIT) அமைக்கப்படும் என்று தமிழக அரசு வெளியிட்ட செய்திக் குறிப்பில் தெரிவிக்கப்பட்டுள்ளது.

இந்த சம்பவங்களால் பாதிக்கப்பட்டுள்ள குழந்தைகள் மற்றும் அவர்களின் பெற்றோர்களோடு கலந்தாலோசித்து, அவர்களின் நலன் காத்திட தேவையான நடவடிக்கைகள் எடுப்பது குறித்து உரிய பரிந்துரைகள் அளித்திட, சமூக நலத்துறை செயலாளர் ஜெயஸ்ரீ முரளிதரன் ஐ.ஏ.எஸ் தலைமையில் பல்நோக்கு குழு ஒன்றும் அமைக்கப்படும் என அந்த செய்திக் குறிப்பில் கூறப்பட்டுள்ளது.

மேலும், இந்த சம்பவம் ஏற்படக் காரணமாக இருந்த சூழ்நிலைகள் தொடர்பாக ஆராய்ந்து, இனி இதுபோல நடைபெறாமல் தடுப்பது குறித்தும் இந்த பல்நோக்கு குழு பரிந்துரைகள் அளிக்கும் எனவும் தெரிவிக்கப்பட்டுள்ளது.

கிருஷ்ணகிரி விவகாரத்தில் விசாரணையை 15 நாட்களுக்குள் முடித்து 60 நாட்களுக்குள் குற்றப்பத்திரிகையை தாக்கல் செய்து குற்றவாளிகளுக்கு கடும் தண்டனை பெற்றுத் தரவும் முதல்வர் உத்தரவிட்டுள்ளதாக அரசு வெளியிட்டுள்ள செய்திக் குறிப்பில் குறிப்பிடப்பட்டுள்ளது.

https://www.bbc.com/tamil/articles/cp3dee6r1nxo

பட மூலாதாரம்,GETTY IMAGES

தமிழ்நாடு அரசியலில் சமீபத்திய இரு நிகழ்வுகள் கட்சிகள் அணி மாற்றத்திற்கான தயாராகி வருகின்றனவா என்ற கேள்வியை ஏற்படுத்தியுள்ளன.

தமிழ்நாடு ஆளுநர் ஆர்.என்.ரவி அளித்த தேநீர் விருந்தில் முதலமைச்சர் மு.க.ஸ்டாலினும், மூத்த அமைச்சர்களும் பங்கேற்றதும், கருணாநிதி நூற்றாண்டு நாணய வெளியீட்டு விழாவில் மத்திய அமைச்சர் ராஜ்நாத் சிங் பங்கேற்றதுமே இதற்குக் காரணம்.

எதிர்க்கட்சியான அதிமுக இதுகுறித்த சந்தேகங்களை எழுப்ப திமுக மட்டுமின்றி, பாஜகவும் கூட விளக்கம் அளித்துள்ளது. தமிழ்நாடு அரசியல் அரங்கில் என்ன நடக்கிறது? அடுத்த சட்டமன்ற தேர்தலில் கூட்டணிகள் மாறுமா?

பட மூலாதாரம்,@UDHAYSTALIN

ஆர்.என்.ரவி தமிழ்நாட்டின் ஆளுநராக பொறுப்பேற்றது முதலே, அவரது தேநீர் விருந்தை திமுக புறக்கணித்தே வந்துள்ளது. கட்சி சார்பிலோ, அரசு சார்பிலோ யாரும் கலந்து கொண்டதில்லை.

ஆனால், இம்முறை ஆளுநர் அளித்த தேநீர் விருந்தில் முதலமைச்சர் ஸ்டாலின், அமைச்சர்கள் துரைமுருகன், எ.வ.வேலு, கே.என்.நேரு உள்ளிட்டோர் பங்கேற்றது அரசியல் அரங்கில் பலரது புருவங்களை உயர்த்தியது.

அடுத்தபடியாக, ஆகஸ்ட் 18ஆம் தேதி கருணாநிதி நூற்றாண்டு நினைவு நாணய வெளியீட்டு விழாவில் மத்திய பாதுகாப்புத்துறை அமைச்சர் ராஜ்நாத் சிங் பங்கேற்று, 100 ரூபாய் நினைவு நாணயத்தை வெளியிட்டார்.

அந்த நாணயத்தில் கருணாநிதி கையெழுத்தில் 'தமிழ் வெல்லும்' என்ற வாசகமும் இந்தி மற்றும் ஆங்கிலத்தில் 'கலைஞர் எம்.கருணாநிதி பிறந்த நூற்றாண்டு' என்றும் குறிப்பிடப்பட்டுள்ளது.

பட மூலாதாரம்,EDAPPADI PALANISAMY/FACEBOOK

"ஆளுநர் அளிக்கும் தேநீர் விருந்தை தி.மு.க., புறக்கணிக்கும் என்று கூறிவிட்டு அரசு கலந்து கொள்ளும் என்கின்றனர். அக்கட்சிக்கு ஸ்டாலின் தலைவர், பொதுச்செயலாளர் துரைமுருகன். அவர்கள் இருவருமே கலந்து கொண்டு இரட்டை வேடம் போடுகின்றனர்" என்று அதிமுக பொதுச் செயலாளர் எடப்பாடி பழனிசாமி விமர்சித்தார்.

கருணாநிதி நூற்றாண்டு நாணய வெளியீட்டு விழாவின் மூலம் தி.மு.க., பா.ஜ.க உறவு வெளிப்பட்டுவிட்டதாகவும் அவர் விமர்சித்தார்.

கோவையில் செய்தியாளர்கள் மத்தியில் பேசிய அவர், "அ.தி.மு.க., ஆட்சியில் எம்.ஜி.ஆர் நூற்றாண்டு விழாவில் நாணயம் வெளியிட்ட போது, கூட்டணியில் இருந்தாலும் கூட பா.ஜ.க-வை அழைக்கவில்லை. நாணய வெளியீட்டு விழாவுக்கு ராகுல்காந்தியை அழைக்காததன் மூலம் தி.மு.க - பா.ஜ.க உறவு வெட்ட வெளிச்சமாகிவிட்டது" என்று குற்றம்சாட்டினார்.

கருணாநிதி நூற்றாண்டு நினைவு நாணயத்தில் இந்தியில் எழுத்துகள் உள்ளதைச் சுட்டிக் காட்டிய அவர், "தமிழ் தமிழ் என்று உச்சரித்தாலும் இந்திக்கு ஸ்டாலின் முக்கியத்துவம் தருவது ஏன்?" என்றும் கேள்வி எழுப்பினார்.

பட மூலாதாரம்,FACEBOOK

எடப்பாடி பழனிசாமியின் குற்றச்சாட்டுக்குப் பதிலளித்து, முதலமைச்சர் ஸ்டாலின் வெளியிட்ட அறிக்கையில், “எம்.ஜி.ஆர். நூற்றாண்டு நாணய வெளியீட்டு விழாவுக்கு மத்திய அரசில் உள்ளவர்களை பழனிசாமி அரசு அழைத்தும் அவர்கள் மதிக்கவில்லை” என்று குறிப்பிட்டிருந்தார்.

ஆனால், முதலமைச்சரின் இந்த கூற்றை கடந்த அ.தி.மு.க அரசில் வருவாய்த்துறை அமைச்சராக இருந்த ஆர்.பி.உதயகுமார் மறுத்தார்.

பிபிசி தமிழிடம் பேசிய அவர், "அன்றைக்கு ஸ்டாலின் எதிர்க்கட்சித் தலைவராக இருந்தார். நாங்கள் யாரை அழைத்தோம் என்பது நிர்வாகத்தில் உள்ளவர்களுக்குத்தான் தெரியும். ஸ்டாலினுக்கு தெரிய வாய்ப்பில்லை. அன்று மத்திய அரசில் உள்ள யாருக்கும் நாங்கள் அழைப்பு விடுக்கவில்லை" என்றார்.

கருணாநிதி நாணயத்தில் இந்தி இடம் பெற்றிருப்பது தொடர்பான எடப்பாடி பழனிசாமியின் குற்றச்சாட்டிற்கு தி.மு.க., எம்.பி., ஆ.ராசா எக்ஸ் தளத்தில் பதிலளித்துள்ளார்.

"இந்தியாவில் உள்ள நாணயங்கள் எதுவாக இருந்தாலும் அதில் ஆங்கிலமும் இந்தியும் இருப்பது வழக்கம். எம்.ஜி.ஆருக்கு வெளியிட்ட நாணயத்திலும் இந்தி இருப்பதை பழனிசாமி அறியவில்லை" என்று அவர் கூறியுள்ளார்.

பட மூலாதாரம்,@MKSTALIN

"விழா அழைப்பிதழில் எந்த இடத்திலும் மத்திய அரசுத் துறையின் பெயர் இடம்பெறவில்லை. தமிழக அரசின் இலச்சினைதான் இடம்பெற்றுள்ளது. அனைவருக்கும் அழைப்பிதழை அனுப்பி அழைத்தவர் தமிழக அரசின் தலைமைச் செயலாளர். இந்நிகழ்ச்சிக்கு ராகுல்காந்தியை அழைத்திருக்கலாம்" என்று எடப்பாடி பழனிசாமி குற்றம்சாட்டியிருந்தார்.

கடந்த திங்கள்கிழமையன்று சென்னையில் திருமண நிகழ்ச்சி ஒன்றில் விளக்கம் அளித்த மு.க.ஸ்டாலின், "நாணயத்தை வெளியிட்டது மத்திய அரசு. இது தி.மு.க நிகழ்ச்சி அல்ல. மத்திய அரசின் நிகழ்ச்சி என்பதால் ராகுல் காந்தியை அழைக்கவில்லை" என்றார்.

இதுகுறித்து திமுக அமைப்புச் செயலாளர் ஆர்.எஸ்.பாரதியிடம் பிபிசி தமிழ் சார்பில் கேட்டபோது, "மாநில அரசின் ஏற்பாட்டில் மத்திய அரசு நடத்திய விழா. மாநில அரசின் வேண்டுகோளை ஏற்று மத்திய அமைச்சர் பங்கேற்று நாணயத்தை வெளியிட்டார். இதை முதலமைச்சரும் தெளிவாக கூறிவிட்டார்" என்றார்.

பட மூலாதாரம்,RSBHARATHI/X

"ஆளுநர் அளிக்கும் தேநீர் விருந்தில் தி.மு.க., என்ற கட்சி பங்கேற்காது. அரசின் சார்பில் யாராவது பங்கேற்பார்களா என்பதை முதலமைச்சர் தெரிவிப்பார்" என்று செய்தியாளர் சந்திப்பு ஒன்றில் ஆர்.எஸ். பாரதி முன்னர் தெரிவித்திருந்தார். அதன் பிறகு தேநீர் விருந்தில் முதலமைச்சரும், அமைச்சர்களும் பங்கேற்றனர்.

இதுகுறித்த கேள்விக்கு பதில் அளித்த அவர், ஆளுநர் என்ற பதவியின் மீதும் அந்தப் பொறுப்பின் மீதும் முதலமைச்சர் பெரும் மதிப்பு வைத்திருக்கிறார் என்றும், அந்த கோட்பாட்டின் அடிப்படையில் ஆளுநரின் தேநீர் விருந்தில் பங்கேற்றதாகவும் கூறினார்.

ஆளுநரின் தேநீர் விருந்தை கட்சி புறக்கணித்துவிட்டது, அரசு சார்பில்தான் முதலமைச்சரும், அமைச்சர்களும் பங்கற்றார்கள் என்பதை இதன் மூலம் திமுக தரப்பு தெளிவுபடுத்தியது.

கடந்த செவ்வாய் அன்று (ஆகஸ்ட் 20) செய்தியாளர்களிடம் பேசிய மத்திய இணை அமைச்சர் எல்.முருகன், "தமிழக அரசின் சார்பில் நடைபெற்ற இந்த நிகழ்ச்சிக்கு அழைப்பு விடுக்கப்பட்டதன் பேரில் மத்திய அமைச்சர் ராஜ்நாத் சிங் பங்கேற்றார். இதில் அரசியலுக்கு இடமில்லை" என்றார்.

தி.மு.க. - பாஜக இடையே ரகசிய உறவு உள்ளதாக எடப்பாடி பழனிசாமி கூறியதை, தமிழக பா.ஜ.க தலைவர் அண்ணாமலை விமர்சித்துள்ளார். "ரகசிய உறவு என்று கூறுவதற்கு என்ன காரணம்... பா.ஜ.க என்ன தொடக்கூடாத கட்சியா?" என்று அவர் செய்தியாளர்கள் சந்திப்பில் கேள்வி எழுப்பியுள்ளார்.

பட மூலாதாரம்,GETTY IMAGES

மேற்கூறிய இரு நிகழ்வுகளும் பா.ஜ.க எதிர்ப்பில் தி.மு.க., அரசு சமரசம் செய்து கொள்கிறதா? என்கிற கேள்வியை தமிழ்நாட்டின் அரசியல் அரங்கில் எழுப்பியுள்ளதாக அரசியல் விமர்சகர்கள் கூறுகின்றனர். அதனையே எதிர்க்கட்சியான அதிமுகவின் விமர்சனமும் வெளிப்படுத்துகிறது.

"கருணாநிதி நூற்றாண்டு நினைவு நாணய நிகழ்ச்சியை அரசு நிகழ்ச்சியாக நான் பார்க்கவில்லை. நாணயத்தை வெளியிட வந்த ராஜ்நாத் சிங், கருணாநிதியின் சமாதிக்கு சென்றதே அரசியல் தான்" என்று தனது பார்வையை முன்வைக்கிறார் மூத்த பத்திரிகையாளர் ஆர்.மணி.

