ஆனையிறவு உப்பளம் தொழிற்சாலை இன்று கையளிப்பு

March 29, 2025 12:14 pm

நவீன உபகரணங்கள் மற்றும் வசதிகளுடன் கூடிய ஆனையிறவு உப்பளம் தொழிற்சாலை இன்று சனிக்கிழமை மக்கள் உரிமைக்கு கையளிக்கப்படவுள்ளது.

எதிர்வரும் காலங்களில், அரச இலட்சினையில்  இங்கு உற்பத்தியாகும் உப்பு சந்தைக்கு விநியோகிக்கப்படுமன கைத்தொழில் மற்றும் தொழில் முயற்சியாண்மை அபிவிருத்தியமைச்சு தெரிவித்துள்ளது.

இதற்கமைய ஆனையிறவு உப்பளம் தொழிற்சாலை ஊடாக கூடுதல் நிவாரண விலையில் ‘ரஜ லுணு’ என்ற வர்த்தக நாமத்தில் உப்பு சந்தைக்கு விநியோகிக்கப்படவுள்ளமை குறிப்பிடத்தக்கது.

https://oruvan.com/elephant-pass-salt-factory-to-be-handed-over-today/

29 MAR, 2025 | 09:08 AM

பொலிஸாரின் அடாவடித்தனங்களுக்கு எதிராக நடவடிக்கை எடுப்பதாக நாடாளுமன்ற உறுப்பினர் சிறீ பவானந்தராஜா தெரிவித்துள்ளார்.

வெள்ளிக்கிழமை (28) நடைபெற்ற சங்கானை பிரதேச அபிவிருத்தி ஒருங்கிணைப்பு குழு கூட்டத்தின் பின் ஊடகவியலாளர் ஒருவர் "அண்மைக் காலமாக பொலிஸாரின் அடாவடிகள் அதிகரித்துள்ளன. கடந்த சில தினங்களுக்கு முன்னர் கூட பொலிஸார் நெல்லியடியில் ஒரு வீட்டுக்குள் சென்று அடாவடியில் ஈடுபடுகின்ற காணொளி வெளியாகி இருந்தது. இதற்கு நீங்கள் என்ன நடவடிக்கை எடுக்கின்றீர்கள்" என கேள்வி எழுப்பியவேளை அவர் இவ்வாறு பதிலளித்தார்.

நாடாளுமன்ற உறுப்பினர் சிறீ பவானந்தராஜா மேலும் தெரிவிக்கையில்,

பொலிஸாருக்கு போதிய அறிவுறுத்தல்கள் வழங்கப்பட்டுள்ளன. இருந்தாலும் பொலிஸார் சில இடங்களில் தாங்கள் நினைத்தபடிதான் நடக்கின்றனர். அவர்களது செயற்பாடுகள் பிழையாக இருந்தால் அந்த பொலிஸாருக்கு எதிராக சட்ட நடவடிக்கை எடுப்போம் என்றார்.

https://www.virakesari.lk/article/210500

Published By: DIGITAL DESK 3 28 MAR, 2025 | 03:27 PM

(எம்.மனோசித்ரா)

இலங்கைக்கு உத்தியோகபூர்வ விஜயம் மேற்கொள்ளவுள்ள இந்திய பிரதமர் நரேந்திர மோடி, ஜனாதிபதி அநுரகுமார திஸாநாயக்கவின் இந்திய விஜயத்தின் போது இணக்கப்பாடு எட்டப்பட்ட ஒத்துழைப்பு மேம்பாட்டு திட்டங்கள் குறித்து மீளாய்வு செய்யவுள்ளார். ஜனாதிபதி அநுரகுமார திஸாநாயக்கவின் அழைப்பை ஏற்று ஏப்ரல் 4 - 6 வரை பிரதமர் மோடி இலங்கை வரவுள்ளதாக இந்திய வெளிவிவகார அமைச்சு உத்தியோகபூர்வமாக அறிவித்துள்ளது.

பிரதமர் நரேந்திர மோடி அநுராதபுரத்திற்குச் சென்று புனித ஸ்ரீமகா போதியில் மத வழிபாடுகளில் ஈடுபடவுள்ளார். அதேவேளை இந்திய அரசின் நிதி உதவியுடன் இலங்கையில் செயல்படுத்தப்படவுள்ள பல திட்டங்களையும் பிரதமர் மோடி ஆரம்பித்து வைக்கவுள்ளார். குறிப்பாக இந்தப் பயணத்தின் போது இரு நாடுகளுக்கும் இடையே கையெழுத்தான பல புரிந்துணர்வு ஒப்பந்தங்களும் பரிமாறிக்கொள்ளப்படும் என்று எதிர்பார்க்கப்படுகிறது.

ஜனாதிபதி அநுரகுமார திஸாநாயக்க மற்றும் பிரதமர் ஹரிணி அமரசூரிய மாத்திரமின்றி, முன்னாள் ஜனாதிபதி ரணில் விக்கிரமசிங்க, முன்னாள் ஜனாதிபதி மஹிந்த ராஜபக்ஷ, எதிர்க்கட்சி தலைவர் சஜித் பிரேமதாச, தமிழ் தேசிய கூட்டமைப்பு மற்றும் தமிழ் முற்போக்கு கூட்டணியின் பிரதிநிதிகளையும் பிரதமர் மோடி சந்தித்து கலந்துரையாடவுள்ளார்.

ஜனாதிபதி அநுரகுமார திஸாநாயக்கவின் இந்திய விஜயத்தின் போது ஏற்றுக் கொள்ளப்பட்ட 'பகிரப்பட்ட எதிர்காலத்துக்கான கூட்டாண்மைகளை வளர்ப்பதற்கான' கூட்டுத் தொலைநோக்குப் பார்வையில் ஒப்புக் கொள்ளப்பட்ட ஒத்துழைப்புத் துறைகளில் ஏற்பட்டுள்ள முன்னேற்றங்களை பிரதமர் மோடி ஆய்வு செய்யவுள்ளமை விசேட அம்சமாகும்.

பிரதமர் நரேந்திர மோடி இறுதியாக 2019ஆம் ஆண்டு இலங்கைக்கு விஜயம் செய்திருந்தார். இந்தியாவும் இலங்கையும் வலுவான கலாச்சார மற்றும் வரலாற்று இணைப்புகளுடன் நாகரிக பிணைப்புகளைப் பகிர்ந்து கொள்கின்றன. அந்த வகையில் இந்த விஜயம் இரு நாடுகளுக்கும் இடையிலான வழக்கமான உயர் மட்ட ஈடுபாடுகளின் ஒரு பகுதியாகவும், மேலும் இந்தியாவுக்கும் இலங்கைக்கும் இடையிலான பன்முக கூட்டாண்மையை ஆழப்படுத்துவதில் மேலும் உத்வேகத்தை அளிக்கும் என அந்நாட்டு வெளிவிவகார அமைச்சு தெரிவித்துள்ளது.

பிரதமர் மோடியின் தாய்லாந்து மற்றும் இலங்கை பயணம் மற்றும் 6ஆவது பிம்ஸ்டெக் உச்சி மாநாட்டில் அவர் பங்கேற்பது, 'அண்டை நாடுகளுக்கு முன்னுரிமை' கொள்கை, 'கிழக்கு நோக்கி செயல்படுங்கள்' கொள்கை, 'மகாசாகர்' (பிராந்தியங்கள் முழுவதும் பாதுகாப்பு மற்றும் வளர்ச்சிக்கான பரஸ்பர மற்றும் முழுமையான முன்னேற்றம்) தொலைநோக்குப் பார்வை மற்றும் இந்தோ-பசுபிக் தொலைநோக்குப் பார்வை ஆகியவற்றில் இந்தியாவின் உறுதிப்பாட்டை மீண்டும் உறுதிப்படுத்தும் என வெளிவிவகார அமைச்சு மேலும் தெரிவித்துள்ளது.

https://www.virakesari.lk/article/210434

Columnsஜெகன் அருளையா

ஜெகன் அருளையா

திரு.ஞானேந்திரன் யாழ்ப்பாணத்தின் மானிப்பாய்க்கு அருகேயுள்ள நவாலியைச் சேர்ந்தவர். ஒரு கிறிஸ்தவ குடும்பத்தில் 1975 இல் பிறந்த அவர் மூன்றாம் வகுப்பு முதல் க.பொ.த. உயர்தரம் வரை செய்ண்ட் பட்றிக்ஸ் கல்லூரியில் படித்தார். யாழ்ப்பாணத்தின் முன்னணி பாடசாலைகளில் ஒன்றான இக்கல்லூரி யாழ் கோட்டையிலிருந்து சிறிது தூரத்தில் தான் இருக்கிறது. இனப்போர் உக்கிரமாக இருந்த காலத்தில் ஞானேந்திரன் பிலிப்பைன்ஸில் இருந்த அவரது தந்தையின் சகோதரருடன் வசிப்பதற்காகச் சென்றுவிட்டார். இங்கு தகவல் தொழில்நுட்பத்தில் ஒரு பட்டத்தைப் பெற்றுக்கொண்டு அவர் 2002 இல் தாயகம் திரும்பினார். போரிலிருந்து தப்பிக்கவும், புதிய சந்தர்ப்பங்களைத் தேடியும் பெரும்பாலான இளையோர் வெளிநாடுகளுக்குச் சென்றுகொண்டிருந்த காலமது. இப்போது போர் முடிந்து விட்டது ஆனாலும் புதிய சந்தர்ப்பங்களைத் தேடி மத்திய கிழக்கு பாலைவனங்களையும், உடல் விறைக்கும் ரொறோண்டோவையும், மாசடைந்த காற்றைச் சுவாசிக்கவென லண்டனை நோக்கியும் இளையோர் இன்னும் படையெடுத்துக்கொண்டுதான் இருக்கிறார்கள். ஞானேந்திரனுக்கோ இலங்கை இன்னும் ஒரு சந்தர்ப்ப பூமியாகவே விளங்குகிறது. அவர் ஒரு வியாபாரிகள் குடும்பத்திலிருந்து வந்தவரல்ல; முதலீடு செய்வதற்கான பணமும் அவரிடம் இருந்திருக்கவில்லை. எனவே அவருக்கு இருந்த ஒரே வழி வேறு நிறுவனங்களில் பணியாற்ற இணைந்து கொள்வதே. முதலில் அவர் இணைந்தது வியாபார சாதனங்களைச் சந்தைப்படுத்தும் ‘சிலோன் பிஸினெஸ் அப்பிளையன்ஸெஸ்’ (Ceylon Business Appliances (CBA)) என்ற நிறுவனத்தில். அதைத் தொடர்ந்து ஒரு பயண நிறுவனத்தில் மூன்று வருடங்கள் பணியாற்றினார்.

முதல் வியாபார முயற்சிக்கான ஞானேந்திரனின் அதிரடிப் பிரவேசம் சொந்தமானதொரு பயண நிறுவனம். கொழும்பு, வத்தளையில் நிறுவப்பட்ட இந்நிறுவனத்திற்குப் பெயர் ‘ஸ்கைவே இண்டர்நாஷனல்’ (Skyway International). துரதிர்ஷஷ்டவசமாக இணையவழி மூலம் விமானப் பயணச்சீட்டுகளை வாங்கும் பழக்கம் இக்காலகட்டத்தில் தான் ஆரம்பமாகியிருந்தது. பயணச் சீட்டுகளை விற்று வருமானம் சம்பாதிக்கும் உலகின் பல பயண முகவர்களது வயிற்றிலடிக்கவென வந்த இத் தொழில்நுட்பம் ஞானேந்திரனையும் இத் தொழிலிலிருந்து துரத்தி விட்டது. 2014 இல் ஞானேந்திரன் ஒரு முன்னணி கட்டுமான நிறுவனத்தில் இணைந்தார். விற்பனை நிர்வாகியாக இங்கு ஒரு வருடம் கடமையாற்றிய காலத்தில் இன்னுமொரு சந்தர்ப்பம் அவரைத் தேடி வந்தது. அதை அவர் இறுகப்பிடித்துக்கொண்டார்.

த் தோழன் ஒருவர் லண்டன் நகரின் அழகிய தேவாலயங்களில் ஒன்றான செயிண்ட் போல்ஸ் தேவாலயத்துக்கு அருகே ஒரு யப்பானிய உணவகம் ஒன்றை நடத்தி வந்தார். லண்டன் நகர மையத்தில் சட்ட, வியாபார, சுற்றுலாத் துறைகள் சங்கமிக்கும் சதுக்கத்தில் இருந்தது இந்த உணவகம். சிறந்த செலவாளிகள் எனப்படும் பணம் படைத்தோர் உலாவும் இடம் இது. யப்பானியரின் சிறந்த தெரிவாக இருப்பது கடலுணவு. ஞானேந்திரனும் அவரது சகாவும் லண்டன் வாழ் மேற்தட்டு வாசிகளின் சுவையறிந்து அவர்களுக்கு ‘யாழ்ப்பாணக் கடலுணவைத்’ தயாரித்து விருந்தோம்பினார்கள்.

விளைவு யாழ்ப்பாணத்து குருநகர் மீன்பிடித் துறமுகத்தை ஆரம்பமாகவும் லண்டன் உணவகத்தை முடிவாகவும் கொண்ட உணவுச் சங்கிலியைப் பாதையாகக்கொண்டு ஞானேந்திரனின் ஏற்றுமதி வர்த்தகம் கருக்கொண்டமை. இருப்பினும் அதற்குத் தேவையான ஆரம்ப முதலீடு அவரிடம் இருக்கவில்லை. இதை நிவர்த்திக்க வழமையாக யாழ்ப்பாணத்தார் எதைச் செய்வார்களோ அதையே தான் ஞானேந்திரனும் செய்தார். மனைவியின் தங்க நகைகள் அடைவுகடைகளில் முடங்கிக்கொண்டன. எனது சில வருட கால யாழ்ப்பாண வாழ்வில் நகை அடகு பற்றி நான் கற்றுக்கொண்டது அதிகம். பணவீக்கத்தால் பாதிக்கப்படாத, தனது பெறுமதியை எப்போதும் தக்கவைத்துக்கொள்ளக்கூடிய ஒரு பண்டம் தங்கம். அவ்வப்போது பணமுடை ஏற்படுவதிலிருந்து தப்புதல் முதல், முட்டை, அரிசித் தட்டுப்பாட்டைச் சமாளிப்பது வரை, சிதைந்துபோன கூரையைச் செப்பனிடுவது முதல் வியாபார முதலீடுகள் வரை யாழ்ப்பாணத்தாருக்குக் கைகொடுத்து வருவது இந்த நகை அடகு சமாச்சாரம்.

முதலீட்டுக்குப் பணம் கிடைத்தமை மட்டும் ஞானேந்திரனுக்குப் போதுமானதாக இருக்கவில்லை; இவ்வியாபாரம் பற்றிய அறிவும் அவருக்குத் தேவையாகவிருந்தது. உலகமெங்கணும் வணிகர்கள் தேடுவது ஏமாறக்கூடிய வாடிக்கையாளரையே. ஒருவரது அறியாமை இன்னொருவரின் சட்டரீதியாகப் பணம் பண்ணும் சந்தர்ப்பம். தமிழ் பேச முடியாமையினால் யாழ்ப்பாணத்து வணிகர்களால் நான் பலதடவைகள் ஏமாற்றப்பட்டிருக்கிறேன். கடந்த பத்து வருடங்களாக நான் யாழ்ப்பாணத்தில் வசித்து வந்தாலும் என்னிடமிருந்து கொஞ்சம் கூடுதலாகவே கறந்துகொள்ளும் சாதுரியத்தை வணிகர்கள் பழகிக்கொண்டுவிட்டார்கள்.

ஞானேந்திரன் சுமார் ஆறு மாதங்களாக, காலை வேளைகளில், 5 மணி முதல் 9 மணி வரை, குருநகர் மீன்பிடித் துறைமுகத்தில் உட்கார்ந்திருப்பார். படகுகள் கரையேறுவதையும் மீன் சந்தை பேரம் பேசுதல் கலகலப்படைவதையும் அவதானிப்பார். வலைஞர்களும் வணிகர்களும் சங்கமிக்கும் இம் மீனுலகத்தில் பணத்தைக் கைமாற்றும் அற்புத வித்தையை அவர் அங்குதான் கற்றுக்கொண்டார். புதிதாகச் சிக்கிய மீனுக்கும் இதர கடலுயிரினங்களுக்குமிடையேயான வித்தியாசங்களை அவர் புரிந்து கொண்டார். வெறுமையான படகுகளும் நிரம்பிய படகுகளும் கரைசேரும் நாட்களில் கால நிலை, பருவக்காற்று விலை என ஏற்ற இறக்கத்தைத் தீர்மானிக்கும் வித்தைகள் இப்போது அவருக்கு அத்துபடியாகியது. கடலுயிரினங்களின் கண்களைப் பிதுக்கிப்பார்த்து அவற்றின் நிறங்கள், உடல் மென்மையைக் கொண்டு அவற்றின் தராதரத்தைப் பிரித்துப்பார்க்க அவர் கற்றுக்கொண்டுவிட்டார். லண்டன் செயிண்ட் போல்ஸ் உணவக விருந்தினரது நாவுக்குச் சுவையளிக்கவல்ல சிறந்த கடலுணவைத் தரம்பிரித்தறிய அவரால் இப்போது முடிந்தது.

மீன் இப்போது வான் வழியாக ஏற்றுமதி செய்யப்படவேண்டும். ஒரு தொன் எடைக்குக் குறையாமல் ஏற்றுமதி செய்தால் மட்டுமே கட்டுப்படியாகும் என்ற நிலை. ஆனால் லண்டனின் பிரத்தியேக உணவகத்திற்க்கு இது தேவைக்கதிகமானது. இதனால் லண்டனில் வாழும் தரகர் ஒருவருடன் ஞானேந்திரன் அறிமுகப்படுத்தப்பட்டார். இத்தரகர் பெரும் தொகையான கடலுணவை இறக்குமதி செய்து லண்டனிலுள்ள சிறிய கடைகளுக்கு விநியோகம் செய்பவர். சிறிது காலத்தில் இந்த வியாபார உறவு கசப்பாகி முறிவில் முடிந்தது. ஆனால் இவ்வுறவின் போது ஞானேந்திரன் இன்னுமொரு வாடிக்கையாளரைச் சந்தித்தார். பிரித்தானியாவில் 4 கடைகளுக்குச் சொந்தக்காரரான ஒரு இந்தியரே அவர். 2017 இல் ஆரம்பித்த இந்த வணிக உறவு இப்போதுவரை தொடர்கிறது. வளர்ச்சியடைந்த ஞானேந்திரனின் வணிகம் மேலும் பல ஏற்றுமதி வணிகர்களுடன் உறவை ஏற்படுத்திக் கொடுத்தது.

கடலுணவு வியாபாரம் காத்திரமான இலாபத்தை ஈட்டிக்கொடுக்கவும் ஞானேந்திரனது பார்வை கடலட்டைப் பண்ணை மீது தாவியது. இது ஞானேந்திரனுக்கு முற்றிலும் புதிய சமாச்சாரமல்ல. 1970 களில் அவரது தாத்தா உள்ளூர் மீனவர்கள் மற்றும் சுழியோடிகளிடமிருந்து கடலட்டைகளை வாங்கி உலரவைத்து சிங்கப்பூருக்கு ஏற்றுமதி செய்தவர். சிறு வயதுகளில் ஞானேந்திரனும் அவரது நண்பர்களும் உலர்ந்த கடலட்டைகளால் ஒருவருக்கொருவர் எறிந்து விளையாடுவது வழக்கம். இக்கடலட்டைகள் பண்ணைகளில் வளர்க்கப்பட்டவையல்ல. யாழ்ப்பாணத்தைச் சுற்றியுள்ள ஏறிகளிலும் குளங்களிலும் இவை சாதாரணமாகக் கிடைக்கின்றன.

யாழ்ப்பாணத்தின் கடற்கரையோரமாக இருக்கும் தீவுகளில் ஒன்றான லைடன் தீவிலிருக்கும் அல்லைப்பிட்டி கிராமத்தில் ஒரு கடலட்டை பண்ணை இருக்கிறது. தனது கடலட்டை வியாபாரத்தைப் பரீட்சித்துப் பார்க்க ஞானேந்திரன் இப்பண்ணையை வாங்கிக்கொண்டார். இரண்டு வருடங்களாக அதை நடத்தி ஓரளவு இலாபத்தையும் ஈட்டிக்கொண்டார். இதன் மூலம் வியாபார நுணுக்கத்தைக் கற்றுக்கொண்டபின் அவர் முற்றிலும் புதியதொரு பண்ணையை உருவாக்கத் தீர்மானித்தார். இதன் விளைவாக யாழ்ப்பாணத்திற்கும் மண்டைதீவிற்குமிடையில் இருக்கும் ஒரு சிறிய தீவான சிறித்தீவு இவரது கண்ணில் சிக்கிக்கொண்டது.