மத்திய ஆட்சியில் மைனாரிட்டியாக உள்ள பா.ஜ.க அரசுக்கு புதிய கூட்டணிகள் தேவை என்பதால், தி.மு.கவை நோக்கி வலை வீசப்படுவதாக குறிப்பிடும் ஆர்.மணி, "சமாதியை ராஜ்நாத் சிங் சுற்றி வரும்போது, ஸ்டாலின், கனிமொழி, தயாநிதி மாறன், டி.ஆர்.பாலு ஆகியோர் இருக்கும் புகைப்படம், மக்களுக்கு என்ன மாதிரியான தகவலை தெரிவிக்கும் என்பது சொல்லித் தெரிய வேண்டியதில்லை. தி.மு.க.,வுக்கு மத்திய அரசின் நிதி தேவை. தவிர, மத்திய புலனாய்வு அமைப்புகளின் நெருக்கடிகளைத் தவிர்க்க விரும்புகிறது" என பிபிசி தமிழிடம் பேசிய அவர் கூறினார்.

முன்னாள் அமைச்சரும் அ.தி.மு.க செய்தித் தொடர்பு செயலருமான வைகைச்செல்வனின் கருத்தும் இதையொட்டியதாகவே இருக்கிறது.

பிபிசி தமிழிடம் பேசிய வைகைச்செல்வன், "தி.மு.க.,வின் நட்பு பா.ஜ.க.,வுக்கு தேவைப்படுகிறது. தி.மு.க.,வுக்கும் பா.ஜ.க.,வின் உறவு தேவைப்படுகிறது. இது ரகசிய உறவாக நீடித்துக் கொண்டிருக்கிறது. மாநில அரசு இயங்குவதற்கு பா.ஜ.க.,வின் நட்பு தி.மு.க.,வுக்கு தேவைப்படுவதாக இதை எடுத்துக் கொள்ளலாம்" என்றார்.

பட மூலாதாரம்,GETTY IMAGES

தி.மு.க., மீதான விமர்சனங்கள் குறித்து அக்கட்சியின் செய்தித் தொடர்பு செயலர் பேராசிரியர் கான்ஸ்டன்டைனிடம் பேசிய போது, "எந்த இடத்திலும் பா.ஜ.க அரசு மற்றும் அதன் கொள்கையின் மீதான விமர்சனத்தை தி.மு.க., மென்மையாக அணுகவில்லை. கடந்த வாரம் நடந்த தி.மு.க., மாவட்ட செயலாளர்கள் கூட்டத்தில், நிதிப் பங்கீட்டில் மத்திய அரசு பாரபட்சம் காட்டுவதைக் கண்டித்து தீர்மானம் நிறைவேற்றப்பட்டது" என்கிறார்.

"அரசியல் அமைப்புச் சட்டத்தின்படி, அரசின் பிரதிநிதியாக ஆளுநர் இருக்கும்போது, தொடர்ந்து விரோதப் போக்கில் செயல்பட முடியாது" எனக் குறிப்பிடும் கான்ஸ்டன்டைன், நாணய வெளியீட்டு விழா சர்ச்சைக்கு பதில் அளித்தார்.

"நாணய வெளியீட்டு விழாவுக்கு தமிழகத்தில் அனைத்துக் கட்சித் தலைவர்களையும் முதலமைச்சர் ஸ்டாலின் அழைத்தார். அரசியல் களத்தில் எதிரெதிர் நின்றாலும் தமிழர்களாக அனைவரும் ஒன்றாக இருக்க வேண்டும் என்பது ஜனநாயக முதிர்ச்சி. பா.ம.க நிறுவனர் ராமதாஸையும் தி.மு.க., அழைத்தது. இது நூற்றாண்டுக்கு ஒருமுறை நடக்கும் நிகழ்ச்சி." என்கிறார் கான்ஸ்டன்டைன்.

பா.ஜ.கவுடன் தி.மு.க., இணக்கமாக செல்வதால் இந்தியா கூட்டணியில் எந்த பாதிப்பும் ஏற்படாது என்கிறார் பத்திரிகையாளர் ஆர்.மணி.

"2026 சட்டமன்றத் தேர்தலில் காங்கிரஸ் கட்சியுடன்தான் தி.மு.க., கூட்டணி இருக்கும். மோதி எதிர்ப்பு என்பதுதான் தி.மு.கவுக்கு பிரதானம். நேரடியாக பா.ஜ.கவுடன் தி.மு.க., செல்லாது. ஆனால், கண்ணுக்குத் தெரியாமல் மத்திய அரசுடன் பல வகைகளில் இணக்கமாக இருக்க வாய்ப்புள்ளது. அந்தவகையில், பா.ஜ.க எதிர்ப்பை தற்போதைக்கு தி.மு.க தள்ளி வைத்துள்ளது" என்கிறார் ஆர்.மணி.

https://www.bbc.com/tamil/articles/c4gxdgxv34zo

வரும் ஆகஸ்ட் 22ஆம் தேதி தமிழக வெற்றிக் கழகத்தின் கொடியை அக்கட்சியின் தலைவர் விஜய் அறிமுகம் செய்ய உள்ள நிலையில், தற்போது அக்கொடி எந்த நிறத்தில் இருக்கும் என்ற சூப்பர் தகவல் வெளியாகியுள்ளது.

தளபதி என்று ரசிகர்களால் அழைக்கக்கூடிய பிரபல நடிகர் விஜய் தனது நற்பணி மன்றத்தை அரசியல் கட்சியாக மாற்றி அதிகாரப்பூர்வமாக ’தமிழக வெற்றிக் கழகம் கட்சி’ பெயரை கடந்த பிப்ரவரியில் அறிவித்தார்.

கட்சியின் முதல் மாநாடு செப்டம்பர் மாதத்தில் விழுப்புரம் மாவட்டம் விக்கிரவாண்டியில் பிரமாண்டமாக நடத்துவதற்கான வேலைகள் நடந்து வருகிறது.

மாநாட்டுக்கு கேரளா, கர்நாடகா, ஆந்திரா, புதுச்சேரி ஆகிய நான்கு மாநில முதல்வர்களை அழைக்கவும் திட்டமிட்டுள்ளார் விஜய். முறையாக அழைப்பு கொடுப்பதற்கு முன்பு நான்கு முதல்வரிடமும் பேசப்பட்டுள்ளதாகவும் சொல்கிறார்கள் விஜய்க்கு நெருக்கமானவர்கள்.

மாநாட்டுக்கு முன்பாக ஈசிஆர் சாலையில் உள்ள பனையூர் அலுவலகத்தில் வரும் ஆகஸ்ட் 22 ஆம் தேதி விஜய் கட்சி கொடியை அறிமுகம் செய்கிறார்.

இதற்காக கட்சி நிர்வாகிகள் மற்றும் சிறப்பு அழைப்பார்கள் என 300 பேருக்கு அழைப்பு கொடுக்கப்பட்டுள்ளது.

இந்த நிலையில் கொடியின் வர்ணங்கள் பற்றி தவெக நிர்வாகியிடம் விசாரித்தோம்.

அதற்கு, “மஞ்சள், வெள்ளை, சிவப்பு என மூவர்ண நிறத்தின் மத்தியில் வாகை பூ பதிக்கப்பட்டுள்ளது.

வாகை பூ வெற்றியை உணர்த்தும். சங்ககாலத்தில் போரில் வெற்றிப் பெற்ற வீரர்களுக்கு வாகை பூக்களை சூடுவார்கள்.

அந்த வகையில் மூவர்ண கொடியில் வாகை பூ பதிக்கப்பட்டுள்ளது. இனி எங்கள் பயணம் வெற்றியை நோக்கிதான்” என்கிறார் தவெக நிர்வாகி ஒருவர்.
 

https://minnambalam.com/political-news/vijay-tvk-flag-introduction-do-you-know-what-the-color-is/

மேட்டூர் அணை நிரம்புவது தமிழ்நாட்டில் மிகப்பெரிய செய்தியாகக் கவனிக்கப்படுகிறது. மாநிலத்தின் மிகப்பெரிய இந்த அணை எதற்காகக் கட்டப்பட்டது, இதன் வரலாறு என்ன?

மேட்டூர் அணை கட்டப்பட்டதில் இருந்து 42வது முறையாக தற்போது நிரம்பியுள்ளது. ஒவ்வொரு முறை மேட்டூர் அணையில் நீர்மட்டம் 100 அடியைத் தாண்டும்போதும் முழு உயரமான 120 அடியை எட்டும்போதும் அந்தச் செய்தி மாநிலம் முழுவதும் பெரும் கவனத்தைப் பெறுகிறது.

ஒரு அணை இந்த அளவு கவனத்தைப் பெறுவதற்குக் காரணம் இருக்கிறது. மேட்டூர் அணை தமிழ்நாட்டின் மிகப்பெரிய அணை மட்டுமல்ல; இந்தியாவின் மிகப்பெரிய அணைகளில் ஒன்றும்கூட.

காவிரியில் இருந்து கிடைக்கும் நீரின் மூலம் டெல்டா பகுதிகளில் பல ஆயிரம் ஆண்டுகளாகவே விவசாயம் நடந்து வந்தது.

ஆனால், 17ஆம் நூற்றாண்டின் பிற்பகுதியில் காவிரியால் பாசனம் நடந்து வந்த பல இடங்களில் கால்வாய்கள் தூர்ந்து போயிருந்தன. இந்தக் கட்டத்தில்தான் அதாவது, 1801இல் தஞ்சாவூர் மாவட்டத்தின் நிர்வாகம் கிழக்கிந்திய கம்பெனியின் கீழ் வந்தது.

அந்தத் தருணத்தில் டெல்டா பகுதியில் பாசன வசதிகள் மிகவும் மோசமடைந்திருந்ததாக சேலம் மாவட்ட கெஸட்டியர் கூறுகிறது. கால்வாய்கள் தூர்ந்து போயிருந்ததால், பல இடங்களில் தண்ணீரின்றி விவசாயம் செய்வது நிறுத்தப்பட்டிருந்தது.

கிழக்கிந்திய கம்பெனி விவசாயத்தை மேம்படுத்த எடுத்த முயற்சிகளுக்குப் பெரிய பலன் ஏதும் கிடைக்கவில்லை. இந்த நிலையில்தான், சென்னை மாகாணத்தில் நீர்ப்பாசன பொறியாளராகப் பணியாற்றி வந்த சர் ஆர்தர் தாமஸ் காட்டன், காவிரியின் மீது தனது கவனத்தைத் திருப்பினார்.

இவரது முயற்சியில் 1834இல் திருச்சிக்கு அருகில் முக்கொம்பில் மேலணை கட்டப்பட்டது. இதற்குப் பிறகு அந்தப் பகுதியில் நீர்ப்பாசன வசதிகள் தொடர்ந்து மேம்படுத்தப்பட்டன. கல்லணையில் 1887-89இல் ரெகுலேட்டரும் பொருத்தப்பட்டது.

இதையடுத்து இந்த அணைக்குக் கிழக்கே உள்ள பகுதிகளில் நிலத்தின் மதிப்பு, அந்தப் பகுதியில் இருந்த மக்களின் வாழ்க்கைத் தரம் போன்றவை உயர ஆரம்பித்தன.

இதைக் கவனித்த பிரிட்டிஷ் அரசு, காவிரியின் குறுக்கே ஒரு மிகப்பெரிய அணையைக் கட்டி நீரைத் தேக்கினால், அது பாசனத்திற்குப் பயனுள்ளதாக இருக்கும் என உணர்ந்தது.

ஆனால், இது தொடர்பாக ஆங்கில அரசு உடனடியாக முடிவெடுக்கவில்லை. பல ஆண்டுகள் இது தொடர்பான வாத - பிரதிவாதங்கள் நடந்தன. முடிவில், ராயல் பொறியாளரான கர்னல் டபிள்யு.எம்.எல்லிஸ் மேட்டூரில் காவிரிக்குக் குறுக்கே ஒரு அணையைக் கட்டலாம் என முன்வைத்த யோசனை 1910வாக்கில் ஒரு வழியாக ஏற்கப்பட்டது.

ஆனால், அணையைக் கட்டும் பணிகள் துவங்குவதற்கு முன்பாக முதல் உலகப் போர் வெடித்தது. இதற்குப் பிறகு மைசூர் அரசுடன் பேச்சுவார்த்தைகளை நடத்த வேண்டியிருந்தது.

மைசூருக்கும் சென்னை மாகாணத்திற்கும் இடையே 1924இல் ஒப்பந்தம் எட்டப்பட்ட நிலையில், 1925ஆம் ஆண்டு ஜூலை மாதம் 20ஆம் தேதி சென்னை மாகாண ஆளுநர் 2வது விஸ்கவுன்ட் கோஸ்சென் முன்னிலையில் பணிகள் துவங்கின.

மேட்டூர் அணை முதலில் திட்டமிடப்பட்டப்போது, தற்போது அணை இருக்கும் இடத்தில் கட்டுவதற்குத் திட்டமிடப்படவில்லை. மாறாக, தற்போதுள்ள இடத்திலிருந்து சுமார் ஒரு மைல் தூரம் தள்ளி இருக்கும் வகையில் திட்டமிடப்பட்டது.

ஆனால், 1924ஆம் ஆண்டு காவிரியில் மிகப்பெரிய வெள்ளம் ஒன்று ஏற்பட்டது. அப்போதுதான், முன்பு திட்டமிட்டதைவிடக் கூடுதல் நீரைத் தேக்கும் வகையில் அணை கட்டப்பட வேண்டும் என்பதற்காகத் தற்போதுள்ள இடம் தேர்வு செய்யப்பட்டது.