இரண்டு வருட பிரயத்தனத்தனத்தைத் தொடர்ந்து 2019 இல் ஞானேந்திரனுக்கு இக்கடற் பண்ணைக்கான அனுமதி கிடைத்தது. இதனால் சுற்றுச்சூழல் பாதிப்புகள் ஏற்படுமென எதிர்ப்புகளும் கிளம்பின. கடலிலோ அல்லது கரைப்பகுதிகளிலோ நிறுவப்படும் எந்தப் பண்ணையும் ஏன், வீட்டு நிர்மாணம் முதற்கொண்டு அனைத்து தொழிற்சாலைகளுமே சூழல் பாதிப்புக்குக் காரணமாகின்றன. இச்சூழல் பாதிப்பு பொருளாதார இலாபத்தை மீறிவிடுகிறதா என்பதே இங்குள்ள கேள்வி. கடற் பண்ணைகளுக்காக எடுக்கப்படும் இடங்கள் குறிப்பாக சூழல் பாதிப்பை ஏற்படுத்துகின்றனவா அல்லது இவ்விடங்கள் அப்பிரதேசத்தின் சூழல் சமநிலையைப் பேணுகின்றனவா? வலைகள் நீர்மட்டத்தில் இருக்கத் தேவையில்லை காரணம் கடலட்டைகள் கடலினடியில் வாழ்பவை. இதனால் மீன்கள் வலைகளுக்குள் சிக்காமல் இலகுவாகத் தப்பிச் செல்ல முடியும். சூழலை மாசுமடுத்தும் உணவுகள் பண்ணையில் சேர்க்கப்படுவதில்லை காரணம் தேவையான போஷாக்கை அட்டைகள் கடல் மண்ணிலிருந்தே எடுத்துக்கொள்கின்றன என்கிறார் ஞானேந்திரன். கடலட்டை வியாபாரம் பற்றி அரசாங்க அதிகாரிகளே அப்போது அறிந்திராத காலம். யாழ்ப்பாணத்தில் அப்போதுதான் இத்தொழில் பிரபலமாகிக்கொண்டிருந்தது.

இரண்டு வருடங்கள் இழுபறியின் பின்னர் 2021 இல் தான் ஞானேந்திரனுக்கு அனுமதி கிடைத்தது. சிறித்தீவுக்கு அருகில் சுமார் 20 ஏக்கர் கடல் நிலத்தில் ஞானேந்திரன் தனது பண்ணையை ஆரம்பித்தார். திருடர்களைக் கண்காணிக்க காவற் கோபுரம் நிர்மாணித்தல், வலைகளை நிறுவுதல், பணியாளர்களுக்கு பயிற்சியளித்தல், அட்டைகளைப் பதனிடுவதற்கேற்ற சூரிய வெளிச்சமுள்ள கட்டிடமொன்றை நிறுவுதல் என அனைத்துப் பணிகளும் துரிதமாக நிறைவேற்றப்பட்டன. இந்த வருடம், 2025 இல், இப்பண்ணையில் மூன்றாவது அறுவடை நடைபெறுகிறது. இப்போது பல பண்ணைகளுக்கான அனுமதிப்பத்திரங்கள் விநியோகிக்கப்பட்டு விட்டன. கடற்கரை எங்கும் திட்டு திட்டாக இப்போது அட்டைப் பண்ணைகளால் நிரம்பியிருக்கிறது. சிலவேளைகளில் இவை மித மிச்சமாகவோ இல்லாமலோ இருக்கலாம். அதைத் தீர்மானிக்கும் தகுதி எனக்கில்லை.

கோவிட் தொற்றுக் காலத்திலும் இப்பண்ணை தொடர்ச்சியாக இயங்கியது. உற்பத்திகளையும் பணியாளர்களையும் இடத்துக்கிடம் நகர்த்துவதற்கான அனுமதியும் பெறப்பட்டது. கோவிட் தொற்றுக் காலத்தில் இப்பண்ணை 35 பேருக்கு வாழ்வாதாரத்தை அளித்தது. யாழ்ப்பாணத்திற்கும், வட மாகாணத்திற்கும் ஏன் முழு இலங்கைக்குமே இத்துறை வருமானமீட்டிக் கொடுக்கிறது என்பதில் சந்தேகமேயில்லை. இக்கடலட்டைகளைப் பதனிட்டு ஏற்றுமதிப் பண்டமாக்கும் தொழில் பெரும்பாலும் வடக்கிற்கு வெளியே நடைபெறுவதால் இத்தொழில் சார்ந்த உபதொழில்களுக்கான சந்தர்ப்பத்தை வடக்கு இழக்கிறது என்பது உண்மை. உலரவைக்கப்பட்ட கடலட்டைகளின் பெறுமதி பசுமையான அட்டைகளைவிடப் பன்மடங்கு அதிகம்.

அனுமதிப் பத்திரம் கிடைத்ததிலிருந்து 20 ஏக்கர் கடல் நிலத்தில் ஒரு பண்ணையை, ஆரம்பம் முதல் இயங்குநிலைவரை கொண்டுவருவதற்கு சுமார் ரூ.20 மில்லியன் (2024 ஆண்டு விலை) செலவாகிறது என்கிறார் ஞானேந்திரன். கடந்த சில வருடங்களில் யாழ் குடாநாட்டின் கரையோரப் பகுதிகளில் ஏகப்பட்ட அட்டைப்பண்ணைகள் முளைத்திருக்கின்றன. ஆனால் இவற்றில் வெகு சிலவே இவ்வட்டைகளைப் பதனிடும் வேலைகளைச் செய்கின்றன. பெரும்பாலானவை தமது அட்டைகளைப் பதனிடாமலேயே மிகவும் குறைந்த விலைக்கு வெளியாருக்கு விற்றுவிடுகின்றனர். ஞானேந்திரன் தனது சொந்தமான பதனிடும் தொழிற்சாலையை நிர்மாணித்து வருடமொன்றுக்கு 800 கி.கி. உலரட்டைகளைத் தயாரிக்கிறார். இதைத் தயாரிக்க சுமார் 25,000 கி.கி. பசும் அட்டைகள் தேவையாகவிருக்கின்றது.

கடலட்டை விலைகள் எப்போதும் நிலையாக இருப்பதில்லை. நாணய மாற்று வீதம் மற்றும் சீனாவுக்கு ஏற்றுமதி செய்வதற்கான (சீனாவே பிரதான நுகர்வோராகவும் விநியோகிஸ்தராகவும் இருக்கிறது) பாதைகள் ஆகியவற்றைப் பொறுத்து விலையின் ஏற்ற இறக்கம் தீர்மானமாகிறது. ஏற்றுமதிக்கான அனுமதிப்பத்திரங்களைப் பெறுவதில் ஊழல் கோலோச்சுகிறது. இதர பல தொழில் துறைகளைப் போலவே இத்துறையின் நன்மைகளையோ அல்லது சமூகத்தின், நாட்டின் நன்மைகளையோ விட சுய இலாபம் தேடும் மாஃபியாக்களினதும் ஊழல் பெருச்சாளிகளினதும் நன்மைகளே முதன்மைப்படுத்தப்படுகின்றன. ஏற்றுமதிக்கான அனுமதிப் பத்திரங்கள் வழங்கப்படுவதை இம் மாஃபியாக்கள் தடுத்து நிறுத்துவதன் மூலம் அனைத்து பண்ணைக்காரரும் உற்பத்திகளைத் தமக்கே விற்கவேண்டுமென நிர்ப்பந்திக்கிறார்கள். இதன் மூலம் கடலட்டை ஏற்றுமதி வாணிபம் முழுவதையும் தமது கட்டுப்பாட்டிற்குள் இம் மாஃபியாக்கள் வைத்திருக்கின்றன. இதற்குள் சீன நிறுவனங்களும் தமது குறுக்கு வழிகளைப் பிரயோகித்து விலை நிர்ணயத்தை தீர்மானிக்கின்றன. நேரடியாகச் சீனாவுக்கு ஏற்றுமதி செய்யாமல் ஹொங் கொங்கினூடாகப் பண்டங்களைக் கடத்துவதால் சீன அரசின் கெடுபிடிகளுக்குள்ளாகி இதனால் அட்டையின் விலை குறைக்கப்படுகிறது.

கடலட்டைகளில் யாழ்ப்பாணத்தின் உற்பத்திகளுக்கு மவுசு அதிகமாகவிருக்கிறது. இங்குள்ள மாசற்ற கடல் நீரும் அதன் போஷாக்கு வளங்களும் இவ்வட்டைகளின் தரத்தைப் பேணுகின்றன. செயற்கை உணவுகளின்றி வளர்க்கப்படும் இவ்வட்டைகள் முற்றிலும் இயற்கையானவை. இதனால் உற்பத்திச் செலவுகளும் குறைவாகவிருக்கிறது. 90% மான உற்பத்திச் செலவு கோபுரமமைத்தல், காவலர் சம்பளம், மின்சார வெளிச்சம் போன்ற பாதுகாப்பு செலவுகளுக்கே போகிறது என்கிறார் ஞானேந்திரன்.

பெரும்பாலான திருடர்கள் யாரென்பது தெரிந்த விடயம் தான். இவர்களில் சிலர் போதை வஸ்து பாவனையாளர். போதை இவர்களுக்கு அதிக நீச்சல் பலத்தைக் கொடுக்கிறது. திருடப்பட்ட கடலட்டைகளை இவர்கள் அரை விலைக்கு விற்கிறார்கள். இவற்றை வாங்குபவர்கள் மேலும் சந்தை விலைகளைச் சரியவைத்துவிடுகிறார்கள். திருடர்களைப் பிடித்து பொலிஸில் கையளித்தால் இவர்களது குற்றம் வன்முறை சாராமையால் அவர்கள் மீது தம்மால் நடவடிக்கை எடுக்கமுடியாது எனப் பொலிசார் கைகளை விரித்து விடுகிறார்கள். பிணையில் விடுவிக்கப்பட்ட திருடர்கள் மீண்டும் திருட்டில் ஈடுபடுகிறார்கள். காவற் கோபுரத்திற்கு மின்சார வழங்கிகளை தருபவர்களுக்கும், டீசல் போன்ற எரிபொருள் வழங்குபவர்களுக்குமே இலாபம் அதிகரிக்கிறது.

சந்தர்ப்பம்

கடலுணவு மற்றும் கடலட்டை உற்பத்திக்கு வடக்கில் நிறைய வாய்ப்புகள் இருக்கின்றன. இலாப நோக்கைக் கொண்ட முதலீட்டாளர்களுக்கும், வியாபார முகவர்களுக்கும், தரமான உற்பத்திகளைக் கொள்முதல் செய்ய விரும்புபவர்களுக்கும் வடக்கு அரிய வாய்ப்புகளை அளிக்கிறது. இத்தொழில் பற்றிய பூரண அறிவை வளர்த்துக்கொண்ட முகவர்களும் அவர்களது திறமைகளில் நம்பிக்கை வைக்கக்கூடிய முதலீட்டாளர்களும் இணையும்போது தான் இத்தொழிலுக்கான உண்மையான வெகுமதி கிடைக்கும். இத்தரமான யாழ்ப்பாண உணவை உலகின் தரமான உணவகங்களில் பரிமாறுவதற்கு ஏதுவாக இருக்கும் உணவகங்களுக்கும், அங்காடிகளுக்கும்கூட இது ஒரு வகையில் வெகுமதியாகவே அமையும்.