இந்தத் திட்டத்திற்கு ஏழு கோடியே 37 லட்ச ரூபாய் செலவாகும் என மதிப்பிடப்பட்டது. இந்த அணை கட்டி முடிக்கப்பட்ட பிறகு, வரி வருவாய் உயர்வதன் மூலம், செய்யப்பட்ட முதலீட்டிற்கு 6 சதவீதம் அளவுக்குப் பலன் கிடைக்கும் என மதிப்பிடப்பட்டது. ஆனால், இந்த அணையின் மூலமாக டெல்டா மாவட்டங்களில் உருவாகும் வேலைவாய்ப்பு, வாழ்க்கைத் தரம் உயர்ந்தது போன்றவற்றைக் கணக்கிடும்போது இந்த வருவாய் மிகக் குறைவுதான்.

இந்த அணைக்கான செலவைத் திட்டமிடும்போது, மிகத் துல்லியமாகத் திட்டமிடப்பட்டது. கட்டுமானப் பணிக்கான செலவு, நிலத்தைக் கையகப்படுத்துவதற்கான செலவு, ஊழியர்களின் வீடுகளுக்கான செலவு, கால்வாய்கள், இயந்திரங்கள், ஓய்வூதியம், இவ்வளவு ஏன் வரைபடம் உள்ளிட்ட காகிதங்களுக்கு ஆகும் செலவுகள்கூட துல்லியமாகக் கணக்கிடப்பட்டன.

இந்த அணையைக் கட்ட 2,16,000 டன் சிமென்ட் தேவைப்பட்டது. இந்த அளவுக்கு சிமென்ட் சப்ளை செய்ய ஷகாபாத் சிமென்ட் கம்பெனியுடன் ஒப்பந்தம் செய்யப்பட்டது. சிமென்ட்டை எடுத்துவர, சேலத்தில் இருந்து மேட்டூர் வரை ஒரு ரயில் பாதை போடப்பட்டது. அந்த ரயில் பாதைக்கான செலவின் ஒரு பகுதி மேட்டூர் திட்டச் செலவிலிருந்தே அளிக்கப்பட்டது.

அணை கட்டப்படுவதற்கு முன்பாக மேட்டூர் ஒரு குக்கிராமம். ஈரோடு ரயில் நிலையத்தில் இருந்து 37 மைல் தூரத்தில் இருந்தது. அங்கிருந்து மேட்டூரை வந்தடைய மண் சாலைதான் இருந்தது.

அணை குறித்த நேரத்தில் கட்டப்பட வேண்டுமென்றால், அணையின் கட்டுமானப் பணிகளுக்காக வரும் தொழிலாளர்கள், பொறியாளர்கள் தங்கும் அளவுக்கு ஒரு சிறிய நகரத்தையாவது மேட்டூரில் உருவாக்க வேண்டியிருந்தது.

இதையடுத்துதான் பொருட்களை எடுத்துவர, சேலத்தில் இருந்து ஒரு ரயில் பாதையும் தார் சாலையும் போடப்பட்டது. இதற்குப் பிறகு, அணையின் பணியாளர்களுக்காக வீடுகளைக் கட்டத் திட்டமிடப்பட்டது. மொத்தமாக 10,000 பேர் தங்கும் அளவுக்கான வீடுகள் இதற்காகக் கட்டப்பட்டன. ஒரு குக்கிராமம், ஒரு சிறு நகரமாக உருவெடுக்க ஆரம்பித்தது.

பட மூலாதாரம்,GETTY IMAGES

மேட்டூர் டவுன் மிகச் சிறப்பாக வடிவமைக்கப்பட்டது. தூய்மையான குடிநீர், பாதாள சாக்கடை வசதிகளுடன் இந்தச் சிறுநகர் உருவாக்கப்பட்டது. மைசூர் அரசுக்கு உட்பட்டிருந்த சிவசமுத்திரத்தில் இருந்த மின் நிலையத்தில் இருந்து மின்சாரம் வழங்கப்பட்டது. இங்கு வசித்த மக்களுக்காக ஒவ்வொரு ஞாயிற்றுக்கிழமையன்றும் மிகப்பெரிய வாரச் சந்தை கூடியது.

நிலம் எடுக்கும் பணிகளுக்காக, மேட்டூர் ஒரு தனி மாவட்டம் என அறிவிக்கப்பட்டது. மேட்டூர் அணை அமையும் இடம், அணையின் நீர் தேங்கும் இடம், தொழிலாளர்களின் கேம்ப், மின் நிலையம், ஒர்க் ஷாப் பகுதிகள் போன்றவற்றை உள்ளடக்கி இந்த மாவட்டம் உருவாக்கப்பட்டது.

ஆனால், இந்த அந்தஸ்து நீண்ட நாட்கள் நீடிக்கவில்லை. நில எடுப்புப் பணிகள் முடிந்த பிறகு, 1929 ஜூலையில் மேட்டூர் மாவட்டம், சேலம் மாவட்டத்தின் ஒரு தாலுகாவாக கீழிறக்கப்பட்டது.

அணை கட்டப்படும் இடத்தில் காவேரிபுரம் என்ற ஊர் ஒன்று இருந்தது. அணை கட்டப்பட்ட தருணத்தில் இங்கு குறிப்பிடத்தக்க எண்ணிக்கையில் கிறிஸ்தவர்கள் வசித்து வந்தனர்.

சிதிலமடைந்த நிலையில் ஒரு கோட்டையும் ஒரு சிவன் கோவிலும் இந்தக் கிராமத்தில் இருந்தன. மைசூருக்கு செல்லும் கணவாயின் துவக்கத்தில் இந்தக் கோட்டை அமைந்திருந்தது.

மைசூரிலிருந்து வரும் படையெடுப்பைக் கண்காணிக்க, திருமலை நாயக்கரால் இந்தக் கோட்டை கட்டப்பட்டது. இந்தக் கோட்டை 1768இல் ஆங்கிலேயர் வசம் வந்தது. அதற்கு அடுத்த ஆண்டிலேயே ஹைதர் அலி அதைக் கைப்பற்றினார்.

மைசூர் போர் நடந்த காலம் நெடுகவே இந்தக் கோட்டை வியூகரீதியாக முக்கியத்துவம் வாய்ந்ததாக இருந்தது. ஆனால், அணை கட்டப்பட்டுக் கொண்டிருந்த 20ஆம் நூற்றாண்டில் இந்தக் கோட்டைக்கு எந்த முக்கியத்துவமும் இல்லை. முடிவில், இந்தக் கோட்டை ஊரோடு சேர்ந்து மேட்டூர் அணையில் மூழ்கியது.

பட மூலாதாரம்,GETTY IMAGES

சோழப்பாடி, நெருஞ்சிப்பேட்டை, சம்பள்ளி ஆகிய கிராமங்களும் அணையின் நீரில் மூழ்கின.

பணிகள் இடைவிடாமல் நடந்ததில், 1934இல் அணையின் கட்டுமானப் பணிகள் நிறைவடைந்தன. அந்த ஆண்டு ஆகஸ்ட் 21ஆம் தேதி கட்டுமானப் பணிகள் முடிவுக்கு வந்ததாக அறிவிக்கப்பட்டது.

மேட்டூர் அணையால் உருவாகும் நீர்த்தேக்கத்திற்கு, அப்போதைய சென்னை மாகாண ஆளுநரான கர்னல் ஜார்ஜ் ஃப்ரெட்ரிக் ஸ்டான்லியின் பெயர் சூட்டப்பட்டு, அணை பயன்பாட்டிற்கு வந்தது.

மேட்டூர் அணையின் உயரம் 120 அடி. நீளம் 1,700 மீட்டர். 59.25 சதுர மைல் பரப்பிற்கு இந்த அணையில் நீர் தேங்குகிறது. தற்போதும் மேட்டூர் அணை, இந்தியாவின் மிகப்பெரிய அணைகளில் ஒன்று. 93.5 டி.எம்.சி. நீரை இந்த அணையில் தேக்க முடியும். இது கிருஷ்ணராஜ சாகர் அணையின் கொள்ளளவைவிட இரு மடங்கு.

https://www.bbc.com/tamil/articles/c0mnrxev4n7o

பட மூலாதாரம்,GETTY IMAGES

“இப்போ கடல் ரொம்ப வயலா இருக்கு (ஒரு சில அலைகள் மட்டுமே இருக்கும், பெரிய அலைகள் இல்லாத நிலை). இந்த மாதிரி இருக்கும்போது ராத்திரில கடலுக்குப் போனாதான் வரிப்பாறை, கருவாழை போன்ற மீன்கள் கிடைக்கும். கடல் இப்படி இருக்கும்போது தண்ணி ரொம்ப தெளிவா இருக்கும். காலையில போனா மீன் கண்ணுக்கு வலை நல்லா தெரிஞ்சு, சிக்காம தப்பிச்சுக்கும்.”

“இதையெல்லாம், அனுதினமும் கடலைப் பார்த்துதான் தெரிஞ்சுக்க முடியும். கடல்-ல இருந்து ரொம்ப தொலைவுல கொண்டுபோய் என்னைக் குடித்தனம் வெச்சா, நினைச்ச நேரத்துக்கு வந்து கடலைப் பார்க்க முடியுமா? எப்போ போனா மீன் கிடைக்கும், கிடைக்காதுனு தெரிஞ்சுக்க முடியுமா?”

நகரத்தைத் திட்டமிடும்போது அரசாங்கம் இப்படிப்பட்ட நடைமுறை சவால்களைக் கவனத்தில் கொள்வதில்லை என்று வருந்துகிறார் சென்னை அடையாறு அருகே இருக்கும் ஊரூர் குப்பத்தைச் சேர்ந்த மூத்த மீனவரான பாளையம்.

சென்னை நகரின் சுமார் 7% நிலப்பகுதி 2040ஆம் ஆண்டுக்குள் கடலுக்குள் மூழ்கும் என்று சமீபத்திய ஆய்வறிக்கை ஒன்று எச்சரித்துள்ளது.

இந்த ஆண்டில் பதிவான வெப்ப அலை இதுவரை இருந்ததைவிட அதிக பாதிப்புகளை சென்னையில் ஏற்படுத்தியுள்ளது. ஒவ்வோர் ஆண்டும் வெள்ளப் பேரிடர்களை நகரின் ஒரு சில பகுதிகளாவது எதிர்கொள்வது வழக்கமாகி வருகிறது.

இந்தப் பேரிடர்களின்போது சென்னை தாக்குப்பிடிக்க முடியாமல் திணறக் காரணமே அதன் கட்டமைப்புதான் என்கிறார் பூவுலகின் நண்பர்கள் அமைப்பின் ஒருங்கிணைப்பாளர் கோ.சுந்தர்ராஜன்.

“சென்னை ஒரு முறையாகத் திட்டமிடப்பட்ட பெருநகரமே இல்லை. அதுதான் இங்கு நகரக் கட்டமைப்பின் ஓர் அடிப்படைப் பிரச்னையாக இருக்கிறது.” என்கிறார் அவர்

இந்நிலையில், பேரிடர் பாதிப்புக்கு உள்ளாகும் சென்னையின் நகரத் திட்டமிடல் அந்தப் பேரிடர்களைக் கையாளும், மக்களின் வாழ்வியலைக் காக்கும் திறனைக் கொண்டுள்ளதா என்ற கேள்வி எழுகிறது.

பட மூலாதாரம்,SUBAGUNAM/BBC

“ஆடியில பெரிய பெரிய இறால் கிடைக்கும். இந்த மாசத்துல கடல் ஆக்ரோஷமா சொறப்பா இருக்குறதால, கடல் ஆழம் வரைக்கும் தண்ணிய நல்லா கலக்கிவிடும். அதனால, ஆழத்துல இருக்குற இறால், நண்டு, உடுப்பா, பன்னா, கருங்கத்தல மாதிரியான உயிரினமெல்லாம் கடலுக்கு மேல வந்து மேயும்.

இப்போ பாருங்க, ஆடி மாதம் முடிய 3 நாள்தான் இருக்கு. அலையே பெருசா இல்ல. கடல் சாதுவா இருக்குது.”

“ஆனால், ஜூலை மாசத்துல, அதாவது ஆணி மாசம் முழுக்க, கடல் ரொம்ப சொறப்பா இருந்துச்சு (ஆக்ரோஷமான அலைகளுடன், பனிக்கட்டி போன்ற குளிர் நீருடன்). அதிகாலையில கால்ல தண்ணி பட்டாலே ஐஸ் மாதிரி ஜில்லுனு இருக்கும். அதைத்தான் வண்டத் தண்ணினு சொல்லுவோம். இப்படி ஆடி மாசம் இருக்க வேண்டிய கடல், ஆணி மாசமே வந்துட்டு போயிருச்சு.”

கடந்த ஆகஸ்ட் 14ஆம் தேதி என்னுடன் அடையாறு முகத்துவாரத்தை நோக்கிக் கடலோரமாக நடந்தபடியே வந்த பாளையம் தனது மீன மொழியில் காலநிலை மாற்றத்தை விளக்கினார். இந்த மாதத்தில் வீசவேண்டிய காற்றும் நிலவ வேண்டிய கடலின் தன்மையும், ஜூலை மாதத்திலேயே முடிந்துவிட்டதைத் தனது அவதானிப்புகளின் மூலமாக அவர் பதிவு செய்துள்ளார்.

இப்படியாக காலநிலை மாற்றத்தின் விளைவுகளைத் தனது மொழியில் விவரித்துக்கொண்டே அதிகாலை வேளையில் ஊரூர் குப்பம் கடற்கரையில் தொடங்கி அடையாறு முகத்துவாரத்தை நோக்கி என்னுடன் நீண்டநேரம் நடந்து வந்தார்.

பாளையம் சொல்வதுபோல், கடலின் தன்மை மட்டுமல்ல, சென்னை கடலோரத்தில் நிகழும் கடலரிப்பும் கடல்மட்ட உயர்வும் அஞ்சத்தக்க வகையில் திவிரமடைவதாக வல்லுநர்கள் எச்சரிக்கின்றனர்.

பட மூலாதாரம்,SUBAGUNAM/BBC

சென்னையில் 2040ஆம் ஆண்டுக்குள் சுமார் ஏழு சதவீத நிலம் நீரில் மூழ்கும் என்று கடந்த ஆகஸ்ட் 1ஆம் தேதி வெளியான ஓர் ஆய்வறிக்கை எச்சரித்துள்ளது. பெங்களூருவை தளமாகக் கொண்டு இயங்கிவரும் அறிவியல், தொழில்நுட்பம் மற்றும் கொள்கை ஆய்வு மையம் (CSTEP) மேற்கொண்ட இந்த ஆய்வில், இந்திய கடலோர நகரங்களுக்கான வெள்ள வரைபடங்கள் வகுக்கப்பட்டுள்ளன.

இந்த ஆய்வின்படி, அடையாறு சுற்றுச்சூழல் பூங்கா, பள்ளிக்கரணை சதுப்புநிலம், மெட்ராஸ் துறைமுகம் ஆகியவை கடல்மட்ட உயர்வால் மூழ்கும் ஆபத்து இருப்பதாகக் கூறப்பட்டுள்ளது.

மேலும், “2040ஆம் ஆண்டுக்குள் சென்னைப் பெருநகரில் சுமார் 7.29% பகுதிகளில் கடல்நீர் உட்புகுந்துவிடும் என்றும் 2060ஆம் ஆண்டில், 9.65% பகுதிகள் கடலில் மூழ்கும் எனவும், அதுவே 2100இல் 16.9%, அதாவது சென்னையின் பரப்பளவில் 207.04 சதுர.கி.மீ மூழ்கிவிடும் என்றும்” இந்த ஆய்வு எச்சரிக்கிறது.

இதேபோல், கடந்த மாதம் அண்ணா பல்கலைக்கழகத்தின் காலநிலை மாற்றம் மற்றும் பேரிடர் மேலாண்மை ஆய்வு மையம் வெளியிட்ட அறிக்கைப்படி, 2050ஆம் ஆண்டுக்குள் தமிழக கடலோர பகுதியில் 19.2செ.மீ. அளவுக்கு கடல்மட்ட உயர்வு இருக்கலாம். இதனால் “சென்னை பெருநகரில் மட்டுமே சுமார் 6,120 ஹெக்டேர் நிலப்பகுதி கடலுக்குள் செல்லக்கூடும்” என எச்சரிக்கப்படுகிறது.

இவற்றின் விளைவாக ஏற்கெனவே பெருகிவரும் காலநிலை பேரிடர்கள், அதிதீவிர பருவநிலை நிகழ்வுகளின் தாக்கம் இன்னும் அதிகமாக இருக்கும் என்றும் எச்சரிக்கிறது சி.சி.சி.டி.எம்-இன் இந்த ஆய்வு.

பட மூலாதாரம்,GETTY IMAGES

“விஞ்ஞானிகள் 2050ஆம் ஆண்டுக்குள் கடலுக்குள் மூழ்கலாம் என்றுதான் எச்சரித்துள்ளார்கள். கண்டிப்பாக மூழ்கும் எனச் சொல்லவில்லை. ஆனால், அரசு இதைக் காரணம் காட்டி கடலோரத்தில் இருக்கும் மீனவர்களை நகரத்திற்குள் இடம் மாற்றுமே தவிர, இதன் விளைவாக இப்போது அதிகரிக்கும் பேரிடர் அபாயத்தில் இருந்து எங்களைப் போன்ற எளிய மக்களைக் காக்க நடவடிக்கை எடுக்குமா?” என்று அச்சம் தெரிவிக்கிறார் பாளையம்.

பாளையம் போன்ற எளிய சமூகத்தினர் முன்வைக்கும் ஒரே கேள்வி, “இந்தப் பேரிடர்களைத் தாங்கி நின்று, எங்களை அச்சமின்றி வாழ வைக்கும் திறன் சென்னை பெருநகருக்கு இருக்கிறதா?”

“உண்மையில் இல்லை” என்பதே அதற்கான பதில் என்கிறார் கேர் எர்த் அமைப்பின் நிர்வாக அறங்காவலரும் மூத்த சூழலியல்வாதியுமான ஜெயஸ்ரீ வெங்கடேசன்.

“சென்னைக்கான இரண்டாவது மாஸ்டர் ப்ளான் வரையிலும், பெருநகர் எதிர்கொள்ளும் பேரிடர்களோ, சமூக சமத்துவமின்மையோ, சூழலியல் பாதுகாப்போ எதுவுமே கவனத்தில் கொள்ளப்படவில்லை. உரிய வகையில் கருத்துகள், ஆலோசனைகள் கேட்கப்படவில்லை.

ஆனால், தற்போது உருவாக்கப்பட்டு வரும் மூன்றாவது மாஸ்டர் ப்ளானில் அத்தகைய அம்சங்கள் இடம்பெற்றுள்ளன. இருப்பினும் அது போதவில்லை,” என்பதே அவரது கூற்று.

நகரத் திட்டமிடுதலைப் பொறுத்தவரை ஒரு போதாமை எப்போதுமே நிலவுவதாக ஜெயஸ்ரீ கூறுகிறார். அதாவது, காலநிலை நெருக்கடியின் ஆபத்துகளைப் பற்றி அதிகாரிகள், வல்லுநர்கள் மட்டத்தில் பரவலாக ஒரு புரிதல் ஏற்பட்டுள்ளது.

இருப்பினும், அந்தப் புரிதலை “நகரத் திட்டமிடுதலில் எப்படிக் கொண்டு வந்து பொருத்துவது? காலநிலை ஆபத்துகள் இருக்கின்றன சரி. அந்த அபாயங்களைக் கையாளத் தகுந்த நகரத்தைத் திட்டமிடுவது எப்படி?” இதில் அதிக கவனம் செலுத்தப்படுவதில்லை என்கிறார் அவர்.

பட மூலாதாரம்,GETTY IMAGES

“பல்வேறு மீன்பிடிக் கிராமங்கள், பாக்கங்கள், பேட்டைகள், எனச் சுற்றியிருந்த பல பகுதிகளைக் கொஞ்சம் கொஞ்சமாக விழுங்கித்தான் சென்னை இப்போதைய நிலைக்குப் பெருத்துள்ளதாக” சுந்தர்ராஜன் கூறுகிறார்.

அவரது கூற்றுப்படி, பல நீர்நிலைகள், சதுப்புநிலங்களை அழித்துதான் இப்போதைய சென்னை உருவாக்கப்பட்டுள்ளது. இந்தக் காரணங்களால் நகர்புற வெப்பத் தீவுகள் (Urban heart Island), வெப்ப அலை, கடல் அரிப்பு, வெள்ளம் எனப் பல சவால்களை எதிர்கொண்டு வருகிறது.

சென்னை, மும்பை போன்ற பெருநகரங்கள் மிகக் கடுமையான காலநிலை சவால்களை எதிர்கொண்டு வருவதாகவும் அவற்றைக் கையாள்வதற்கு ஏற்ற நகரக் கட்டமைப்பு இந்த நகரங்களுக்கு இல்லை எனவும் வல்லுநர்கள் கூறுகின்றனர்.

சென்னையில் நகர்ப்புற வெப்பத் தீவுகள், அதாவது 40 டிகிரி செல்ஷியஸ் இருந்தாலும்கூட, 50 டிகிரி அளவுக்கு மக்கள் வெப்பத்தை உணரும் நிலை வெகுவாக அதிகரித்துள்ளதாக ஆய்வுகள் தெரிவிக்கின்றன.

இது ஒருபுறம் இருக்க, கிழக்குக் கடற்கரையில் கடும் கடல் அரிப்பு ஏற்பட்டு வருவதாகவும் சென்னையின் ஆறுகளைத் தூர்வாருவதில் முறையான அறிவியல்பூர்வ அணுகுமுறை பின்பற்றப்படுவதில்லை எனவும் சுந்தர்ராஜன் எச்சரிக்கிறார்.

இதற்குச் சான்றாக, அடையாறு முகத்துவாரப் பகுதியைச் சுட்டிக் காட்டுகிறார் மீனவர் பாளையம். அவருடன் அடையாறு முகத்துவாரப் பகுதியை நேரில் சென்று பார்வையிட்டபோது, முகத்துவாரம் மிகச் சிறிதாக, ஆழமற்று இருந்ததைக் காண முடிந்தது.

பட மூலாதாரம்,SUBAGUNAM/BBC

“முகத்துவாரத்தை நல்லா ஆழப்படுத்தி, கடல்நீர் உள்ள போய், வர ஏதுவா தூர்வாரணும். ஆனால், இங்கு மண்ணை எங்கே எடுக்க வேண்டும் என்ற திட்டமிடலே இல்லாமல் அகற்றி, முகத்துவாரப் பகுதியின் ஓரத்திலேயே மீண்டும் குவித்துவிடுகிறார்கள். இதனால், ஒரு மழை பெய்து ஆற்று நீர் வரும்போதோ, கடல் நீரோட்டத்தின்போதோ, அங்கு தேங்கியிருக்கும் மண்ணை அது மீண்டும் சேர்த்துவிட்டுச் செல்கிறது.”

இப்படிச் செய்தால், முகத்துவாரத்தில் எப்படி கடல்நீர் உள்ளே வந்து செல்லும், மீன்கள் எப்படி ஆற்றுக்குள் வரும், போகும் என்று ஆதங்கப்படுகிறார் அவர்.

மேலும், இத்தகைய அணுகுமுறையால் ஆற்றிலுள்ள கழிவுகள் வெளியேறாமல் கழிமுகத்திலேயே தேங்கியிருந்து, மாசுபடுத்துவதால் மீன்கள் செத்து மடிவதாகக் கூறுகிறார் மற்றொரு மீனவரான ரவிக்குமார்.

ஆனால், அடையாற்றின் தூர்வாரும் பணியில் முன்னேற்றம் இருப்பதாகவும் அடுத்தடுத்த பணிகளில் இந்தப் பிரச்னைகளுக்கும் திர்வு எட்டப்படும் எனத் தான் நம்புவதாகவும் கூறுகிறார் சென்னை ஐஐடியை சேர்ந்தவரும் வளம்குன்றா நகரங்கள் மற்றும் பேரிடர் மேலாண்மை குறித்து ஆய்வு செய்தவருமான முனைவர்.கிருத்திகா முருகேசன்.

அவரது கூற்றுப்படி, அடையாற்றின் முகத்துவாரப் பகுதியிலுள்ள அடையாறு சூழலியல் பூங்கா பகுதியில் மீட்டுருவாக்கப்பட்டுள்ள அலையாத்திக் காடுகளின் செழிப்பே அதற்கான சான்று.

பட மூலாதாரம்,SUBAGUNAM/BBC

ஆனால் அடையாறு முகத்துவாரம் அருகே இருக்கும் உடைந்த பாலத்தின் கீழே வலைகளைப் பிரித்துக் கொண்டிருந்த மீனவரான குப்பன், “ஏற்கெனவே ஓரளவுக்கு நன்றாக இருந்த முகத்துவாரத்தை இப்போது மோசமான நிலைக்குத் தள்ளிவிட்டார்கள்," என்கிறார்.

"சரியான அணுகுமுறை இல்லாமல், இப்போது ஆற்றையும் முகத்துவாரத்தையும் சார்ந்திருந்த நாங்கள் மீன்பிடிக்க கடலுக்குள் செல்லத் தொடங்கிவிட்டோம். ஏதேனும் செய்வதாக இருந்தால், அதை முழுமையாகப் புரிந்துகொண்டு செய்ய வேண்டும். இல்லையென்றால் இப்படித்தான் மேலும் மோசமடையும்,” என்றும் அவர் வருந்துகிறார்.

அறிவியல், தொழில்நுட்பம் மற்றும் கொள்கை ஆய்வு மையத்தின் ஆய்வுப்படி, கடந்த 1987 முதல் 2021 வரையிலான காலகட்டத்தின்போது சென்னையில் 0.679 செ.மீ. கடல்மட்டம் உயர்ந்துள்ளது. அதாவது 'ஆண்டுக்கு, 0.066செ.மீ. அளவுக்கு உயர்ந்துள்ளது.'

இந்திய கடலோரங்களைப் பொறுத்தவரை, கடந்த 30 ஆண்டுகளில் அதிகபட்ச கடல்மட்ட உயர்வு மும்பையில் பதிவாகியிருப்பதாகவும் ஆய்வறிக்கை கூறுகிறது. அதன்படி, 'மும்பையின் கடலோரங்களில் ஆண்டுக்கு ஆண்டுக்கு 0.31 செ.மீ. என்ற விகிதத்தில் கடல்மட்ட உயர்வு பதிவு செய்யப்பட்டுள்ளது.'

சென்னையில் ஒரு சதுர கிலோமீட்டருக்கு வசிக்கும் மக்களின் எண்ணிக்கை 24,000ஐ தாண்டுவதாக மக்கள் தொகை தரவுகள் தெரிவிக்கின்றன. இந்நிலையில், தொடர்ந்து விரிவடைந்துகொண்டே இருக்கும் தலைநகரில் அதிதீவிர நகரமயமாக்கல், கடற்கரை பகுதிகளில் அதிகபட்ச பாதிப்புகளை ஏற்படுத்துவதாக ஆய்வுகள் சுட்டிக்காட்டுகின்றன.