ஆசிய அபிவிருத்தி வங்கியின் ஆய்வின்படி இலங்கையின் 40% மான கடற்கரை வடமாகாணத்தில்தான் இருக்கிறது. மீன்பிடி, சுற்றுலா, விளையாட்டு எனப் பல சந்தர்ப்பங்களை வழங்கக் காத்திருக்கும் பாவிக்கப்படாத வளங்கள் இங்குதான் இருக்கின்றன. இலங்கையின் மிக வறுமையான மாகாணங்களில் ஒன்றான வடக்கில் தான் இவ்வாய்ப்பு இருக்கிறது என்பது அதிசயமானதே.

ஞானேந்திரனுடனான தொடர்புகளுக்கு:
Mobile and WhatsApp: +94 77 293 7949
Email: Victoria.aquapvt@gmail.com

ஞானேந்திரனின் நிறுவனங்கள்:
Sea food:  Victoria International (Pvt) Ltd
Sea cucumber: Victoria International Aqua Pvt Ltd

இக்கட்டுரை March 27, 2025 இல் வெளியான லங்கா பிஸினெஸ் ஒன்லைன் பத்திரிகையில் ஆங்கிலத்தில் வெளியானது. தமிழாக்கம் த.சிவதாசன்

Published By: VISHNU 28 MAR, 2025 | 07:08 PM

நாட்டின் பல பகுதிகளில் நிலவும் வெப்பமான வானிலை குறித்து வானிலை ஆய்வுத் துறை சிறப்பு அறிக்கை ஒன்றை வெளியிட்டுள்ளது.

அதன்படி, வடக்கு, வடமத்திய, வடமேற்கு, சப்ரகமுவ மாகாணங்களிலும், திருகோணமலை, மட்டக்களப்பு, கொழும்பு மற்றும் கம்பஹா மாவட்டங்களிலும் சில இடங்களில் வெப்பக் குறியீடு அல்லது மனித உடலால் உணரப்படும் வெப்பநிலை கவனம் செலுத்த வேண்டிய நிலையை எட்டியுள்ளதாக திணைக்களம் கூறுகிறது.

அதன்படி, பொதுமக்கள் போதுமான அளவு தண்ணீர் குடிக்கவும், முடிந்தவரை நிழலான இடங்களில் ஓய்வெடுக்கவும் வானிலை ஆய்வு மையம் கேட்டுக் கொண்டுள்ளது.

வயதானவர்கள் மற்றும் நோய்வாய்ப்பட்டவர்கள் குறித்து மக்கள் கவனமாக இருக்கவும், கடுமையான வெளிப்புற செயல்பாடுகளை மட்டுப்படுத்தவும், வெளிர், வெள்ளை அல்லது வெளிர் நிற ஆடைகளை அணியவும் குறித்த திணைக்களம் அறிவுறுத்தியதாக அந்த அறிக்கையில் மேலும் தெரிவிக்கப்பட்டுள்ளது.

https://www.virakesari.lk/article/210493

28 MAR, 2025 | 06:16 PM

பட்டலந்த அறிக்கை பற்றி பேசுபவர்கள், பல வதைமுகாம்கள் வடக்கில் இயங்கின; இராணுவத்தினரிடம் கையளித்தவர்கள் உள்ளனர்; அதை விசாரிக்க இந்த அரசாங்கமும் தயாரில்லை என நாடாளுமன்ற உறுப்பினர் ப.சத்தியலிங்கம் தெரிவித்துள்ளார்.

வவுனியாவில் நடைபெற்ற வேட்பாளர் அறிமுக நிகழ்வில் கலந்துகொண்டு உரையாற்றும்போதே அவர் இதனை தெரிவித்தார். 

அவர் மேலும் கூறுகையில்,

உள்ளூராட்சி மன்றங்களில் சிறப்பாக செயற்பட்டால் அதன் பின்னர் வரும் மாகாண சபைத் தேர்தல், 5 வருடங்களுக்கு பின்வரும் பாராளுமன்றத் தேர்தல் என்பவற்றில் சிறப்பான  வெற்றியை பெற முடியும்.

முல்லைத்தீவில் பாரம்பரிய வைத்தியம் படித்தவர்கள் வேலை இல்லாமல் இருப்பதால் கடந்த 7 வருடங்களாக வேலை கிடைக்காமையால் பட்டதாரி பயிலுனர்களாக கடமையாற்றுகிறார்கள். பிரதேச சபைகள் இலவச மருத்துவ சேவையை வழங்க வேண்டும். அதற்கு ஏற்பட்ட சட்டங்களை வகுத்து சித்த மருத்துவ நிலையங்களை உருவாக்க முடியும். அதில் அவர்களை வைத்தியர்களாக நியமிக்க முடியும்.

கட்சியை பலப்படுத்துவதற்கு உள்ளூராட்சி மன்றங்கள் அவசியம். அத்துடன் மக்களுக்கு சேவை வழங்க அவை முக்கியமானவை. தேர்தல் நேரம் பலர் வருவார்கள். ஆனால், கடந்த 75 வருடங்களாக தமிழ் பேசும் மக்களின் உரிமைக்காக தியாகங்களை செய்த தாய் கட்சி ஆகிய தமிழ் அரசுக் கட்சி சீசனுக்கு வரும் பறவைகள் அல்ல. நாம் மக்களுடனேயே இருக்கின்றோம்.

வவுனியா வடக்கு பிரதேசத்திற்கு நீர் வரவில்லை. ஆனால் மகாவலி எல் வலயம் ஊடாக பல குடியேற்றங்கள் உருவாக்கப்பட்டுள்ளன. அதன் மூலம் திட்டமிட்ட இனப் பரம்பலை மாற்றும் செயற்பாடு முன்னெடுக்கப்படுகிறது.

அதேபோன்று, செட்டிக்குளம் பிரதேசத்தின் கீழ் மல்வத்து ஓயா திட்டத்தின் மூலம்  ஆபத்தான நிலையில் உள்ளது. புதிதாக வாக்காளர்கள் இணைக்கப்பட்டுள்ளார்கள். திட்டங்களை நேர்மையாக மக்களுக்கு செயற்படுத்தினால் நல்லது. ஆனால், இவ்வாறான திட்டங்களின் பின்னால் குடியேற்றங்கள் உள்ளன. இதனை கடந்த கால அரசாங்கங்கள் செய்தன. தற்போதைய அரசாங்கமும் அதனையே செய்கிறது.

வடக்கு - கிழக்கில் இடம்பெற்ற மனித உரிமை மீறல்களை கூற, ஏற்றுக்கொள்ள இந்த அரசாங்கமும் தயாரில்லை. அண்மையில் 4 பேரை பிரித்தானியா தடை செய்தது. அதனை எமது கட்சியும் வரவேற்றுள்ளது. மனித குலத்திற்கு எதிரான குற்றங்களில் ஈடுபட்டு ஆதாரங்களுடன் இருந்த பலரில் 4 பேரை பிரித்தானியா தடை செய்துள்ளது. தற்போதைய அரசாங்கத்தினர் அந்த ஒருதலைப்பட்சமான முடிவை ஏற்றுக்கொள்ள மாட்டோம் என தெரிவித்துள்ளார்கள். பட்டலந்த அறிக்கை பற்றி பேசும் அவர்கள், பல வதைமுகாம்கள் வடக்கில் இயங்கின. இராணுவத்தினரிடம் கையளித்தவர்கள் உள்ளனர்.  அதை விசாரிக்க தயாரில்லை. அதைப் பற்றி பேச அவர்கள் தயாரில்லை.

கடந்த கால அரசாங்கங்கள் என்ன பதிலை சொன்னார்களோ அதே  பதிலை தான் இவர்களும் சொல்கிறார்கள். அவர்களது செயற்பாடுகளை மக்கள் விளங்கிக்கொள்ள வேண்டும். இந்த அரசாங்கத்துக்கு கால அவகாசத்தை வழங்கியுள்ளோம்.

பொருளாதார நெருக்கடிக்குள் இருக்கும் நாட்டை எடுத்துள்ளார்கள். அவர்கள் உடனடியாக மாயாஜாலம் செய்ய முடியாது. அவர்கள் பொருளாதார ரீதியாக நாட்டை மீட்டு எமது அரசியல் பிரச்சினைகளை தீர்க்க வேண்டும். அதற்கு நாம் கால அவகாசம் வழங்கியுள்ளோம். அதனை அவர்கள் பயன்படுத்தி விரைவாக செய்ய வேண்டும். அது நடக்காவிடின் இந்த அரசாங்கத்தையும் நாம் எதிர்ப்போம். அதற்கான காலத்தை அவர்கள் தான் தீர்மானிக்க வேண்டும் என்றார். 

https://www.virakesari.lk/article/210485

Published By: DIGITAL DESK 2 28 MAR, 2025 | 04:48 PM

பாடசாலை மாணவர்களின் புத்தகப் பையின் எடையைக் குறைக்குமாறு பாடசாலைகளுக்கு அறிவுறுத்தப்பட்ட போதிலும், சில பாடசாலை ஆசிரியர்கள் மற்றும் அதிபர்கள் அது தொடர்பில் கவனம் செலுத்தவில்லை என கல்வி அமைச்சின் சுகாதாரம் மற்றும் போசாக்கு பிரிவு தெரிவித்துள்ளது.

கல்வி அமைச்சின் சுகாதாரம் மற்றும் போசாக்கு பிரிவின் பணிப்பாளர் கங்கா தில்ஹானி இது தொடர்பில் தெரிவிக்கையில், 

பாடசாலை மாணவர்களின் புத்தகப் பைகளின் எடையை குறைப்பது தொடர்பான அறிவுறுத்தல்கள் சுற்றறிக்கை மூலம் பாடசாலை அதிபர்கள் மற்றும் ஆசிரியர்களுக்கு வழங்கப்பட்டிருந்தது.

இதனை யும் மீறி சில பாடசாலைகளின் அதிபர்களும் ஆசிரியர்களும் அதிகளவான புத்தகங்களை பாடசாலைக்கு கொண்டு வருமாறு மாணவர்களுக்கு அறிவுறுத்தியுள்ளனர்.

பாடசாலை மாணவர்களின் புத்தகப் பைகளின் எடை தொடர்பில் கிடைக்கப்பெறும் முறைப்பாடுகளின் பிரகாரம் பாடசாலைகளுக்கு கண்காணிப்புக் குழுக்களை அனுப்பி புத்தகப் பைகளின் எடை தொடர்பில் சோதனை செய்ய நடவடிக்கை எடுக்கப்பட்டுள்ளது.