பட மூலாதாரம்,SUBAGUNAM/BBC

காலநிலை நெருக்கடியை விரைவுபடுத்தும் காரணிகளால் ஏற்படும் பாதிப்புகளுடன் “சென்னை பெருத்துக் கொண்டிருப்பதற்கு” தொடர்பு இருப்பதாகக் கூறுகிறார் கோ.சுந்தர்ராஜன்.

சென்னையின் பல பகுதிகள் கடல் மட்டத்தில் இருந்து பத்து மீட்டருக்கும் குறைவான உயரத்திலேயே இருக்கின்றன. சோலிங்கநல்லூர் (3மீ), பள்ளிக்கரணை (2மீட்டர்), ஒக்கியம் மடுவு (2மீட்டர்) உட்படப் பல பகுதிகள் மூன்று மீட்டருக்கும் குறைவான உயரத்தில்கூட இருக்கின்றன.

இப்படிப்பட்ட தாழ்வான கடலோர நகரங்கள், கடல்மட்ட உயர்வால் தீவிரமாகப் பாதிக்கப்படும் என்று பல்வேறு ஆய்வுகள் சுட்டிக்காட்டியுள்ளன. மேலும், அறிவியல், தொழில்நுட்பம் மற்றும் கொள்கை ஆய்வு மையத்தின் ஆய்வில், பகுப்பாய்வுக்கு உட்படுத்தப்பட்ட 15 நகரங்களில், இத்தகைய நெருக்கடிகளால் எளிதில் பாதிக்கப்படும் அபாயத்தில் சென்னை, மும்பை நகரங்கள் முதலிடத்தைப் பிடித்துள்ளன.

இவ்வளவு பேரிடர்கள் தமிழகத் தலைநகரைச் சூழ்ந்திருக்கும்போதிலும், சென்னையை மேன்மேலும் விரிவுபடுத்திக் கொண்டே செல்வது ஏற்புடையதல்ல எனக் கூறும் சுந்தர்ராஜன், இந்த அதிதீவிர நகரமயமாக்கலை நிறுத்த வேண்டும் என்கிறார்.

இல்லையெனில், பெருகிவரும் மக்கள் தொகை அடர்த்தி, தீவிரமடையும் பேரிடர் நிகழ்வுகளால், சென்னை பெருநகரம் “சர்வதேச அளவில் வாழத் தகுதியற்ற, பேரிடர் சூழ் நகரமாகப் பார்க்கப்படும் அபாயம் இருப்பதாக” எச்சரிக்கிறார். இதன் விளைவாக, இங்கு வரும் முதலீடுகள் முதல் மக்களின் வளர்ச்சி வரை அனைத்துமே பெரிய அடியை எதிர்கொள்ளும் என்கிறார்.

பட மூலாதாரம்,GETTY IMAGES

உண்மையில் “இப்போதைய சூழலில் காலநிலை நெருக்கடியால் சென்னைக்கு ஏற்படும் அபாயங்களைக் கையாள நம்மிடம் எந்த நடவடிக்கையும் இல்லை” என்கிறார் ஜெயஸ்ரீ வெங்கடேசன்.

உடனடி நடவடிக்கைகளில் முதன்மையானதாக அவர் குறிப்பிடுவது, “அந்தந்த பகுதிகளில் இருக்கும் நீர்நிலையில் இருந்தே அங்குள்ள குடியிருப்புகளுக்கு குடிநீர் விநியோகம் செய்யும் அளவுக்கு நீர்நிலைகளின் தரத்தை உயர்த்த வேண்டும். அதன் மூலம், நீர்நிலைகளை மட்டுமே மீட்க முடியும். நகரிலுள்ள நீர்நிலைகளைச் சுற்றி பூங்காக்களை அமைப்பதால் பெரிய முன்னேற்றங்கள் ஏற்பட்டுவிடாது.”

சென்னை மட்டுமின்றி, இந்தியாவிலுள்ள அனைத்து பெருநகரங்களுமே காலநிலை பிரச்னையை துண்டு துண்டாக அணுகுவதாக விமர்சிக்கிறார் ஜெயஸ்ரீ.

அவர், “நீரியல், சூழலியல், நிலவியல் என அனைத்துத் துறைகளும் தனித்தனியாக இயங்குகின்றன. இதனால், அரசு நிர்வாகம் ஒரு ஒருங்கிணைக்கப்பட்ட புரிதலைப் பெறுவதிலும், அதன் அடிப்படையில் திட்டங்களை வகுப்பதிலும் ஒரு போதாமை நிலவுவதாக” கூறுகிறார்.

பட மூலாதாரம்,SUBAGUNAM/BBC

அதாவது, வெள்ளம் பற்றிப் பேசும்போது வறட்சி குறித்தும் பேச வேண்டும், வெப்பத் திட்டுகள் குறித்துப் பேசும்போது உயரும் வெப்பநிலையைப் பேச வேண்டும், கடல் அரிப்பைப் பற்றிப் பேசும்போது, அலைகளின் தன்மை மற்றும் முகத்துவாரம் பற்றியும் பேச வேண்டியது அவசியம்.

சென்னையின் நகரத் திட்டமிடுதலில் இந்த சவால்கள் இருப்பதை ஏற்றுக்கொள்ளும் அதேவேளையில், தற்போது அதற்கான சில திட்டங்கள் முன்னெடுக்கப்பட்டு வருவதாகவும் கூறுகிறார் முனைவர்.கிருத்திகா முருகேசன்.

“சென்னை மாநகராட்சி காலநிலை நிதியின்மீது கவனம் செலுத்தவுள்ளார்கள். இதன்மூலம், சமூக-பொருளாதார, காலநிலை அபாயங்களை எதிர்கொள்ளும் மக்களின் நலனில் இந்தத் திட்டத்தின் மூலம் கவனம் செலுத்த முடியும்,” என்கிறார் முனைவர்.கிருத்திகா.

மேலும், இதன்மூலம் காலநிலை அபாயங்களை அடையாளம் கண்டு, அவற்றுக்கான நிதி ஒதுக்கீட்டில் எவற்றுக்கு முன்னுரிமை அளிக்க வேண்டும் என்பனவற்றின் அடிப்படையில் கவனம் செலுத்த சென்னை மாநகராட்சி திட்டமிட்டு இருப்பதாகவும் அவர் கூறுகிறார். இதற்கான ஆய்வுகளை உலக வள நிறுவனத்தின்கீழ் செய்துகொண்டிருப்பதாகவும் முனைவர்.கிருத்திகா தெரிவித்தார்.

பட மூலாதாரம்,GETTY IMAGES

அதோடு, இத்தனை ஆண்டுகளாக நிகழ்ந்திருக்கும் பிரச்னைகள் அனைத்தையும் மொத்தமாகச் சரி செய்வது சாத்தியமே இல்லை எனக் கூறும் அவர், ஆனால் அதற்கான முதல் படியை சென்னை மாநகராட்சி இப்போது எடுத்து வைத்துள்ளதாகத் தெரிவித்தார்.

அடையாற்றின் முகத்துவாரத்தில் இருந்து ஊரூர் குப்பத்தை நோக்கித் திரும்பி வந்துகொண்டிருந்தபோது, “நகரத்தைச் சரியா திட்டமிட எல்லாரும் ஆயிரம் வழி சொல்றாங்க. என் அறிவுக்குத் தெரிஞ்சதெல்லாம் ஒரே வழிதான்,” என்றார் மீனவர் பாளையம்.

“முதல்ல ஆறு சுத்தமா இருக்கணும். அப்பதான், கடல் தண்ணி அதுவழியாக உள்ள போய்கிட்டு, வந்துகிட்டு இருக்கும். அது சரியா நடந்தாலே ஊருக்குள்ள ஒரு கொசு இருக்காத்து, ஊரும் நல்லா இருக்கும். அப்புறம் தன்னால, எவ்வளவு பெருமழையா கொட்டுனாலும், அடிச்சுட்டு வந்து கடலோட சேர்த்து, சென்னை மூழ்காம ஆறும், கடலும் சேர்ந்து பாத்துக்கும். அதுக்கு முதல்ல அதை அழிக்காம இருக்கணும். நகரத்துக்குள்ள ஓடுற ஆற்றைப் பராமரிப்பதுதான் நகரத் திட்டமிடலின் மையப் புள்ளியா இருக்கணும்.”என்கிறார்

https://www.bbc.com/tamil/articles/c623zg1w80xo

ரெயின்கோட் மட்டுமே அணிந்திருக்கிறார். கையில் முதலுதவி உபகரணங்கள் அடங்கிய ஒரு பையை இறுகப் பற்றியுள்ளார். கீழே ஆற்றில் வெள்ளம் ஓடிக்கொண்டிருக்கிறது. அந்த ஆற்றை ஜிப்லைன் வாயிலாகக் கடந்து சென்று பாதிக்கப்பட்டவர்களுக்கு சிகிச்சையளிக்க வேண்டும்.

வயநாட்டில் நிலச்சரிவு ஏற்பட்டபோது சூரல்மலையில் இருந்து இப்படி ஜிப்லைன் மூலமாக ஒரு செவிலியர் முண்டகைக்குச் சென்று பாதிக்கப்பட்டவர்களுக்கு முதலுதவி அளித்து காப்பாற்றியுள்ளார். அவர் நீலகிரி மாவட்டம் கூடலூரைச் சேர்ந்த செவிலியர் சபீனா.

ஜிப்லைன் வாயிலாகச் செல்வது அவருக்கு இதுவே முதன்முறை. மழை பெய்துகொண்டிருக்கிறது, மீண்டும் நிலச்சரிவுக்கான எச்சரிக்கை. ஆனால் அவர் எதையும் பொருட்படுத்தவில்லை என்பது அவரிடம் பேசியதில் புரிந்தது.

பிபிசி தமிழ் சார்பில் அவரிடம் “ஜிப்லைனில் சென்று சிகிச்சை அளிப்பதற்குப் பயமில்லையா?” எனக் கேட்டபோது, “பாதிக்கப்பட்டவர்களைக் காப்பாற்ற வேண்டும் என்ற எண்ணம்தான் இருந்தது. பயம் இல்லை” என பதிலளித்தார்.

அவருடைய பணியைப் பாராட்டி தமிழ்நாடு அரசு கல்பனா சாவ்லா விருது வழங்கி சுதந்திர தின விழாவில் கௌரவித்தது.

செவிலியர் சபீனா, ஷிஹாப் தங்கல் மனிதநேய மையம் எனும் தொண்டு நிறுவனத்தில் மூன்று ஆண்டுகளாக செவிலியராகப் பணிபுரிந்து வருகிறார். புற்றுநோயால் பாதிக்கப்பட்டு படுக்கையிலேயே முடங்கிக் கிடப்பவர்களின் வசிப்பிடத்திற்கே சென்று சிகிச்சை அளிக்கும் பணியை அவர் செய்து வருகிறார்.

ஜூலை 29 அன்று கேரளாவின் வயநாட்டில் நிலச்சரிவு ஏற்பட்டது. இதில், சூரல்மலை, முண்டகை எனும் இரண்டு பகுதிகள் பெருமளவில் பாதிக்கப்பட்டன. இரு கிராமங்களையும் இணைக்கும் பாலம் வெள்ளத்தில் அடித்துச் செல்லப்பட்டது. இது மீட்புப் பணிகளில் குறிப்பிடத்தக்க தடங்கல்களை ஏற்படுத்தியது.

குறிப்பாக, சூரல்மலையில் இருந்து முண்டகைக்கு அந்தப் பாலம் வழியாகத்தான் செல்ல வேண்டும். எனவே, முண்டகைக்குச் சென்று காயம் அடைந்தவர்களுக்கு சிகிச்சை அளிப்பதற்குத் தாமதமானது. எனவே, ராணுவம், தேசியப் பேரிடர் மீட்புப்படை உள்ளிட்ட மீட்புக் குழுவினர் சூரல்மலையில் இருந்து ஜிப்லைன் அமைத்து அதன் வாயிலாக முண்டகைக்குச் சென்று பாதிக்கப்பட்டவர்களை மீட்க வேண்டியிருந்தது.

இப்படி ஜிப்லைன் வாயிலாக முண்டகைக்குச் சென்று பாதிக்கப்பட்டவர்களுக்கு முதலுதவி அளித்திருக்கிறார் செவிலியர் சபீனா.

“ஜூலை 29ஆம் தேதி நள்ளிரவு நிலச்சரிவு ஏற்படுகிறது. 30ஆம் தேதி முதலுதவி உபகரணங்களை எடுத்துக்கொண்டு உடனடியாக வருமாறு எங்கள் குழுவிலிருந்து எனக்கு அழைப்பு வந்தது."

"எங்கள் குழுவிலிருந்து ஏற்கெனவே பிந்து, சிந்தியா என்ற இரு செவிலியர்கள் அங்கு சென்றிருந்தனர். காலை 10-10.30 மணிக்கு நாங்கள் சூரல்மலைக்குச் சென்றபோது, ‘யாரும் இங்கு நிற்க வேண்டாம், ஆபத்து. மீண்டும் நிலச்சரிவு ஏற்படலாம்’ என எச்சரித்தனர்” என்கிறார் பிபிசியிடம் பேசிய சபீனா.

சபீனாவுக்கு அங்கிருந்து திரும்பிச் செல்ல மனம் வரவில்லை.

“நாம் வந்தது உதவுவதற்காகத்தானே, ஏன் திரும்பிச் செல்ல வேண்டும், காத்திருக்கலாம் என எனக்குத் தோன்றியது” என்கிறார் அவர்.

பட மூலாதாரம்,SABEENA

அப்போது மீட்புக்குழுவினர், சூரல்மலையிலிருந்து முண்டகைக்கு ஜிப்லைன் வாயிலாகச் சென்று சிகிச்சை அளிக்க ஆண் செவிலியர்கள் யாரும் இருக்கின்றனரா எனக் கேட்டுள்ளனர்.

ஆனால், சபீனாவின் குழுவில் ஆண் செவிலியர்கள் இல்லை. பெண் செவிலியர்கள் ‘ரிஸ்க்’ எடுக்க வேண்டாம் என மீட்புக்குழுவினர் கூறியதாக சபீனா தெரிவிக்கிறார்.

“ஆனால், நான் ஜிப்லைன் வாயிலாகச் சென்று முதலுதவி அளிக்க முன்வந்தேன். ஜிப்லைன் மூலமாக ஆற்றைக் கடந்து, முண்டகைக்குச் சென்று சுமார் 30-35 பேருக்கு முதலுதவி அளித்தேன்” என்கிறார் சபீனா.

“ஜிப்லைனில் செல்லும்போது நானே பெல்ட் அணிந்தேன். பெல்ட் இறுக்கமாக இல்லை என மீட்புக்குழுவினர் பயந்தனர். இருந்தாலும் சென்றேன். முதலுதவி உபகரணங்கள் உள்ள பை கீழே விழுந்துவிடப் போகிறது என ஆரம்பத்தில் பயந்தேன்” எனக் கூறுகிறார் அவர்.

சூரல்மலை - முண்டகை இடையே மீட்புப் பணிகளுக்காக கடந்த ஆகஸ்ட் 1 அன்று இந்திய ராணுவத்தின், ‘மெட்ராஸ் சாப்பர்ஸ்’ எனும் மெட்ராஸ் இன்ஜினியர் குழு குறுகிய நேரத்தில் ‘பெய்லி பாலம்’ எனப்படும் தற்காலிக இரும்புப் பாலத்தைக் கட்டினர்.

அப்பிரிவின் மேஜர் சீதா ஷெல்கே எனும் அதிகாரியின் கண்காணிப்பில்தான் அப்பாலம் 31 மணிநேரத்தில் கட்டி முடிக்கப்பட்டதாகத் தகவல் வெளியானது.

ஆனால், அப்பாலம் கட்டப்படுவதற்கு முன்பு வரை மீட்கப்படும் சடலங்கள், காயமடைந்தவர்கள் என எல்லோரையும் ஜிப்லைன் வாயிலாகத்தான் கட்டி மீட்புக் குழுவினர் அனுப்பினர்.

பட மூலாதாரம்,SABEENA

பாலம் அமைக்கப்படும் வரை ஒவ்வொரு நாளும் கூடலூரில் வீட்டிலிருந்து சூரல்மலைக்கு முதலுதவி உபகரணங்களுடன் வந்து, முதலுதவி சிகிச்சை அளித்துவிட்டு மீண்டும் கூடலூர் திரும்ப வேண்டும் என்று அப்போதைய சூழலை விவரித்தார் சபீனா.

"முதல் நாள் மட்டும்தான் முண்டகைக்கு ஜிப்லைனில் சென்று அங்கு காயமடைந்தவர்களுக்கு சிகிச்சை அளித்தோம். அப்போது இரவு 12 மணிவரை அங்கே இருந்தோம். அடுத்தடுத்த நாட்கள் சூரல்மலையில், மீட்புப் பணியின் போது காயமடைந்தவர்களுக்கு முதலுதவி அளித்தோம்.”

இறந்துவிட்டதாகக் கருதப்பட்ட ஒருவரைத் தங்கள் குழுவைச் சேர்ந்த செவிலியர் சி.பி.ஆர். எனப்படும் உயிர்காக்கும் சிகிச்சையளித்து காப்பாற்றியதாக அவர் கூறுகிறார்.

“எனக்கு எந்தப் பயமும் அந்தச் சூழலில் இல்லை. விரைந்து சென்று காப்பாற்ற வேண்டும் என்றுதான் தோன்றியது. ஏற்கெனவே மீட்புக் குழுவினர் அங்கு சென்று திரும்பினர். அதனால் எனக்கும் பயம் ஏற்படவில்லை” என்கிறார் அவர்.

சடலங்களும் காயமடைந்தவர்களும் ஒரே இடத்தில் கிடந்ததாகவும் சில நேரத்தில் சடலத்தைத் தாண்டியும், (அறியாமல் சடலங்களை மிதித்தும் செல்ல வேண்டியிருந்ததாக) கூறும் அவர், அந்தச் சூழல் தன்னை மிகவும் பாதித்ததாகக் கூறுகிறார்.

பட மூலாதாரம்,SABEENA

தான் முன்பு பணியாற்றிய தனியார் நிறுவனம் ஒன்றில் தாம் மிகவும் மதித்த ஒரு நபர் புற்றுநோயால் இறக்கவே, அதன் காரணமாகப் புற்றுநோயால் பாதிக்கப்பட்டவர்களுக்குப் பணி செய்ய முடிவெடுத்துள்ளார் சபீனா.

புற்றுநோயால் பாதிக்கப்பட்டவர்கள் தனது கண் முன்னே இறப்பதைப் பார்த்த சபீனா, வயநாடு நிலச்சரிவு துயரத்தையும் கனத்த மனதுடன் தாங்கிக்கொண்டு பணியை மேற்கொள்ள முடிந்ததாகக் கூறுகிறார்.

ஒற்றைப் பெற்றோரான சபீனா, தனது ஒரே மகளையும் செவிலியர் படிப்பைப் படிக்க வைத்திருக்கிறார்.

https://www.bbc.com/tamil/articles/cd9dld80zw0o

பட மூலாதாரம்,GETTY IMAGES

'மனித வாழ்வில் பிரிக்க முடியாதது எதுவோ?' என திருவிளையாடல் திரைப்படத்தின் தருமி பாணியில் கேட்டால், 'உப்பும் சர்க்கரையும்' என ஒரே வரியில் பதில் அளித்துவிடலாம்.

சராசரி இந்தியர் நாளொன்றுக்கு 10.98 கிராம் உப்பை உட்கொள்வதாக ‘டாக்ஸிக் லிங்க்’ ஆய்வறிக்கை கூறுகிறது. உலக சுகாதார நிறுவனம் சொல்லும் அளவைவிட இது இரு மடங்கு அதிகம். உலக சுகாதார நிறுவனம் வெளியிட்டுள்ள அளவுகோல்களின்படி, சராசரியாக ஒரு மனிதர் நாளொன்றுக்கு 5 கிராமுக்கும் குறைவாகவே உப்பு உட்கொள்ள வேண்டும்.

நாளொன்றுக்கு 10 ஸ்பூன் சர்க்கரையை உட்கொண்டால், ஒரு சராசரி இந்தியர் ஆண்டுக்கு 18 கிலோ சர்க்கரையை உட்கொள்வதாகப் பொருள்.

‘அதற்கேற்ப, மனித உடலில் நுண்ணிய பிளாஸ்டிக் துகள்களின் எண்ணிக்கையும் அதிகரித்து, பல்வேறு நோய்களை ஏற்படுத்துவதாக' டாக்ஸிக் லிங்க் (Toxics Link) என்ற அரசுசாரா சுற்றுச்சூழல் ஆராய்ச்சி நிறுவனத்தின் சமீபத்திய ஆய்வறிக்கை கூறுகிறது.

புது டெல்லியை தலைமையிடமாகக் கொண்டு செயல்படும் இந்நிறுவனம், 'உப்பு, சர்க்கரையில் நுண்ணிய பிளாஸ்டிக் துகள்கள்' (Microplastics in Salt and Sugar) என்ற தலைப்பில் ஆய்வுக் கட்டுரை ஒன்றை வெளியிட்டுள்ளது.

கடந்த 2020, 2021ஆம் ஆண்டுகளில் இருந்து, உலகம் முழுவதும் பல்வேறு பகுதிகளில் ஆய்வுகள் மேற்கொள்ளப்பட்டதாக, இந்நிறுவனம் கூறுகிறது. இந்தியாவில் பல்வேறு மாநிலங்களில் ஆய்வு நடத்தப்பட்டதாகவும், தமிழ்நாட்டில் தூத்துக்குடி, மரக்காணம் உள்படப் பல பகுதிகளில் உப்பு, சர்க்கரை தொடர்பாக ஆய்வுகள் நடத்தப்பட்டதாகவும் தெரிவித்துள்ளது.

'டாக்ஸிக் லிங்க்' நிறுவனத்தினர் மேற்கொண்ட ஆய்வில், கடல் உப்பு, பாறை உப்பு, கல் உப்பு உள்பட 10 வகையான உப்புகளும் 5 வகையான சர்க்கரைகளும் ஆய்வுக்கு எடுத்துக் கொள்ளப்பட்டதாக அறிக்கையில் கூறப்பட்டுள்ளது.

ஆய்வு முடிவில், உப்பு மற்றும் சர்க்கரையில் 0.1 முதல் 0.5 மில்லிமீட்டர் வரை பல்வேறு வடிவங்களில் நுண்ணிய பிளாஸ்டிக் துகள்கள் இருந்ததாகக் கூறப்பட்டுள்ளது.

உப்பு தொடர்பான ஆய்வில், 1 கிலோவுக்கு 6.71 முதல் 89.15 வரை மைக்ரோ பிளாஸ்டிக் துகள்கள் இருந்ததாகவும் அயோடின் உப்பில் அதிகபட்சமாக 89.15 பிளாஸ்டிக் துகள்களும் சாதாரண கல் உப்பில் 6.7 என்ற அளவிலும் துகள்கள் இருந்ததாகக் கூறுகிறது.

சர்க்கரையைப் பொறுத்தவரை, ஒரு கிலோவுக்கு 11.85 முதல் 68.25 வரை மைக்ரோ பிளாஸ்டிக் துகள்கள் இருந்துள்ளதாகத் தெரிவிக்கப்பட்டுள்ளது.

பட மூலாதாரம்,GETTY IMAGES

தூத்துக்குடியில் கடல் உப்பு, கிணற்று உப்பு (Borewell) ஆகியவற்றில் இருந்து தலா 7 மாதிரிகள் எடுத்துக் கொள்ளப்பட்டன. இதில், மைக்ரோ பிளாஸ்டிக் துகள்கள் இருந்துள்ளன.

மரக்காணம் மற்றும் பரங்கிப்பேட்டையில் நடத்தப்பட்ட ஆய்வில், உப்பு வைக்கப்பட்டிருந்த பாத்திரங்கள், கடைகளில் விற்கப்படும் உப்புகள் என தலா 6 மாதிரிகள் எடுத்துக் கொள்ளப்பட்டன. இதில், பிளாஸ்டிக் நார்கள் (fibre) இருந்ததாக கட்டுரை தெரிவிக்கிறது.

'இந்த பிளாஸ்டிக் துகள்கள், மூன்று வழிகளில் மனித உடலுக்குள் செல்கிறது. ஒன்று, நேரடியாக உள்ளே செல்லுதல், மூச்சு இழுத்தல் மற்றும் நேரடியாகத் தோல் மூலம் செல்வது ஆகியவற்றின் மூலம் பாதிப்பை ஏற்படுத்துகிறது. எச்சில், நுரையீரல், கல்லீரல், தாய்ப்பால், வயிற்றிலுள்ள குழந்தை, ஆகியவற்றில் நுண்ணிய பிளாஸ்டிக் துகள்களின் பாதிப்பு இருப்பது கண்டறியப்பட்டுள்ளது' என ஆய்வுக் கட்டுரை தெரிவிக்கிறது.

"நுண்ணிய பிளாஸ்டிக் துகள்கள் குறித்து அறிவியல்ரீதியான தரவுகளில் பங்களிப்பைச் செலுத்தும் நோக்கிலும் உலகளவில் பிளாஸடிக் பயன்பாடு குறித்த பிரச்னையைத் துல்லியமாக அணுகுவதற்கும் உதவுவதே இந்த ஆய்வின் நோக்கம்" என்கிறார், 'டாக்ஸிக் லிங்க்' நிறுவனத்தின் இயக்குநர் ரவி அகர்வால்.

பட மூலாதாரம்,GETTY IMAGES

"எட்டு ஆண்டுகளுக்கு முன்பு உலகம் முழுவதும் 15 முதல் 51 டிரில்லியன் மைக்ரோ பிளாஸ்டிக் துகள்கள் இருப்பதாகத் தகவல் வெளியானது. இப்போது இந்த எண்ணிக்கை மேலும் அதிகரித்திருக்கலாம். மைக்ரோ பிளாஸ்டிக் துகள்களை மனிதர்கள் முதல் விலங்குகள் வரை உட்கொள்வது உணவுச் சங்கிலியையே சிதைக்கிறது" என்கிறார், டாக்டர் பெருமாள் பிள்ளை. இவர், சென்னை மருத்துவக் கல்லூரியின் குழந்தைகள் நலத்துறை இணை பேராசிரியராக இருக்கிறார்.

பிபிசி தமிழிடம் பேசிய அவர், "அன்றாட வாழ்வில் தவிர்க்க முடியாத ஒன்றாக பிளாஸ்டிக் உள்ளது. அதைச் சார்ந்தே வாழ்ந்து கொண்டிருக்கிறோம். கடல், மண் உள்பட அனைத்திலும் பிளாஸ்டிக்கின் தாக்கம் இருக்கிறது. தெரிந்தோ, தெரியாமலோ அதை அன்றாடம் உட்கொண்டு வருகிறோம். காய்கறி, பழங்கள், மீன், இறைச்சி ஆகியவற்றில் நுண்ணிய பிளாஸ்டிக் துகள்களின் பாதிப்பு இருக்கிறது" என்கிறார்.