உலக சுகாதார அமைப்பின் பரிந்துரைகளின்படி,  பாடசாலை மாணவர்களின் புத்தகப் பையின் எடை பதினைந்து முதல் இருபது கிலோ அல்லது அதற்கும் குறைவாக இருத்தல் வேண்டும்.

அதன்படி, முதலாம் தரத்தில் கல்வி கற்கும் மாணவனின் புத்தகப் பையின் எடை இரண்டு கிலோவாகவும்,இரண்டாம் தரத்தில் கல்வி கற்கும் மாணவனின் புத்தகப் பையின் எடை மூன்று கிலோவாகவும், ஐந்தாம் தரத்தில் கல்வி கற்கும் மாணவனின் புத்தகப் பையின் எடை நான்கு கிலோவாகவும் இருத்தல் வேண்டும்.

பத்தாம் தரத்தில் கல்வி கற்கும் மாணவனின் புத்தகப் பையின் எடை ஏழு கிலோவாக இருத்தல் வேண்டும் என அவர் மேலும் தெரிவித்தார்.

https://www.virakesari.lk/article/210460

முன்னாள் சுகாதார அமைச்சர் கெஹெலிய ரம்புக் வெல்லவின் ஆலோசனையின் பேரில், தரமற்ற மருந்துகளை வழங்குவதற்காக இந்திய மருந்து நிறுவனத்தின் பெயர் பரிந்துரைக்கப்பட்டதாக சுகாதார அமைச்சின் அதிகாரிகள் பொது நிறுவனங்கள் தொடர்பான பாராளுமன்றக் குழுவின் முன் தெரிவித்தனர்.

சம்பந்தப்பட்ட சுகாதார அதிகாரிகள் விசாரணைக்காக ஆஃப் கமிட்டியின் முன் அழைக்கப்பட்டபோது இந்த தகவல் தெரியவந்தது.

அந்த மருந்துகளுக்கு செவெரிட் நிறுவனத்தைச் சேர்க்க செயலாளர் அறிவுறுத்தியதாகவும், அமைச்சர் கெஹெலிய ரம்புக்வெல்ல செயலாளருக்கு அறிவுறுத்தியதாகவும் அமைச்சின் அதிகாரி ஒருவர் தெரிவித்தார்.

சுகாதார அமைச்சின் முன்னாள் செயலாளர் ஜனக ஸ்ரீ சந்திரகுப்தா, அமைச்சர் கெஹெலிய ரம்புக்வெல்லவிடம் சப்ளையர்  தொடர்பில் ஒரு முன்மொழிவை முன்வைத்ததாக தெரிவித்தார்.

151 மருந்துகளும் 5278 அறுவை சிகிச்சை கருவிகளும் பற்றாக்குறையாக இருப்பதாக தகவல் உள்ளதா? என்று கோப் குழுத் தலைவர் பாராளுமன்ற உறுப்பினர் நிஷாந்த சமரவீர கேள்வி எழுப்பினார்.

Tamilmirror Online || தரமற்ற மருந்துகளை கொள்வனவு செய்ய கோரியவர் கெஹலிய

28 Mar, 2025 | 03:58 PM

யோகட் சாப்பிடுவதற்கு பயன்படுத்தப்படும் மரக்கரண்டிகள் இந்தியாவில் இருந்து இறக்குமதி செய்யப்படுவதாக மில்கோ நிறுவனத்தின் தலைவர் ஹேமஜீவ கோட்டாபய தெரிவித்தார்.

மில்கோ நிறுவனத்தின் எதிர்கால திட்டம் தொடர்பில் ஊடகங்களுக்கு அறிவிப்பதற்காக அரசாங்க தகவல் திணைக்களத்தில் வியாழக்கிழமை (27) நடைபெற்ற ஊடகவியலாளர் சந்திப்பிலேயே அவர் மேற்கண்டவாறு தெரிவித்தார்.

யோகட்டுடன் வழங்கப்படும்  கார்ட் போர்டு கரண்டிகளை குழந்தைகள் அதிக நேரம் வாயில் வைத்திருப்பதால் அந்த கரண்டி சிறிது நேரத்தில் உருகி விடுகிறது. அத்துடன் இந்த கார்ட் போர்டு கரண்டிகள் குறித்து வாடிக்கையாளர்கள் பல்வேறு  முறைப்பாடுகளை அளித்துள்ளனர்.

இவற்றை கருத்தில் கொண்டு யோகட்டுடன் மரக்கரண்டிகளை வழங்குவதற்கு நடவடிக்கை எடுக்கப்பட்டது. ஆனால் நாட்டில் இந்த மரக்கரண்டிகள் போதிய அளவு உற்பத்தி செய்யப்படாமையால், அவை இந்தியாவில் இருந்து இறக்குமதி செய்யப்படுகின்றது.

யோகட் சாப்பிட பயன்படுத்தப்படும் மரக்கரண்டிகள் இந்தியாவிலிருந்து இறக்குமதி ? | Virakesari.lk

28 Mar, 2025 | 05:50 PM

பிறப்பாலும் இந்த மண்ணில் வாழ்ந்தவர்கள் என்ற அடிப்படையில் எங்களுடைய கைகளிலேயே துப்பாக்கிகள் திணிக்கப்பட்டன. அதற்கான காரணக் கதைகளைக் கூறாமல், எம்மை திரைப்படங்களில் வரும் வில்லன் கதாபாத்திரமாக சித்திரிப்பதற்கு முனைகின்றார்கள் என முன்னாள் இராஜாங்க அமைச்சரும் தமிழ் மக்கள் விடுதலைப் புலிகள் கட்சியின் தலைவருமான பிள்ளையான் என அழைக்கப்படும் சிவனேசத்துரை சந்திரகாந்தன் தெரிவித்துள்ளார்.

கிழக்கு தமிழர் கூட்டமைப்பின் கல்குடா தொகுதியின் உள்ளூராட்சி சபைத் தேர்தலில் போட்டியிடும் வேட்பாளர் அறிமுக நிகழ்வு கிரான் ரெஜி மண்டபத்தில் நடைபெற்றது. இதன்போது உரையாற்றுகையிலேயே அவர் மேற்கண்டவாறு  தெரிவித்தார்.

அவர் அங்கு மேலும் கூறுகையில்,

கிழக்கு தமிழர் கூட்டமைப்பு ஒரு உறுதியான அமைப்பாக கிழக்கு மாகாண அரசியல் சமூக பொருளாதார மேம்பாட்டின் ஆரம்பமாக மிளிர வேண்டும் என்று ஒரு நல்ல சிந்தனையோடு நாங்கள் கூடியிருக்கின்றோம். 

உள்ளூராட்சி மன்றங்களின் வெற்றி என்பது உள்ளூர் தலைவர்களை உருவாக்குவதற்கான வெற்றியாகும். உள்ளூர் அதிகார சபைக்காக போட்டியிடுபவர்கள் எண்ணங்களையும் சிந்தனைகளையும் உயர்த்திக்கொள்ள வேண்டும். 

குறிப்பாக மட்டக்களப்பு மாவட்டத்தின் கல்குடா தொகுதியிலேயே அமைந்திருக்கின்ற உள்ளூராட்சி மன்றங்களில் போட்டியிடுகின்ற வேட்பாளர்கள் மிகவும் கவனமாக செயற்படவேண்டியுள்ளது.

கண்டியைப் பிறப்பிடமாகக் கொண்ட ஸ்ரீலங்கா முஸ்லிம் காங்கிரஸின் தலைவர் ரவூவ் ஹக்கீம் இந்த மண்ணிலே சுமார் 40,000 ஏக்கரை பரிபாலனம் செய்வதற்காக கேட்கின்றார். 

ஏறாவூரை பிறப்பிடமாகக் கொண்ட பாராளுமன்ற உறுப்பினர் 70,000 ஏக்கரை நிர்வகிக்க வேண்டும் எனக் கேட்கின்றார். இவ்வாறுதான் பிரச்சினைகள் இருந்துகொண்டிருக்கின்றன.

அதிகம் பேர் ஏன் தமிழ் மக்கள் விடுதலைப் புலிகளும், கருணா அம்மானும் மீண்டும் சேர முடியாது எனக் கேட்டார்கள். அதற்கான முயற்சிகளை நாங்கள் எடுத்திருந்தோம். அது இப்போது சாத்தியமாகி இருக்கின்றது.

காலம் தாழ்த்திய முடிவாக இருந்தாலும் சாலப் பொருத்தமான முடிவு எனப் பெரியவர்கள் கூறுகின்றார்கள். அதற்காக உழைத்தவர்தான் முற்போக்கு தமிழர் கழகத்தின் தலைமை ஒருங்கிணைப்பாளரும், முன்னாள் இராஜாங்க அமைச்சருமான சதாசிவம் வியாழேந்திரன்.

கருணா அம்மானை பிரித்தானிய அரசாங்கம் தடை செய்திருப்பதானது எம்முடைய தோல்வி அல்ல, அது இந்த அரசாங்கத்தினுடைய இராஜதந்திர தோல்வியாகத்தான் என்னால் பார்க்க முடியும். 

அந்த அடிப்படையில் கிழக்கு மாகாணத்தினுடைய தலைவிதியை மாற்ற வேண்டிய, கிழக்கு மாகாண மக்களை தூக்கி நிறுத்தவேண்டிய விடயங்கள் எல்லாம் எங்களுக்கு பொறுப்பாக்கப்பட்டு இருக்கின்ற விடயங்களாக உள்ளன.

கருணா அம்மானோ அல்லது ஜூலை கலவரமோ எல்லாவற்றுக்கும் அடித்தளமிட்டவர்கள் யார்?

1976ஆம் ஆண்டு வட்டுக்கோட்டை தீர்மானத்தை எடுத்தபோது அவர்கள் என்ன சொன்னார்கள் என்பதை தேடி கற்றுக்கொள்ளுங்கள். 

விடப்பட்ட சொல்லாடல்களும் கருத்தாடல்களும்தான் அன்று எதிர்க்கட்சித் தலைவர் அமிர்தலிங்கத்தை தலைவர் ஆக்கியது. அவர்கள் பற்ற வைத்த நெருப்பு பெரும் தீப்பொறியாக பல இயக்க தலைவர்களை உருவாக்கி திட்டங்களையும் துவக்குகளையும் ஏந்துகின்ற நிலையை எங்களுடைய காலடிக்கு கொண்டு வந்தது என்றார்.

துப்பாக்கிகள் எங்கள் கைகளில் திணிக்கப்பட்டன - பிள்ளையான் | Virakesari.lk

28 Mar, 2025 | 05:17 PM

ஐக்கிய அரபு எமிரேட்ஸ் இராச்சியத்திலிருந்து கொண்டுவரப்பட்ட கீரிப்பூனை ஜோடி ஒன்று தெஹிவளை மிருகக்காட்சிசாலையில் பொதுமக்கள் பார்வைக்காக வைக்கப்பட்டுள்ளது.