உப்பு, சர்க்கரையில் உள்ளதாகக் கூறப்படும் பிளாஸ்டிக் துகள்கள், மனித ஆரோக்கியத்தில் நீண்டகால பாதிப்புகளை ஏற்படுத்தலாம் எனக் குறிப்பிடும் டாக்டர் பெருமாள் பிள்ளை, "இவை ஹார்மோன் அமைப்புகளைப் பாதிக்கும். இதை என்டோகிரைன் (endocrine) சீர்குலைவு என்பார்கள். இந்த நுண்ணிய பிளாஸ்டிக் துகள்கள், மரபணு மாற்றங்களைத் தூண்டுவதாக உள்ளது. இதனால் புற்றுநோய், பக்கவாத பாதிப்புகளும் ஏற்படும்" என எச்சரிக்கிறார்.

இவற்றைத் தவிர்ப்பதற்கு மாற்று வழிகளையும் 'டாக்ஸிக் லிங்க்' கட்டுரை முன்வைக்கிறது. அதாவது, உணவுப் பொருள்களின் உற்பத்தி மற்றும் வர்த்தகப் பயன்பாட்டில் பிளாஸ்டிக் துகள்களைத் தவிர்ப்பது, உற்பத்தியின்போது கழிவுநீர் சுத்திகரிப்பை மேம்படுத்துவது, உணவுப் பொருள்களை பிளாஸ்டிக் பைகளில் அடைப்பதற்குப் பதிலாக மாற்று வழிகளைப் பயன்படுத்துவது ஆகியவை முக்கியப் பரிந்துரைகளாகக் கூறப்பட்டுள்ளது.

இதைச் சுட்டிக்காட்டும் டாக்டர் பெருமாள் பிள்ளை, "பாலிதீன் பைகள் உள்பட பிளாஸ்டிக் தொடர்பான பொருள்களை பொதுமக்கள் தவிர்க்க வேண்டும். இதற்காக, 'மீண்டும் மஞ்சப்பை இயக்கம்' என்ற விழிப்புணர்வுத் திட்டத்தை தமிழ்நாடு அரசு கொண்டு வந்தது. ஆனால், இந்தத் திட்டம் பெரியளவில் வரவேற்பைப் பெறவில்லை” என்கிறார்.

'மஞ்சப்பை இயக்கம்' என்பது சுதந்திர தினத்துக்கு கொடி ஏற்றுவதைப் போல ஒருநாள் நிகழ்வாக மாறிவிட்டதாகவும் அவர் வருத்தம் தெரிவிக்கிறார்.

பட மூலாதாரம்,GETTY IMAGES

"பிளாஸ்டிக் பொருள்களுக்கு மாற்றாக கண்ணாடிக் குடுவைகள், பீங்கான் பொருள்கள் என மாற்று வழிகளை யோசித்தால், உயிருக்கு ஆபத்தை ஏற்படுத்தும் நோய்களை வரவிடாமல் தடுக்கலாம்" என்கிறார் டாக்டர் பெருமாள் பிள்ளை.

பொதுவாக, இந்தியாவில் சர்க்கரை, உப்பு உள்ளிட்ட உணவுப் பொருள்களில் மைக்ரோ பிளாஸ்டிக் துகள்களின் அளவுகள் பெரிதாகக் கண்காணிக்கப்படுவதில்லை என நிபுணர்கள் கூறுகிறார்கள்.

ஆனால், உணவுப் பொருள்களில் நுண்ணிய பிளாஸ்டிக் துகள்களைக் கட்டுப்படுத்துவது குறித்து சில நாடுகள் தீவிர ஆய்வுகளை மேற்கொண்டு வருகின்றன.

குறிப்பாக, ஐரோப்பிய உணவுப் பாதுகாப்பு ஆணையம் (EFSA), உணவுப் பொருள்களில் பிளாஸ்டிக் துகள்களின் அபாயத்தைக் குறைப்பது தொடர்பான வழிமுறைகளை உருவாக்கி வருவதாகவும், உணவுப் பொருள்களில் பிளாஸ்டிக் துகள்கள் ஏற்படுத்தும் அபாயங்கள் குறித்து அமெரிக்காவின் உணவு மற்றும் மருந்து நிர்வாகம் (FDA) மதிப்பீடு செய்வதற்கான பணிகளைத் தொடங்கியுள்ளதாகவும் 'டாக்ஸிக் லிங்' நிறுவனத்தின் ஆய்வறிக்கை தெரிவிக்கிறது.

"தொலைக்காட்சிகளில், 'உங்க பேஸ்ட்டில் உப்பு இருக்கிறதா?' என்ற விளம்பரம் வரும். தற்போது. 'உங்கள் உப்பில் மைக்ரா பிளாஸ்டிக் இருக்கிறதா?' என்று கேட்கும் நிலை உருவாகிவிட்டது" என்கிறார் சூழல் ஆர்வலரும் பூவுலகின் நண்பர்கள் அமைப்பைச் சேர்ந்தவருமான பொறியாளர் சுந்தர்ராஜன்

கடலில் பிளாஸ்டிக் பொருள்கள் சேரும்போது, அதன் துகள்கள் மீன்களின் உடல்களுக்குள் செல்வதாகவும் அதைச் சாப்பிடும் மனிதர்களின் உடலுக்கு உள்ளேயும் மைக்ரோ பிளாஸ்டிக் துகள்கள் செல்வதாகவும் சுந்தர்ராஜன் விளக்குகிறார்.

பட மூலாதாரம்,DRJRADHAKRISHNAN/FACEBOOK

ஏனெனில், "உப்பு கடல் நீரில் இருந்து தயாரிக்கப்படுகிறது. ஆகையால், அவற்றிலும் பிளாஸ்டிக் நுண்துகள்கள் கலக்கின்றன."

பல்வேறு ஆய்வுகளில் மனிதக் கழிவு, தொப்புள் கொடி வரையில் மைக்ரோ பிளாஸ்டிக் துகள்கள் கண்டறியப்பட்டுள்ளன. நிலம், கடல், நீர்நிலைகள் என அனைத்திலும் பிளாஸ்டிக் பொருள்கள் நீக்கமற நிறைந்துவிட்டன. பிளாஸ்டிக் கழிவுகளால் நிலம் மாசுபடுவது பல கட்டங்களில் நிரூபிக்கப்பட்டுவிட்டது.

இந்த நிலையில், "பிளாஸ்டிக் கழிவு நிறைந்த அதே நிலத்தில்தான் கரும்பு விளைகிறது. அந்தக் கரும்பில் இருந்தே சர்க்கரை தயாரிக்கப்படுகிறது. அதை பிளாஸ்டிக் பைகளில் அடைப்பது தொடங்கி அனைத்து நிலைகளிலும் பிளாஸ்டிக் துகள்களின் ஆதிக்கம் இருக்கிறது.

உப்பும் சர்க்கரையும் சேர்த்துக் கொள்ளாத மனிதர்கள் இல்லை. ஆகவே, இந்த பிளாஸ்டிக் நுண்துகள்கள் ரத்தத்தில் சேர்கிறது. அதன் விளைவாக புற்றுநோய் உள்படப் பல்வேறு நோய்களின் தாக்கத்துக்கு மனிதர்கள் ஆளாக நேரிடும்," என்கிறார்.

"தமிழ்நாட்டில் உணவுப் பொருள்களில் மைக்ரோ பிளாஸ்டிக் துகள்களை கட்டுப்படுத்துவதற்கு நடவடிக்கை எடுக்கப்படுமா?" என்று உணவு மற்றும் நுகர்வோர் பாதுகாப்புத்துறை செயலர் ஜெ.ராதாகிருஷ்ணனிடம் பிபிசி தமிழ் சார்பில் கேட்டோம்.

அப்போது அவர், "உணவுப் பொருள்களின் தரம் குறித்து ஆராய்வதற்கு அதிகாரிகள் உள்ளனர். இந்த துறைக்கென்று தரக் கட்டுப்பாட்டு அலுவலர்கள் உள்ளனர். உணவுப் பாதுகாப்புக்கு மத்திய, மாநில அரசுகளில் தனித்தனி துறைகள் உள்ளன.

இதுகுறித்து அந்தந்த துறைகளில் இருந்து எங்களுக்குத் தகவல் தெரிவிக்கப்பட்டால், அதைப் பற்றி நிபுணர் குழுவிடம் ஆராய்ந்து நடவடிக்கை எடுப்போம்" என்று தெரிவித்தார்.

https://www.bbc.com/tamil/articles/cy8435lj92eo

பட மூலாதாரம்,IIT MADRAS

இந்தியாவின் சிறந்த கல்வி நிலையங்கள் பட்டியலில் முதலிடத்தை ஐஐடி மெட்ராஸ் முதல் இடம் பிடித்துள்ளது

கல்வி நிறுவனங்களுக்கான தேசியத் தரவரிசைக் கட்டமைப்பு(NIRF) பட்டியலை சமீபத்தில் வெளியிடப்பட்டது. வரையறுக்கப்பட்ட அளவுகோல்களின் அடிப்படையில் ஒட்டுமொத்தபிரிவில் , 2019 முதல் ஆறாவது முறையாக இந்திய தொழில்நுட்பக் கழகம் (ஐஐடி), மெட்ராஸ் முதல் இடம் பிடித்துள்ளது.

மத்திய கல்வி அமைச்சர் தர்மேந்திர பிரதான் திங்களன்று 2024 NIRF தரவரிசை விவரங்களை வெளியிட்டார். ஐஐடி மெட்ராஸ் 2016 முதல் ஒன்பதாவது ஆண்டாக பொறியியல் கல்வி நிறுவனங்களில் முதல் இடத்தைத் தக்க வைத்துக் கொண்டுள்ளது.

பெங்களூருவில் உள்ள இந்திய அறிவியல் கழகம், பல்கலைக்கழகங்கள் மற்றும் ஆராய்ச்சி பிரிவுகளின் கீழ் சிறந்த நிறுவனமாக உள்ளது.

இந்த ஆண்டு 16 பிரிவுகளில் தரவரிசைகள் வழங்கப்பட்டுள்ளன. இது கடந்த ஆண்டை விட மூன்று பிரிவுகள் அதிகம். திறந்தவெளி பல்கலைக்கழகங்கள், திறன் பல்கலைக்கழகங்கள் மற்றும் மாநில பொதுப் பல்கலைக்கழகங்கள் ஆகிய மூன்று புதிய பிரிவுகள் உள்ளன.

இந்த தரவரிசைப் பட்டியலுக்கான மதிப்பெண்கள் வழங்கும் முறையில் வெளிப்படைத்தன்மை இல்லை என விமர்சனங்களும் முன்வைக்கப்படுகின்றன.

பட மூலாதாரம்,IIT MADRAS

ஒட்டுமொத்த தரவரிசைப் பட்டியலில் இந்த ஆண்டு இரண்டாவது இடத்தில் பெங்களூரு ஐஐஎஸ்சி (இந்திய அறிவியல் கழகம்) உள்ளது. கடந்த ஆண்டும் இரண்டாவது இடத்தை பிடித்திருந்தது இந்திய அறிவியல் கழகம்.

இந்தப் பட்டியலில் நாட்டில் உள்ள ஐஐடி கல்வி நிறுவனங்களே முதல் பத்து இடங்களில் பெரும்பாலான இடங்களை பெற்றுள்ளன. மூன்றாவது இடத்தில் ஐஐடி பாம்பே, நான்காவது இடத்தில் ஐஐடி டெல்லி, அதற்கு அடுத்து, ஐஐடி கான்பூர், ஐஐடி கரக்பூர் இடம் பெற்றுள்ளன. ஏழாவது இடத்தை டெல்லி எய்ம்ஸ் பிடித்துள்ளது. ஐஐடி ரூர்கி எட்டாவது இடத்தையும், ஐஐடி குவஹாத்தி ஒன்பதாவது இடத்தையும், டெல்லியில் உள்ள ஜவஹர்லால் நேரு பல்கலைகழகம் பத்தாவது இடத்தையும் பிடித்துள்ளன.

ஒட்டுமொத்த தரவரிசை தவிர, பதினான்கு பிரிவுகளின் கீழ் கல்வி நிறுவனங்கள் மதிப்பீடு செய்யப்படுகின்றன. பொறியியல் கல்வி நிறுவனங்களின் பட்டியலிலும் ஐஐடி மெட்ராஸ் முதல் இடம் பிடித்துள்ளது. தொடர்ந்து ஒன்பதாவது முறையாக இந்த இடத்தை ஐஐடி மெட்ராஸ் தக்க வைத்துள்ளது.

பல்கலைகழகங்கள் பிரிவில் பெங்களூரூ இந்திய அறிவியல் கழகம் முதல் இடத்தைப் பிடித்துள்ளது. கல்லூரிகள் பிரிவில் டெல்லி இந்து கல்லூரி, நிர்வாக மேலாண்மை பிரிவில் ஐ ஐ எம் அகமதாபாத், மருந்து சார்ந்த படிப்புகளில் ஜாமியா ஹம்தராத், மருத்துவக் கல்வியில் டெல்லி எய்ம்ஸ், பல் மருத்துவக் கல்வியில் சென்னை சவிதா கல்லூரி, சட்டப்படிப்பில் பெங்களூருவில் உள்ள இந்திய தேசிய சட்டப் பள்ளி பல்கலைக்கழகம், கட்டிடக்கலை படிப்பில் ஐஐடி ரூர்க்கி, வேளாண் படிப்பில் டெல்லியில் உள்ள இந்திய வேளாண் ஆராய்ச்சி நிறுவனம் முதலிடத்தைப் பிடித்துள்ளன.