ஐக்கிய அரபு எமிரேட்ஸ் இராச்சியத்திலிருந்து தெஹிவளை மிருகக்காட்சிசாலைக்கு கடந்த பெப்ரவரி மாதம் 10 ஆம் திகதி வன விலங்குகள் சில கொண்டுவரப்பட்டன.

இந்த வன விலங்குகள் தெஹிவளை மிருகக்காட்சிசாலையின் கால்நடை வைத்தியர்களால் சுமார் ஒரு மாத காலமாக பரிசோதனைக்குட்படுத்தட்ட நிலையில் அவற்றில் இருந்த கீரிப்பூனை ஜோடி ஒன்று தற்போது பொதுமக்கள் பார்வைக்காக வைக்கப்பட்டுள்ளது.

2 முதல் 6 வயது மதிக்கத்தக்க கீரிப்பூனை ஜோடி ஒன்றே இவ்வாறு பொதுமக்கள் பார்வைக்காக வைக்கப்பட்டுள்ளது.

Meerkat எனப்படும் இந்த கீரிப்பூனைகள் 15 வருடங்கள் உயிர் வாழும் என கூறப்படுகின்றது.

இந்த கீரிப்பூனைகள் தென் ஆபிரிக்கா, போட்ஸ்வானா, நமீபியா ஆகிய நாடுகளில் பெரும்பாலும் காணப்படும். 

தெஹிவளை மிருகக்காட்சிசாலைக்கு புதிய நண்பர்கள் | Virakesari.lk

28 Mar, 2025 | 05:30 PM

2025 ஆம் ஆண்டில் ஜனவரி மாதம் முதலாம் திகதியில் இருந்து மார்ச் மாதம் 26 ஆம் திகதி வரையான காலப்பகுதிக்குள் 684,960 சுற்றுலாப் பயணிகள் நாட்டுக்கு வருகை தந்துள்ளதாக இலங்கை சுற்றுலா அபிவிருத்தி அதிகார சபை தெரிவித்துள்ளது.

அதிகளவான சுற்றுலாப் பயணிகள் இந்தியாவிலிருந்து வருகை தந்துள்ள நிலையில் அவர்களின் மொத்த எண்ணிக்கை 111,982 ஆகும்.

மேலும், ரஷ்யாவிலிருந்து 90,255 சுற்றுலாப் பயணிகளும், ஐக்கிய இராச்சியத்திலிருந்து 64,711 சுற்றுலாப் பயணிகளும், ஜெர்மனியிலிருந்து 48,129 சுற்றுலாப் பயணிகளும்,சீனாவிலிருந்து 37,268 சுற்றுலாப் பயணிகளும், பிரான்ஸிலிருந்து 41,449 சுற்றுலாப் பயணிகளும், அவுஸ்திரேலியாவிலிருந்து 25,513 சுற்றுலாப் பயணிகளும் நாட்டுக்கு வருகை தந்துள்ளதாக இலங்கை சுற்றுலா அபிவிருத்தி அதிகார சபை மேலும் தெரிவித்துள்ளது.

சுற்றுலாப் பயணிகளின் எண்ணிக்கை அதிகரிப்பு! | Virakesari.lk

மதுபோதையில் வாகனம் ஓட்டிய சாரதி; அனுமதி பத்திரம் வாழ் நாள் முழுவதும் இரத்து!

மதுபோதையில் தனியார் பேருந்தை ஓட்டியதற்காக, பேருந்து சாரதியின் உரிமத்தை வாழ்நாள் முழுவதும் இரத்து செய்ய பாணந்துறை தலைமை நீதிவான் உத்தரவிட்டுள்ளதாக தெரிவிக்கப்பட்டுள்ளது.

தீர்ப்பை வெளியிட்ட பாணந்துறை தலைமை நீதிவான் சம்பிகா ராஜபக்ஷ, குற்றம் சாட்டப்பட்டவருக்கு அபராதமும் விதித்தார்.

பாணந்துறையிலிருந்து களுத்துறைக்கு ஒரு தனியார் நிறுவனத்தின் ஊழியர்களை ஏற்றிச் சென்ற குற்றம் சாட்டப்பட்டவர், போக்குவரத்து பொலிஸாரால் சோதனை செய்யப்பட்டார்.

இதன்போது, மதுவின் வாசனை அவர் மீது தொடர்ந்து இருந்ததால், பொலிஸார் அவரை மேலும் விசாரித்தனர், அப்போது அவர் மது போதையில் இருப்பது உறுதி செய்யப்பட்டது.

சாரதி தனது பயணிகளின் உயிருக்கு ஆபத்தை விளைவித்ததான வாதத்தின் அடிப்படையில், பாணந்துறை தலைமை நீதிவான் அவரது உரிமத்தை இடைநிறுத்தி அபராதம் விதித்தார்.

https://athavannews.com/2025/1426762

இலங்கையின் பொருளாதாரம் இன்னும் பாதிக்கப்படக்கூடிய நிலையில் – IMF

இலங்கையின் பொருளாதார மீட்சி வேகம் பெற்று வருவதாக சர்வதேச நாணய நிதியம் (‍IMF) தெரிவித்துள்ளது.

இலங்கையில் சீர்திருத்தங்கள் பலனளிப்பதாகக் சர்வதேச நாணய நிதியத்தின் தகவல் தொடர்புத் துறையின் பணிப்பாளர் ஜூலி கோசாக் (Julie Kozack) குறிப்பிட்டார்.

இது குறித்து மேலும் குறிப்பிட்டுள்ள அவர்,

கடந்த பெப்ரவரி 28 ஆம் திகதி வெள்ளிக்கிழமை, IMF நிர்வாகக் குழு இலங்கைக்கான EFF (விரிவாக்கப்பட்ட நிதி வசதி) ஏற்பாட்டின் கீழ் மூன்றாவது மதிப்பாய்வை அங்கீகரித்தது.

மேலும் இது நாட்டிற்கு உடனடியாக $334 மில்லியன் ஆதரவை அணுக அனுமதித்தது.

எனவே, அந்த மூன்றாவது மதிப்பாய்வை வாரியம் அங்கீகரித்தவுடன், $334 மில்லியன் இலங்கையின் பொருளாதாரக் கொள்கைகள் மற்றும் சீர்திருத்தங்களை ஆதரிக்கக் கிடைத்தது.

மேலும் இந்த $334 மில்லியனுடன், இது IMF இலிருந்து இலங்கைக்கு மொத்த நிதி உதவியை $1.34 பில்லியனாகக் கொண்டு வருகிறது.

இலங்கையில் சீர்திருத்தங்கள் பலனளிக்கின்றன என்பதை நாம் ஏற்றுக் கொள்ள முடியும்.

பொருளாதார மீட்சி வேகம் அதிகரித்து வருகிறது, இலங்கையில் பணவீக்கம் குறைவாகவே உள்ளது, நிதிப் பக்கத்தில் வருவாய் வசூல் மேம்பட்டு வருகிறது, சர்வதேச இருப்புக்கள் தொடர்ந்து குவிந்து வருகின்றன.

2024 ஆம் ஆண்டில் பொருளாதார வளர்ச்சி 5 சதவீதத்தை எட்டியது, அது இரண்டு வருட பொருளாதார சுருக்கத்திற்குப் பிறகு. மேலும் 2025 ஆம் ஆண்டிலும் இலங்கையில் மீட்சி தொடரும் என்று நாங்கள் எதிர்பார்க்கிறோம்.

இவை அனைத்தும் இலங்கைக்கும் நாட்டு மக்களுக்கும் மிகவும் சாதகமான முன்னேற்றங்கள்.

எனினும், இவை அனைத்தும் கூறப்பட்டாலும், பொருளாதாரம் இன்னும் பாதிக்கப்படக்கூடியதாகவே உள்ளது.

எனவே பெரிய பொருளாதார நிலைத்தன்மை மற்றும் கடன் நிலைத்தன்மை நீடித்து நிலைத்திருப்பதை உறுதி செய்வதற்கு சீர்திருத்த உந்துதல் நிலைத்திருப்பது மிகவும் முக்கியமானது – என்றார்.

https://athavannews.com/2025/1426750

37வது பொலிஸ் மா அதிபர் பதவிக்காக ஏழு மூத்த பொலிஸ் மா அதிபர்களின் பெயர்கள் முன்மொழிவு!

பொலிஸ் மா அதிபர் தேசபந்து தென்னகோனை பதவியில் இருந்து நீக்குவதற்கான முன்மொழிவைத் தொடர்ந்து, அந்தப் பதவிக்காக ஏழு மூத்த பொலிஸ் மா அதிபர் இடையே பனிப்போர் ஆரம்பமாகியுள்ளதாக போலீஸ் வட்டாரங்கள் தெரிவித்துள்ளன

அதன்படி தற்போதைய பதில் பொலிஸ் மா அதிபர் பிரியந்த வீரசூரிய, லலித் பத்திநாயக்க சஞ்சீவ மெதவத்த, ரன்மல் கொடிகுணு, சஞ்சீவ தர்மரத்ன, கித்சிறி ஜெயலத் மற்றும் எம்.ஜி.ஆர் எஸ். தமிந்த ஆகியோர் பொலிஸ் மா அதிபர் பதவிக்கு முன்மொழியப்பட்டுள்ளதாக அறியப்படுகிறது.

மேலும் அடுத்து நியமிக்கப்படவுள்ளவர் இந்த நாட்டின் 37வது பொலிஸ் மா அதிபர் ஆவர் என்றும் தெரிவிக்கப்பட்டுள்ளடன் பொலிஸ் மா அதிபர் தேசபந்து தென்னகோனுக்கு எதிரான பிரேரணை நிறைவேற்றப்பட்டால், ஜனாதிபதி அவரை பதவியில் இருந்து நீக்குவார். அத்துடன் நியமிக்கப்படும் அடுத்த பொலிஸ் மா அதிபர் ஜனாதிபதியால் அரசியலமைப்பு சபைக்கு பரிந்துரைக்கப்படுவார் என்று அந்த வட்டாரங்கள் தெரிவித்தன.

https://athavannews.com/2025/1426722

சட்ட விரோதமான மீன்பிடி முறைமைகளுக்கு எப்பொதும் அனுமதி வழங்க முடியாது-இராமலிங்கம் சந்திரசேகர்!

கடற்றொளில் நீரியல் மற்றும் கடல் வளங்கள் அமைச்சர் இராமலிங்கம் சந்திரசேகர் திருகோணமலை மாவட்டத்தில் பல மக்கள் சந்திப்புக்களை முன்னெடுத்திருந்தார்.

அந்தவகையில் திருகோணமலை மாவட்ட மட்டங்களில் மீனவர்கள் எதிர்கொள்ளும் பிரச்சினைகள் குறித்து கேட்டறிந்துகொண்ட அவர் அதற்கான தீர்வுத்திட்டங்களை முன்னெடுக்க நடவடிக்கை எடுப்பதாக உறுதியளித்திருந்தார்.

விசேடமாக எல்லை தாண்டி மீன்பிடியில் ஈடுபட்ட குற்றச்சாட்டின் போரில் இந்தியாவால் கைது செய்யப்பட்ட இலங்கை மீனவர்கள் குறித்து விசேட கவனம் எடுப்பதாகவும் அவர் தெரிவித்தார்

மேலும் தடைசெய்யப்பட்ட மீன்பிடி முறைகளை உபயோகிப்பதன் ஊடாக எங்களது மீனவர்கள எமது கடல் வளங்களை நாசப்படுத்துகின்றனர். ஆகையால் சட்ட விரோதமான மீன்பிடி முறைமைகளுக்கு எப்பொதும் அனுமதி வழங்க முடியாது என்றும் அவ்வாறு எவரும் கைது செய்யப்பட்டால் அவர்களுக்கு தண்டனை வழங்கப்படும் என தெரிவித்தார்.

மேலும் உயர் தொழில்நுட்பங்களை பயன்படுத்தி டிஜிட்டல் மயமாக்கத்தின் ஊடாக மீன்பிடித்துறையை மேம்படுத்துவதற்கும் நடவடிக்கை எடுக்கப்படும் எனவும் அது தொடர்பில் அரசு அதிக கவனம் செலுத்தி வருவதாகவும் அவர் குறிப்பிட்டுள்ளார்.

https://athavannews.com/2025/1426716

அரசாங்கம் கடந்த கால தவறுகளை மீண்டும் செய்யக்கூடாது – நாமல்.

மஹிந்த ராஜபக்ஷவின் ஆட்சியில் முன்னாள் பிரதம நீதியரசர் ஷிராணி பண்டாரநாயக்க பதவி நீக்கம் செய்யப்பட்டிருக்கக் கூடாது என ஸ்ரீலங்கா பொதுஜன பெரமுனவின் (SLPP) நாடாளுமன்ற உறுப்பினர் நாமல் ராஜபக்ச தெரிவித்துள்ளார்.

முன்னாள் ஜனாதிபதி மஹிந்த ராஜபக்ஷவின் அரசாங்கத்திற்கு எதிரான சில சட்டத் தீர்ப்புகளைத் தொடர்ந்து, ஷிராணி பண்டாரநாயக்க மீது ஊழல் குற்றச்சாட்டுகள் சுமத்தப்பட்டன.

நாடாளுமன்றக் குழுவின் பரிந்துரையின் பேரில் பதவி நீக்கம் செய்யப்பட்ட பின்னர், 2013 ஜனவரியில் அவர் தலைமை நீதிபதி பதவியில் இருந்து நீக்கப்பட்டார்.

இந்த நிலையில் நேற்று செய்தியாளர்களிடம் பேசிய நாடாளுமன்ற உறுப்பினர் நாமல் ராஜபக்ஷ, அந்த நேரத்தில் இதுபோன்ற நடவடிக்கை எடுக்கப்பட்டிருக்கக் கூடாது என்ற நிலைப்பாட்டில் தான் இருந்ததாகக் கூறினார்.

“தற்போதைய அரசாங்கம் நாம் செய்த அதே தவறுகளை மீண்டும் செய்யக்கூடாது. அவர்கள் அதை மீண்டும் செய்தால், அது சரியல்ல. இதுபோன்ற முடிவுகளுக்கான விலையை எங்கள் கட்சி இன்னும் செலுத்தி வருகிறது,” என்றும் அவர் கூறினார்.

அரசியல் முடிவுகளை எடுப்பதற்காக ஒரு தனிநபரை குறிவைக்க நாடாளுமன்றம் பயன்படுத்தப்பட்டால், தனது கட்சி அதை ஆதரிக்காது என்றும் அவர் மேலும் தெரிவித்தார்.

பதவி இடைநீக்கம் செய்யப்பட்ட பொலிஸ்மா அதிபர் தேசபந்து தென்னகோனை அவரது பதவியில் இருந்து நீக்குமாறு அரசாங்கம் நாடாளுமன்றத்தில் சமர்ப்பித்த பிரேரணைக்கு பதிலளிக்கும் விதமாக அவர் இந்தக் கருத்துக்களை தெரிவித்தார்.

https://athavannews.com/2025/1426709

தேசிய உணவு ஊக்குவிப்புச் சபையால் முதலாவது மாதிரி உணவகம் நாரஹேன்பிட்டியில் திறப்பு!

மக்களின் உணவுப் பாதுகாப்பை உறுதி செய்தல் மற்றும் தரமான, போதியளவான உணவை நியாயமான விலையில் பெற்றுக்கொள்வதற்கான வசதிகளை செய்துகொடுக்க, நாடளாவிய ரீதியில் புதிய உணவகங்களை நிறுவ அரசாங்கம் திட்டமிட்டுள்ளது.

தேசிய உணவு ஊக்குவிப்பு சபை, சுகாதார அமைச்சு மற்றும் விவசாய அமைச்சுக்களின் அதிகாரிகளின் பங்குபற்றுதலுடன் இது தொடர்பான ஆரம்பக்கட்ட கலந்துரையாடல் ஜனாதிபதி அலுவலகத்தில் இடம்பெற்றிருந்தது

தேசிய உணவு ஊக்குவிப்புச் சபை, சுகாதார அமைச்சு மற்றும் விவசாய அமைச்சு ஆகியன இணைந்து தற்போது உணவகங்களை நடத்தி வரும் வர்த்தகர்களின் ஆதரவுடன் இத்திட்டத்தை நடைமுறைப்படுத்த தீர்மானிக்கப்பட்டுள்ளது.

அதன்படி, முதலாவது மாதிரி உணவகம் ஏப்ரல் 1ஆம் திகதி நாரஹேன்பிட்டியில் திறக்கப்படவுள்ளது. இதன் இரண்டாம் கட்டமாக தற்போதுள்ள உணவகங்களின் தரத்தை உயர்த்தும் வேலைத்திட்டம் நடைமுறைப்படுத்தப்பட உள்ளது.

ஆரோக்கியமான உணவுகளை உண்ணும் மக்களின் உரிமையை உறுதிப்படுத்தல், சரியான சுகாதாரத் தரத்திற்கு ஏற்ற உணவை பெற்றுக்கொள்வதற்குத் தேவையான சூழலை உருவாக்குதல், நுகர்வோர் நம்பிக்கையை வளர்ப்பதற்கு மேற்கொள்ளக்கூடிய நடவடிக்கைகள், அது தொடர்பில் அரச மற்றும் தனியார் துறைகளின் பங்களிப்பை பெற்றுக்கொள்வது குறித்தும் இதன்போது விரிவாக கலந்துரையாடப்பட்டது.

மேலும், உணவு தரப்படுத்தல் மற்றும் தரம் தொடர்பில் நாட்டில் காணப்படும் கொள்கைகள் மற்றும் திட்டங்களை செயற்பாட்டு ரீதியாக நடைமுறைப்படுத்துதல், நுகர்வோருக்கு சத்தான மற்றும் போசாக்கான மற்றும் சுகாதார பாதுகாப்பு மிக்க உணவை வழங்குதல் குறித்த வர்த்தக சமூகத்தின் அணுகுமுறை மாற்றத்தை உருவாக்க “Clean Srilanka” திட்டத்தின் மூலம் எடுக்கப்படக்கூடிய நடவடிக்கைகள் குறித்தும் இதன்போது ஆராயப்பட்டிருந்தமையும் குறிப்பிடத்தக்கது.

https://athavannews.com/2025/1426729

மீனவர்களின் நலன்கருதி முல்லையில் வெளிச்சவீடு அமைக்கப்படவேண்டும் ; ரவிகரன் எம்.பி

28 Mar, 2025 | 10:58 AM

முல்லைத்தீவில் வெளிச்சவீடு இன்மையால் கடலுக்குச்செல்லும் மீனவர்கள் கரைதிரும்புவதில் பாரிய இடர்பாடுகளை நீண்டகாலமாக எதிர்நோக்கி வருகின்றனர்.    

எனவே மீனவர்களின் நலன்கருதி முல்லைத்தீவு கடற்கரையில் வெளிச்சவீடொன்று அமைக்கப்படவேண்டுமென வன்னிமாவட்ட நாடாளுமன்ற உறுப்பினர் துரைராசா ரவிகரன் முல்லைத்தீவு மாவட்ட அபிவிருத்தி ஒருங்கிணைப்புக்குழுக்கூட்டத்தில் தீர்மானம் ஒன்று முன்மொழியப்பட்டது.   

குறித்த தீர்மானம் ஒருங்கிணைப்புக்குழுக்கூட்டத்தில் நிறைவேற்றப்பட்டதுடன், இவ்வாறு எடுக்கப்பட்ட தீர்மானத்தை கடற்றொழில் அமைச்சர் உள்ளிட்ட அரசாங்கத்தின் முக்கியஸ்தர்களுக்கும் அனுப்பிவைப்பதென முடிவெடுக்கப்பட்டுள்ளது. 

இதன்போது நாடாளுமன்ற உறுப்பினர் ரவிகரன் மேலும் கருத்துத் தெரிவிக்கையில், 

முன்பு முல்லைத்தீவு - மணற்குடியிருப்புப் பகுதியில் வெளிச்சவீடொன்று இருந்தது. அது தற்போது முற்று முழுதாக அழிவடைந்துள்ளது. 

முல்லைத்தீவு மாவட்டத்தைப் பொறுத்தவரையில் கொக்கிளாயிலிருந்து பேப்பாரப்பிட்டிவரை சுமார் 74 கிலோமீற்றர் வரையிலான கடற்கரையோரத்தில் அதிகளவான மீன்பிடித் துறைகளிலிருந்து, மீனவர்கள் கடற்றொழில் செயற்பாடுகளில் ஈடுபட்டுவருகின்றனர். 

முல்லைத்தீவு மாவட்டத்தைச்சேரந்த மீனவர்கள், முன்பு வெளிச்சவீட்டின் உதவியுடன் இடர்பாடுகளின்றி கடலுக்குச்சென்று தமது துறைகளில் கரையேறுவார்கள். 

தற்போது வெளிச்சவீடு முற்றாக அழிவடைந்துள்ளதால் மீனவர்கள், கடலுக்குச் செல்லும் மீனவர்கள் கரையேறுவதில் பாரிய சிக்கல்களை எதிர்நோக்கியுள்ளனர். 