கல்வி நிலையங்களில் மேற்கொள்ளப்படும் புதிய முயற்சிகளுக்கான தரவரிசைப் பட்டியலில் ஐஐடி பாம்பே முதலிடம் பிடித்துள்ளது. திறந்த நிலைப் பல்கலைக் கழகங்களுக்கான தர வரிசைப் பட்டியலில் இந்திரா காந்தி தேசிய பல்கலைக்கழகமும், திறன் மேம்பாட்டு படிப்புகளை சொல்லித்தரும் கல்வி நிறுவனங்களை புனேவில் உள்ள சிம்பயோசிஸ் பல்கலைக்கழகமும், மாநில பல்கலைக் கழகங்களுக்கான தர வரிசைப் பட்டியலில் சென்னை அண்ணா பல்கலைக்கழகம் முதலிடத்தைப் பிடித்துள்ளது

பட மூலாதாரம்,IIT MADRAS

ஐஐடி மெட்ராஸ், கல்வி நிறுவனங்களுக்கான ஒட்டுமொத்த தர வரிசைப் பட்டியலில் 86.42 புள்ளிகள் பெற்று, ஆறாவது ஆண்டாக தொடர்ந்து முதல் இடம் பிடித்துள்ளது. கடந்த ஆண்டு 86.69 புள்ளிகள் பெற்றிருந்தது. பொறியியல் கல்வி நிறுவனங்களுக்கான பிரிவில் இந்த ஆண்டு 89.46 புள்ளிகளும், கடந்த ஆண்டு 89.79 புள்ளிகளும் பெற்றிருந்தது ஐஐடி மெட்ராஸ். புதிய முயற்சிகளுக்கான தரவரிசைப் பட்டியலில் இரண்டாவது இடத்தையும், ஆராய்ச்சி பிரிவின் கீழ் இரண்டாவது இடத்தையும், பிடித்துள்ளது.

இது குறித்து சென்னையில் செய்தியாளர்கள் சந்திப்பில் பேசிய ஐஐடி மெட்ராஸ் இயக்குநர் வி காமகோடி, NIRF தரவரிசை உலகில் உள்ள பிற மதிப்பீட்டு முறைகளை விட சிறந்த மதிப்பீட்டு முறை என்று கூறினார்.

“இந்த மதிப்பீட்டு முறையில் அவுட்ரீச் எனப்படும் புறசமூகத்தை பங்குக்கொள்ள வைப்பது, மற்றும் அனைவரையும் உள்ளடக்கி இயங்குவது ஆகியவற்றுக்கு முக்கியத்துவம் அளிக்கப்படுகிறது.

ஐஐடி மெட்ராஸ்-ல் 30ஆயிரத்துக்கும் மேற்பட்ட மாணவர்கள் பி. எஸ். டேட்டா சையன்ஸ் (வேறு கல்லூரியில் படித்துக் கொண்டிருக்கும் போதே, ஆன்லைன் மூலம் இந்த படிப்பை தொடரலாம்) படிக்கிறார்கள். அதில் 5 ஆயிரத்துக்கும் மேற்பட்டவர்கள் வறுமைக் கோட்டுக்கு கீழ் இருப்பவர்கள், அவர்களின் கல்விக் கட்டணத்தை ஐஐடி ஏற்றுக் கொண்டுள்ளது. இது போன்ற முயற்சிகளுக்கு NIRF தரவரிசையில் மதிப்பெண்கள் (புள்ளிகள்) வழங்கப்படுகின்றன.” என்றார் காமகோடி.

மத்திய அரசு வெளியிட்டுள்ள தரவுகள் படி, இந்தியாவில் உள்ள 926 தலைசிறந்த கல்வி நிறுவனங்களில், அதிகபட்சமாக 165 நிறுவனங்கள் தமிழ்நாட்டில் உள்ளன என்று தமிழ்நாடு முதல்வர் மு க ஸ்டாலின் தனது எக்ஸ் பக்கத்தில் பதிவிட்டிருந்தார். ஒட்டுமொத்த தரவரிசையில் முதல் 100 இடங்களில் 18 கல்வி நிறுவனங்கள், முதல் 100 பல்கலைகழகங்களில் 22 பல்கலைகழகங்களும், முதல் 100 கலைக்கல்லூரிகளில் 37 கல்லூரிகளும் தமிழ்நாட்டில் உள்ளன என்று அவர் அந்த பதிவில் தெரிவித்திருந்தார்.

“NIRF தரவரிசைப்படி தலைசிறந்த உயர்கல்வி நிறுவனங்கள் அதிகமானவற்றை கொண்டுள்ள தமிழ்நாடு, பிற மாநிலங்களை விட முன்னிலையில் உள்ளது, தரமான கல்விக்கான அளவுகோலை நிர்ணயிக்கிறது” என அவர் பதிவிட்டுள்ளார்

பட மூலாதாரம்,X/@MKSTALIN

எனினும் ஐஐடி கல்வி நிறுவனங்களில் மாணவர் தற்கொலைகள், சாதி பாகுபாடுகள் என பல்வேறு குற்றச்சாட்டுகளும் விமர்சனங்களும் வைக்கப்பட்டு வருகின்றன.

இந்த விமர்சனங்களுக்கு பதிலளிக்கும் வகையில் செய்தியாளர் சந்திப்பில் பேசிய ஐஐடி மெட்ராஸ் இயக்குநர் காமகோடி, “கடந்த ஓராண்டில் நல்வாய்ப்பாக மாணவர் தற்கொலை ஏதும் நடைபெறவில்லை. மாணவர்கள் மன அழுத்தம் இல்லாமல் இருப்பதற்கான பல முயற்சிகள் எடுத்து வருகிறோம். எந்த பிரச்னையாக இருந்தாலும் எந்த மாணவரும் என்னை ஐந்து நிமிடங்களுக்குள் தொடர்புக் கொள்ளலாம். behappy.iitm.ac.in என்ற இணையதளத்தில் மாணவர்களுக்கு தேவையான விவரங்கள் உள்ளன, மன நல ஆலோசகருடன் மாணவர் விருப்பப்பட்டால் உடனே பேசலாம். பெற்றோர்களுக்கு குறுஞ்செய்தி அனுப்பி பிள்ளைகளுடன் வாரம் இருமுறையாவது பேசினார்களா என்று கேட்கிறோம். மாணவர்கள் பேசவில்லை என்று தெரிந்தால், அவர்களை அழைத்து பேசுகிறோம்.” என்றார்.

NIRF (National Institute of Ranking Framework )என்பது மத்திய அரசின் கல்வித் துறை கல்வி நிறுவனங்களுக்கு தேசிய அளவில் வழங்கும் வருடாந்திர மதிப்பீடு ஆகும். இந்த மதிப்பீடு மத்திய மனித வள மேம்பாட்டுத் துறையினால் 2015ம் ஆண்டு அறிமுகப்படுத்தப்பட்டது.

கற்றல், கற்பித்தல், ஆராய்ச்சி, அனைவரையும் உள்ளடக்குதல், என பல்வேறு அலகுகளின் கீழ் கல்வி நிறுவனங்களின் மதிப்பிடப்படுகின்றன.

ஆனால், கல்வி நிறுவனங்கள் தரும் தரவுகளை கொண்டுதான் மதிப்பீடு செய்யப்படுகிறது.

“கல்வி நிறுவனங்கள் கொடுக்கும் தரவுகள் சரி பார்க்கப்படும். வருடாந்திர கட்டணம் ரூ.10 லட்சம் கொண்ட கல்வி நிறுவனம், தங்களின் 80% மாணவர்கள் பொருளாதாரத்தில் நலிவடைந்தவர்கள் என்று கூறினால் அது முரண்பாடானது. இது போன்ற தரவுகளையும் பிற தரவுகளை NIRF சரி பார்க்கும்” என்ற விளக்கத்தையும் NIRF தனது அதிகாரபூர்வ இணையதளத்தில் தெரிவிக்கிறது.

அதிக மதிப்பெண்கள் கொண்ட ஆராய்ச்சி சம்பந்தப்பட்ட தரவுகள் இணையதளங்களிலிருந்து சரி பார்க்கப்படும் என்று NIRF கூறுகிறது.

முனைவர் பட்டப் படிப்புக்கான மாணவர்கள் உட்பட மாணவர்களின் எண்ணிக்கை, ஆசிரியர்- மாணவர் சதவீதம், முனைவர் பட்டம் அல்லது அதற்கு ஈடான கல்வித் தகுதி மற்றும் அனுபவம் கொண்ட ஆசிரியர்களின் எண்ணிக்கை, நிதி ஆதாரங்கள் மற்றும் அவற்றை செலவு செய்யும் விதம், வெளியாகியுள்ள ஆய்வுக் கட்டுரைகளின் எண்ணிக்கை மற்றும் அவற்றின் தரம், காப்புரிமைகள், பல்கலைகழகத் தேர்வுகளில் தேர்ச்சிப் பெறுபவர்களின் எண்ணிக்கை, பிற மாநிலங்கள் மற்றும் நாடுகளிலிருந்து படிக்கும் மாணவர்களின் சதவீதம் மாணவிகளின் சதவீதம், சமூக பொருளாதாரத்தில் நலிவடைந்த மாணவர்கள், மாற்று திறனாளி மாணவர்களுக்கான வசதிகள், கல்வியாளர்கள் மற்றும் வேலை நிறுவனங்களின் முன்னுரிமைகள் ஆகியவற்றின் அடிப்படையில் கல்வி நிறுவனங்களின் ஒட்டுமொத்த தரவரிசை வழங்கப்படுகிறது.

பட மூலாதாரம்,FACEBOOK

இந்தியாவில் உள்ள 23 ஐஐடிகளில், ஐஐடி மெட்ராஸில் மட்டுமே விளையாட்டு வீரர்களுக்கான ஒதுக்கீடு அறிமுகப்படுத்தப்பட்டுள்ளது. இதை குறிப்பிட்டு மத்திய கல்வி அமைச்சர் பாராட்டியதாக ஐஐடி மெட்ராஸ் இயக்குநர் காமகோடி தெரிவித்திருந்தார்.

“ஐஐடி மெட்ராஸில் 32 இடங்கள் விளையாட்டில் சிறந்து விளங்குபவர்களுக்காக உள்ளன. இதில் தற்போது ஐந்து தேசிய விளையாட்டு வீரர்கள் படித்து வருகின்றனர். தேசிய அளவில் விளையாடினால் ஐஐடியில் படிக்கலாம் என்ற உந்துதல் பிள்ளைகளுக்கு கிடைக்கும்” என்றார்.

ஐஐடி மெட்ராஸ் பொறியியல் படிப்பதற்காக மட்டுமே என்ற நிலையை மாற்றி அனைவருக்குமானதாக உருவாக்க பல்வேறு முயற்சிகளை எடுத்து வருவதாக இயக்குநர் காமகோடி சுட்டிக்காட்டினார்.

“கணக்கு, அனைத்து அறிவியல் படிப்புகளுக்கும் அடிப்படையானது. பள்ளிகளில் கணக்கு டீச்சர் தேர்ந்தவராக இருப்பது அவசியமாகும். டாடா இன்ஸ்டிடியூட் ஆஃப் சோஷியல் சையன்சஸ் உடன் இணைந்து, பி எஸ் சி கணிதவியலுடன் சேர்ந்த பி எட் ஆசிரியர் படிப்பை அறிமுகப்படுத்தவுள்ளோம். ஓராண்டுக்கு 500 நல்ல கணக்கு ஆசிரியர்களை உருவாக்க வேண்டும் என்பது இலக்காகும்.

என் ஐ டி (NIT-National Institute of Technology)-யில் ஒவ்வொரு பாடப்பிரிவிலிருந்தும் 10% மாணவர்கள், தங்கள் நான்கு வருட படிப்புக் காலத்தில் ஒரு வருடம் ஐஐடி மெட்ராஸ்-ல் படிக்கலாம். இங்கு நல்ல மதிப்பெண்கள் பெற்றால், பிஎச்டி சேர்க்கைக்கு முன்னுரிமை வழங்குகிறோம்.

தமிழ்நாட்டில் ஒரு லட்சம் அரசுப் பள்ளி மாணவர்களுக்கு எல்க்ட்ரானிக்ஸ் குறித்த அடிப்படை பயிற்சி வழங்குகிறோம். பிற கல்வி நிறுவனங்களுக்கு நிர்வாக ரீதியாக பயிற்சிப் பட்டறைகள் வழங்குகிறோம்.” என்றார்.

கல்வி நிறுவனங்கள் அளிக்கும் தரவுகளின் அடிப்படையில்தான் மதிப்பீடு செய்யப்படுகிறது என்றும் இந்த தரவரிசைப் பட்டியலுக்கான மதிப்பெண்கள் வழங்கும் முறை வெளிப்படையானதாக இல்லை என்றும் சென்னையில் உள்ள கல்வி ஆலோசகர் நெடுஞ்செழியன் குற்றம் சாட்டுகிறார்.

“ஐஐடி மெட்ராஸ் மூன்றரை லட்சம் வரை கட்டணம் பெற்றுதான் டேட்டா சையன்ஸ் படிப்பை நடத்துகிறது. பிட்ஸ் பிலானியை விட பல தனியார் கல்லூரிகள் இந்த பட்டியலில் முன்னிலையில் உள்ளன, இது எப்படி உலக அளவில் ஏற்றுக் கொள்ளப்படும்? இதன் மூலம் தனியார் கல்வி நிறுவனங்கள் தங்கள் கட்டணத்தை உயர்த்திக் கொள்ள முடியும்.” என்றார் அவர்

https://www.bbc.com/tamil/articles/c3rdw5d99plo