கடந்த 21ஆம் திகதி பாராளுமன்றில், கடற்றொழில் அமைச்சருடனும் பேசியுள்ளேன். அவரும் வெளிச்சவீட்டினை அமைப்பதற்குரிய நடவடிக்கை மேற்கொள்ளப்படும் எனத் தெரிவித்திருந்தார். 

எனவே இந்த மாவட்ட அபிவிருத்தி ஒருங்கிணைப்புக்குழுக் கூட்டத்தில், ஏற்கனவே முன்பிருந்த இடத்தில் வெளிச்சவீட்டை அமைப்பதென ஒரு தீர்மானத்தை எடுப்பதுடன், அந்தத்தீர்மானத்தை கடற்றொழில் மைச்சர் உள்ளிட்ட அரசாங்கத்தின் முக்கியஸ்தர்களுக்கும் நடவடிக்கைக்காக் அனுப்பிவைப்பதென்ற ஒரு தீர்மானத்தையும் எடுப்போம்  என்றார்.  

இந்நிலையில் வெளிச்சவீடு அமைப்பதுதொடர்பில் தீர்மானம் எடுக்கப்பட்டதுடன், குறித்த தீர்மானத்தை கடற்றொழில் அமைச்சர் உள்ளிட்ட உரிய தரப்பினருக்கு அனுப்பிவைப்பதென்ற முடிவும் எடுக்கப்பட்டது.

https://www.virakesari.lk/article/210418

”கொக்கரிக்கின்ற ஆட்சியாளருக்கு சரியான பதிலடி கொடுக்க வேண்டும்” - சுமந்திரன்

வடக்கு மக்களது ஆணை எங்களிடத்தில் இருக்கிறது என கொக்கரிக்கின்ற ஆட்சியாளருக்கு நாம் சரியான செய்தியை சொல்ல வேண்டும். இறைமையை உபயோகிக்கின்ற போது கவனமாக உபயோகிக்க வேண்டும் என தமிழரசுக் கட்சியின் பதில் பொதுச் செயலாளரும், முன்னாள் பாராளுமன்ற உறுப்பினருமான சட்டத்தரணி எம்.ஏ.சுமந்திரன் தெரிவித்துள்ளார்.

வவுனியாவில் தமிழரசுக் கட்சி வேட்பாளர்களை அறிமுகப்படுத்தும் நிகழ்வில் நேற்று (27) கலந்து கொண்டு உரையாற்றும் போதே அவர் இவ்வாறு தெரிவித்தார்.

இந்த உள்ளுராட்சி மன்றத் தேர்தல் என்பது பிற்போடப்பட்ட தேர்தல். முன்னர் நடந்திருக்க வேண்டிய தேர்தல். காலம் தாழ்த்தி தற்போது நடைபெறுகிறது. இந்த தேர்தல் ஒன்றரை வருடங்களுக்கு முன்னர் நடந்திருந்தால் அப்பொழுது நாட்டில் இருந்த சூழ்நிலை சற்று வித்தியாசமானதாக இருந்திருக்க கூடும். ஆனால் தற்போது இந்த தேர்தல் நடைபெறும் சூழ் நிலையில் எங்களுக்கான சவால்கள் அதிகமாக இருக்கின்றன.

புதிய சவால்களை எப்படி எதிர் நோக்குவது என்று யோசித்து செயலாற்ற வேண்டிய நிலையில் இருக்கின்றோம். மக்கள் மத்தியில் பாரம்பரிய கட்சிகளுக்கு எதிரான ஒரு மனப்பாங்கு உருவாகி இருக்கிறது. பொதுவாக இந்த நாட்டை குட்டிச் சுவர்களாகியது நீண்டகாலம் இருந்த கட்சிகள் என அங்கலாய்த்து, அடிப்படையான மாற்றம் தேவை என்று தான் பாரிய மாற்றம் ஏற்பட்டுள்ளது.

அரசியல் நிலையில் முன் எப்போதும் இல்லாத மாற்றம் ஏற்பட்டுள்ளது. மக்கள் ஒரு எதிர்பார்ப்போடு இந்த மாற்றங்களை கொண்டு வந்திருந்தார்கள். எவரிடமும் நம்பிக்கை வைத்து கொண்டு வந்தார்கள் என்று சொல்ல முடியாது. ஆனால் முன்பு இருந்தவர்களிடம் நம்பிக்கை இழந்தமையால் தான் அந்த மாற்றம் நிகழ்ந்திருக்கின்றது.

இலங்கை தமிழரசுக் கட்சி தொடர்ச்சியாக தங்களுக்கு சேவையாற்றிக் கொண்டிருக்கிறது. தமது உடனடித் தேவைகளை தீர்க்கின்ற அளவில் செயற்படுகின்றோமா என்பது பற்றி மக்கள் மத்தியில் ஒரு கேள்வி இருக்கிறது.

நாங்கள் எமது இனத்தின் விடுதலைக்காக உருவாக்கப்பட்ட கட்சி. அதை நாங்கள் செய்கின்றோம். அதை நாங்கள் சொல்கின்றோம். ஆட்சி அதிகாரங்கள் எமது கைகளில் வந்து சேர வேண்டும். தமிழ் மக்களின் கைகளில் வர வேண்டும் என 75 வருடமாக உழைக்கின்ற, முயற்சி செய்கின்ற ஒரு கட்சி. அதில் மக்களுக்கு சந்தேகம் இல்லை.

அதை செய்கின்ற அதேவேளை, மக்களுக்கு நாளாந்த பிரச்சனைகள் பல உள்ளன. உள்ளுராட்சி மன்றங்களிடத்தில் கொடுக்கப்பட்டுள்ள அதிகாரங்கள் நாளாந்த பிரச்சனைகளை சந்திக்கக் கூடியதான அதிகாரங்கள். ஆகையினால், தான் உள்ளுராட்சி மன்றங்களின் அதிகாரங்களை அறிந்து அதை நாம் செயற்படுத்துகின்ற போது, மக்களுடைய நாளாந்த பிரச்சனைகளை தீர்க்கின்ற வகையில், அதிகாரங்கள் எமது கைகளில் வருகின்ற போது அதை திறம்பட செயலாற்றுபவர்கள் நாங்கள் என்பதை மக்களுக்கு காண்பிக்க முடியும். அதை இவர்கள் செய்வார்களா இல்லையா என்ற சந்தேகம் இருக்கிறது.

ஏனெனில், எமது வாய்களில் இருந்து வருகின்ற வார்த்தைகள் எல்லாம் எமது விடுதலை பற்றியதும், அதிகார பகிர்வு பற்றியதும், தேசத்தின் விடுவிப்பு பற்றியதாகவும் தான் இருக்கிறது. அது தவறில்லை. அதற்காகத் தான் நாங்கள் இருக்கின்றோம்.

அதற்காக பேசுகின்ற, அதேவேளை அடிமட்டத்தில் மக்களது நாளாந்த பிரச்சனைகள் சம்மந்தமாக உள்ளூராட்சி மன்றங்களுக்கு கொடுத்திருக்கின்ற அதிகாரங்களையும் நாம் பிரயோகிக்க வல்லவர்கள் என்பதையும் காண்பிக்க வேண்டியவர்களாக இருக்கின்றோம்.

அந்த அதிகாரங்களை கையாள தெரியாதவர்கள என்று மக்கள் நினைத்தால் அரசியல் அதிகாரங்களை கோருவது தேவையற்றது எனவும், சரியாக கையாண்டால் இவர்களிடம் கொடுப்பது நல்ல விடயம் எனவும் கருதுவார்கள். உள்ளூராட்சி சபைக்கு அதிகாரங்கள் இருக்கின்றன. அதை கேட்டுப் பெற வேண்டியதில்லை. மாகாண சபைக்கு அதிகாரங்களை கேட்டு பெற வேண்டும். சமஸ்டிக்காக உழைக்கின்றோம்.

மாற்றத்தினால் மக்களது வாழ்க்கையில் எதுவித மாற்றமும் நிகழப் போவதில்லை என்கின்ற சந்தேகம் தற்போது மக்களிடம் வந்துள்ளது. 6 மாத காலத்திற்குள் வந்துள்ளது. அந்த நம்பிக்கை வீண் போகின்ற வகையில் இந்த ஆட்சி செல்கின்ற திசையை பார்த்து மக்களது மனதில் உதித்துள்ளது.

பொறுப்பு கூறல் சம்மந்தமாக பல சர்வதேச தலைவர்களுடன் பேசி, பல விதமான பொறிமுறைகள் ஊடாக அழுத்தங்களை நாம் கொடுத்திருக்கின்ற போது, தற்போது ஆட்சியில் இருப்பவர்கள் அந்தக் காலத்தில் பேசாமல் இருந்தார்கள்.

2016, 2017 ஆம் ஆண்டுகளில் காணாமல் போனவர்களுக்கான அலுவலகத்தை அமைக்க பாராளுமன்றத்தில் நாம் செயற்பட்ட போது எங்களுக்கு ஆதரவாக செயற்பட்டார்கள். அது குறித்து பேசினார்கள். நிலம் விடுவிக்கப்பட வேண்டும் என்றார்கள். பயங்கரவாத தடைச்சட்டம் முற்றாக நீக்கப்பட வேண்டும் என்பதில் எங்களை விட கூடுதலாக சொன்னார்கள். அந்த நிலைமைகள் 6 மாத காலத்திற்குள் தலைகீழாக மாறி விட்டது. எதிர்கட்சியில் இருந்ததைப் போல் அவர்கள் இப்போது இல்லை.

வடக்கு மக்களது ஆணை எங்களிடத்தில் இருக்கிறது என கொக்கரிக்கின்ற ஆட்சியாளருக்கு நாம் சரியான செய்தியை சொல்ல வேண்டும்.

இறைமையை உபயோகிக்கின்ற போது கவனமாக உபயோகிக்க வேண்டும். தமிழ் மக்களது ஆணை வந்து விட்டது. தீர்வு நாங்கள் கொடுப்பது தான் என அவர்கள் சொல்ல தலைப்படுவதை முளையில் கிள்ளி எறிய வேண்டும்.

கிழக்கில் மட்டக்களப்பை தவிர, நிலைமை மோசமாக உள்ளது. வடக்கில் இருந்து வரும் செய்தி மிக முக்கியமான செய்தியாக இருக்க வேண்டும்.

மாநகர சபையின் ஆட்சி அதிகாரம் முக்கியமானவை. அதன் சொல்லிலேயே ஒரு அடையாளம் இருக்கிறது. அது எமது கைகளில் இருக்க வேண்டும். அதற்காக அனைவரும் உழைக்க வேண்டும் எனத் தெரிவித்தார்.

https://www.samakalam.com/கொக்கரிக்கின்ற-ஆட்சியாள/